Juullimut inuulluaqqussutip unitsinneqarnera pillugu ugguarneq kulturimut ministerip paasisinnaavaa
Kalaallit Nunaannut juullimut inuulluaqqusineq oqaluttuarisaanermik ileqqutoqqanillu ulikkaarpoq, Danmarkimi kulturimut ministeriugallartoq oqarpoq. Tamannali aallakaatitassiap taamaatinneqarneranik allanngortitsinngilaq.
Ilinniartitaanermut ministeri Christina Egelund (M) kulturimut ministeritut paarlaasuuvoq, parteeqataata Jakob Engel-Schmidt angajoqqaanngornermut atatillugu sulinngiffeqarnerani.
Danmarks Radiop aallakaatitassiaata Julehilsen til Grønland-ip unitsinneqarnera Kalaallit Nunaanni amerlasuunut alianartumik nutaarsiassaavoq. Qisuariarneq danskit naalakkersuisuinit paasineqarsinnaasoq, Folketingimi akissutigineqartup maanna takutippaa.
Apeqqut Pia Kjærsgaardimit Dansk Folkepartiimeersumit apeqqutigineqarpoq. Unitsitsinerup qallunaanut kalaallinullu annaasaqaataaneranik kulturimut ministeri isumaqataanersoq Pia Kjærsgaardip paaserusuppaa.
- DR-ip aallakaatitassiamik ”Julehilsen til Grønland”-imik unitsitsisimanera pillugu uggorinnittoqartoq paasilluarsinnaavara. Aallakaatitassiaavoq oqaluttuarisaanermik ileqqutoqqanillu ulikkaartoq, kulturimut ministeriugallartoq Christina Egelund Moderaternemeersoq akissuteqarpoq.
Taamaakkaluartoq DR-ip Kalaallit Nunaannut juullimut inuulluaqqussummik aallakaatitsinissaanik tatisinissamik danskit naalakkersuisui pilersaaruteqanngillat, DR-imimmi oqaatigineqarpoq tamanna piffissamut naleqqukkunnaarsimasoq.
- Radiomut fjernsynimullu inatsimmi allassimavoq DR-ip siulersuisui aamma pisortaanera aallakaatitassianut akisussaasuusut. Taamaattumik aallakaatitassiat imarisaanut tunngatillugu aalajangiisinnaatitaaneq DR-ip kisimi oqartussaaffigigaa, Christina Egelund oqarpoq.
DR-ip Kalaallit Nunaat pillugu aallakaatitsineq pingaartittariaqaraa ministerip aamma erseqqissarpaa. Taamaattumik qallunaat kalaallillu innuttaasunut kiffartuussinermi pitsaasunik aallakaatitassiortoqarnissaa qilanaarisinnaavaat, ingammik qanittukkut aalajangernerup kingorna, Christina Egelund isumaqarpoq.
Kalaallit Nunaannut juullimut inuulluaqqussut ukiuni 91-ini aallakaatinneqarsimavoq, siullermik radiokkut 1983-imiillu tv-kkut.
