Ivigarsuarnik mersorneq pillugu filmi New Zealandimi takutinneqassaaq

Arina Kleistip filmiliaa ‘Ivikkisartoq Kingulleq’ Nuuk International Film Festivalimi filmiliatut naatsutut pitsaanerpaatut siorna toqqarneqarpoq. New Zealandimi Māorilandimilu Film Festivalimut takutikkiartorniarlugu maanna aallartussanngorpoq.

Tassani Arina Kleistip filmiliani marsip 30-ani takutissavaa. Filmiliortartut allat nunap inoqqaavisa kulturiannik sammisaqartut allat naapinissaannut aamma periarfissaavoq.

- Annertuvoq ataqqinaataalunilu, oqarpoq.

‘Ivikkisartoq Kingulleq’-mi Marie Josefsen 82-inik ukiulik ilaqutaasalu kinguaariinni arlalinni ivigarsuarnik mersortarsimanerat sammineqarpoq.

Ileqquusoq taanna puiorneqapajaarsimavoq, filmili pissutigalugu maannakkut amerlanerusut ilisimalersimavaat.

- Mariemut qujassutissaqaqaanga, ilisimasaminillu suliniut aqqutigalugu avitseqatigisimammatigut. Tamanna ivigarsuarnik mersortarnerup tammatsaaliorneqarnissaanik qulakkeerinneqataammat, Arina Kleist oqarpoq.

Filmiliornissaq sioqqullugu ivigarsuarnik mersornermi ilitsersuutit video sananeqarput taakkulu YouTubemi suli isiginnaarneqarsinnaapput.