Kalaaleq inuusuttoq igasoq Arctic Young Chefimut ajugaaniutivinnissamut piareeqqasoq
Kalaaleq iganermut piginnaaneqarluartoq Arctic Young Chefimut ajugaaniuteqataanissaminut piareersimalluinnarpoq. Tamanna Islandimi Reykjavíkkimi Harpami arfininngorpat oktobarip 19-ani pissaaq. Lars Abelsen ajugaaniutivinnissamut anngunnikuuvoq, maannalu Islandermiumut, Norgemiumut Savalimmiormiumullu unammisussanngorluni.
Lars Abelsen arfininngorpat unammersuarnissamut anngunnikuuvoq.
Foto: Arctic Young Chef
Arctic Young Chef 2024-mut ajugaaniutivinnissaq aajunaralaannguaq. Nunatsinneersup Lars Abelsenip Islandimut, Savalimmiunut Norgemullu unamminissaa maanna qallivoq.
NORA, Nordisk Atlantsamarbejde, tusagassiuutitigut nalunaarummi allappoq ajugaaniutivinnissamut peqataasussat issittumi nerisassaatigineqartut atorlugit piginnaasatik ajugaaniutivinnermi takutissagaat. Ukulu issittumeersut nerisassiarineqassapput:
Siulequt: Aalisakkat tarajortikkat qeqqussanik Savalimmiuneersunik akoorlugit.
Kissartut: Savap uummataa qungasialu, Norgemeersunik paarnalerlugit nunatsinneersunillu immiaaqqamik akuukkat.
Kinguleqqiut: Rabarberit Islandimeersunik skyrilerlugit.
- Nerisassat taakku mamaqarluartut issittup ilisarnaatifat, Arctic Young Chefimilu unamminermi naleqartinneqarlutik. Taakku nerisassat ajornanngitsuaqqamik pissarsiarineqarsinnaasut ulluinaarnili nerisarineqanngitsut unamminermi ukkatarineqassapput.
Unammisut taakku sisamat nassaarsiorluarsinnaanertik atorlugu nunat avannarliit rabarberinik kinguleqqiorsinnaanermut siunnersuuteqassasut, NORA tusagassiuutitigut nalunaarummi allappoq.
NORA aamma paasissutissiivoq pulaartut arfineq-pingasuusut unammisut igaavinik misiliinissaminnut periarfissaqarumaartut. Taakku akornanni lottortoqarluni, eqquisut igasut unammersuarnermi igaavinik misiliissapput.
Arctic Young Chefimi unammersuarnermi uku peqataassapput:
· Lars Abelsen Nunatsinnit.
· Runar Helgeland Norgemit.
· Sebastian Jiménes Garcia Savalimmiunit.
· Andrés Björgvinsson Islandimit.
