Katereernermi Korea Kujallermut angalaneq: Sinnattoq piviusorsiunngitsoq piviusunngorpoq

- Aallaqqaammut taama ungasitsigisumut angalasinnaallunga takorloorsinnaanngilara. Tikinnikuusanni ungasinnerpaaq tassaagunarpoq Italia.

Johanna Scivoli qungujuppoq, aasaaneranilu katereernerminnut atatillugu qaammatini pingasuni Korea Kujallermiissimanini puigunaatsoq ullumikkut Nuummi ukiuunerani taartumi eqqarsaatigiinnarlugu sallaatsumik ilisarnartumillu illarpoq.

Johannap 24-nik ukioqartup uiatalu Walterip 36-nik ukioqartup Nuummi blok 7-imi angerlarfsimaffimminnut tikilluaqquaatigut, tassanilu iggavimmi pattagiaqarlunilu isersimaartarfiup nerriviata ataani pinnguaateqarpoq. Aappariit 2020-mi katikkamik assingi iikkami nivingapput.

Ukioq taanna corona nunarsuaq tamakkerlugu tuniluuppoq, taamaammallu Walterip Johannallu piffissami sivisuumi Koreami Kujallermi kulturi misigalugu najugaqarnissaminnik sinnattortik ukioq maanna aatsaat piviusunngortippaat. Aningaasanik katerseqqaarnissaat aamma pissutaavoq.

Korea Kujalliup toqqarneranut pissutaasut ilaat tassaavoq Walter Scivolip Kangianik soqutiginninnera.

Soqutigisaq meeraallunili aallutaa.

- Annermik nerisassat qanorlu nerisassiarineqartarneri soqutigaakka, Walter illarpoq, Nuullu qeqqani Brugsenip kissartuerniarfiani sullissisoq nuummiorpassuit naapissimassavaat.

Walterip Kangia nerisassallu soqutigigai Johannap filmit isiginnaagassiallu nangeqattaartut soqutigai. Katerlaallu Netfliximi Koreamiut isiginnaagassialiaat soorlu ”Rookie Historian - Goo Hae Ryung” isiginnaarnerisigut taamaalillutik soqutigisatik assigiinngitsut kattuppaat.

- Korea Kujallermiut isiginnaagassialiaat nangeqattaartut isiginnaassallugit nuannaraagut. Soorlu tassa inuttaat saamanerusut, inutsialaasut, Johanna, Kommuneqarfik Sermersuumi allaffimmiuusoq, nassuiaavoq.

Isiginnaagassiat nangeqattaartut Koreami Kujallermi kulturip misiginissaanut kajuminnerulersippaat. Aappariilli katereernerminni pisortatigoortumik angalassagunik ullut takusassanut taamaallaat piffissaqarlutik takornariaannarniaratik isumaqatigiipput.

- Marluulluta nunami kulturi nammineerluta misissussallugu nuannaraarput. Tikitami innuttaasut inuunerat misilillugu inuunerissallugu, Walter Scivoli oqarpoq.

Aningaasaqarnermik nakkutiginneqqissaarneq

Korea Kujallermukarnissaq aalajangiukkamikku isumagisassat isumagalugit aallartipput.

Minnerunngitsumik angalaneq qaammatinilu pingasuni najugaqarnissaaq qanoq aningaasalersorneqassanersoq. Aappariit Scivolikkut aningaasaqarnerisa kukkunersioqqissaarnissaa pisariaqarpoq, Walter Johannalu, angalanissaminnut missingersuusioramik ulluinnarni pisariaqartinngisaminnut aningaasarpaalunnik atuisarnerminnik paasisaqarsimasut, oqaluttuarput.

- Missingersuusiornermi sorpassuit pisariaqartinngisat nassaarineqartarput, Johanna oqarpoq.

Kunngiitsuuffik Korea, nunamut pisortatigoortumik taaguutaasoq, Kalaallit Nunaannut sanilliullugu nunarsuup illuatungaaniipajaarpoq. Maanngaanniit illoqarfimmut pingaarnermut Seoulimut qanoq timmisartussanersut maanna apeqqutaalerpoq.

Ikinngutertik Japanimiinnikoq aqqutigalugu ungasissumut angalanissaminnut, Københavnimi timmisartoqarfimmiit Tyrkiet aqqusaarlugu Seoulimut katillugit akunnernik 15-inik sivisussuseqartoq, qanoq akikinnerpaamik timmisartornermut bilitsisisinnaanerlutik paasisimagaat Walter Scivoli oqaluttuarpoq.

Korea Kujallermut tikeqqaarneq puullaaqinaqaaq.

Aappariit Scivolikkut sivisuumik timmisartoreerlutik Seoulimi timmisartoqarferujussuarmi inunnik ulikkaartumi koreamiusullu allagartaqartumi qeqqipput.

- Sivisuumik angalareerluni sakkortuvoq, allarujussuuvorlu. Inussat ipaasaat assillu atorlugit isumannaallisaasoqartorujussuuvoq, sumilu najugaqarnissarput allattussaavarput. Tuluttut aamma oqallorinnerpaanngillat, Johanna eqqaamasarsorpoq.

- Tamannali aamma nuannequtigaat, uia ilassuteqarpoq.

Oqaatsit unammillernarsinnaassasut ilisimareerpaat, oqarasuaatiminnilu koreamiusut app-it pitsaasut tuluttuumiit koreamiusut nutserinermi iluaqutaasinnaasut nassaaraat. Iluaqutit, minnerunngitsumik neriniartarfinni sassaalliutit allattorsimaffii paasiniaraanni.

- Sassaalliutit allattorsimaffiat assiligutsigu app-ip tuluttut nutsertarpaa, aappariit oqaluttuarput.

Ataatsimut isigalugu Korea Kujallermukarniaraanni app-it atortarnissaat Johannap Walterillu innersuutigaat. Assersuutigalugu taximik inniminniiniarnermi. Tassami Google Maps iluamik atorsinnaanngilaq, taarsiulluguli Korea Kujallermiut app-iat ”Naver Map” angalaniarnermi atorneqarsinnaavoq.

Nerisat airbnb-lu

Najugaqarneq eqqarsaatigalugu aappariit airbnb-mi najugaqarniarlutik toqqarpaat.

Tassa najukkani inuinnaat takornarianut attartortittagaanni. Pitsaasumik nalilerneqarnikut ”super host”-itullu taaneqartartut (ineqartitsisutsialaat) nassaarinissaat pingaartuuvoq, taamaanngippat attartortitsineq inatsisinik unioqqutitsinerusinnaammat politiit aggeratarsinnaapput.

Ineqarfii qaammammut 9.500 koruunit missaannik akeqarput. Ineqartitsisullu tikeraartut akiliisut atorfissaqartitamik tamaasa pigissagaat misissussallugu pikkoripput. Taamaammat allarutinik errortanik peqartuaannarlunilu eqqiaasoqarartuaannarpoq.

Aallannginnerminni misissueqqissaaraluarlutik ataaseq misissoqqissaarsimanngilaat. Tassa sulisinnaanermik periarfissaq, akissarsiaqanngikkaluaraanniluunniit. Taamaanniaraanni nunamut tikinnginnermi sulitsisumik isumaqatigiissuteqartoqarsimassaaq, tamannalu Walterip Johannallu arajutsivaat.

- Kisiannili apeqqutaavallaarunnaarpoq, aappariit nassuiaapput.

Siullertut katersaqarput, aappaattut Johanna Jehovat Nalunaajaasuinut atassuteqarnermigut sumiluunniit attavilimmi sulisinnaavoq, tassani upperisaqaqatigiinnut atortussiat kajumissutsiminik nutsertarpai.

Pingajuattut inuuniarnermi aningaasartuutit nammakkuminarput. Assersuutigalugu qimuttuitsut nunap iluatigoorsinnaasut akikitsuararsuupput. Allat, soorlu nerisassat tikisitat, pizzat jordbærilluunniit akisunerupput.

- Inuulluataanngilagut. Imaanngilaq katersarpassuaqannginnatta. Kisianni ajunngilaq, Johanna oqarpoq, taassumalu Koreami Kujallermi Jehovat Nalunaajaasuini nutserisoqatimi tupaallannartumik nuannersumillu naapinneri aamma oqaluttuarai.

- Misigisaq nuanneqaaq. Isumaqarlunga ilasseqatigiiginnassasugut. Pilersaarusiuussimavaanngali aammalu balloninik tunissutissaaqqanillu nassarlutik tikilluaqquaannga, ”Welcome Johanna” kaagerpassuaqarlunilu. Tamanna qujamasuutigeqaara, oqarpoq.

Nerisassat mamartut

Kangiamiut nerisassiaat Walter Scivolip soqutigisarimmagit soorunami aappariit angalanerminni sutorsimanersut paasisariaqassavarput?

- Taakku uagullu qaqorteqqasortungaatsiarpugut, sticky ricenik (qaqorteqqasut kinertut) taaneqartartut. Aamma ”korean barbecue”-tungaatsiarpugut, tassa neqit nerriviup qaavani sianneqartartut, Walter oqaluttuarpoq.

Pilutarujussuaq neqinik, aalisakkanik naatitanilluunniit ilioraaffigeriarlugu tamaat nerineqakkajuttoq nassuiaavoq.

- Naatitartortorujussuupput, Walter Scivoli oqarpoq.

Aappariittaaq Koreap Kujataani qimmertortoqartarneranik tusatsiakkat ilumuunnginnerarsinnaavaat. Inerteqqutaalernikuuvoq, Walter Johannalu oqaluttuarput. Aamma sullinernik nerinissaminnut neqeroorfigineqanngillat.

Ataatsimut isigalugu nerisassat tungaatigut eqqumiitsoqanngilaq, taakku isumaqarput. Immaqa amikut panertitat eqqaassanngikkaanni. Kiisalu:

- Kukkukuuaqqat isigaat siatat. Taakku ussinngitsoorpagut, Johanna qungujuppoq.

Qeqertami innermik anitsisartulimmi Jejumi, Koreap Hawaiiani, mandarinat allatut tunguarnipput, qeqertallu ilisartaataa ”Jeju Black Pork”- Koreami puulukit nujuitsut wikipedia naapertorlugu immikkuullarittumik mamaqarnerartagaat. Puulukiaqqat qernertumik ameqarlutillu siaangasunik meqqullit pineqartut paasissutissani allassimavoq.

- Black pork mamaqaat, Walter oqarpoq.

Tikeraartuuvugut

Johanna Walterilu qaammatini pingasuni, ukioq manna juunip aallartinneraniit aggustip naanissaanut, angalanerminni sumiiffinni assigiinngitsuni pingasuniinniarlutik aalajangersimapput.

Sumiiffinni marlunni sivisuumik tassaniinniarput. Ilaatigut nunaqarfimmi Incheonimi Seoulimiit akunnerni marlunni qimuttuitsunut nunap iluatigoorsinnaasunut ilaalluni tikinneqartartoq, ilaatigullu qeqertaq Jeju, Koreap Kujalliup Hawaiiatut taaneqartartoq. Ilaatigut Jehovap Nalunaajaasuisa naapeqatigiinnerannut peqataaniarlutik sapaatip-akunnera Gimpomiipput.

- Pikkunaalliunngiivippugut. Tassami nutaanik misigisaqangaatsiarpugut, Johanna oqarpoq.

Kulturertik inuillu allaanerusut kiisalu allaanerusumik periuseqarnertik pillugu ammasumik saaffiginneriuseqarsimallutik Walter ilanngullugu ilisimatitsivoq.

- Taakku ilikkagaqarfiginiarlugit eqqarsartaaseqarpugut. Taakku nunaanni uagut tikeraartuuvugut. Taamak periuseqarnerput nuannarerpasippaat, Walter oqarpoq.

Koreamiut tamakkiisumik isigalugit tunuarsimaartuunerusut, taamaammallu inussiarniiginarsinnaasut taanna Johannalu ilisimatitsipput. Qaamikkulli taamaallaat taamaattut aappariit paasivaat:

- Oqaasii atorlugit siulliulluta ilassigaangatta saammarlutillu ammarfigisarpaatigut, aappariit Scivolikkut oqaluttuarput, Korea Kujallermiorpassuillu Kalaallit Nunaat pillugu tupaallannartumik ilisimasaqartut ilisimatitsissutigaat.

- Kalaallit Nunaat sumiinnersoq qanorlu isikkoqarnersoq nalunngilaat, Danmarkimullu atatittarpaat, Walter oqarpoq erseqqissarlugulu Koreami Kujallermiut ilinniarluarsimasuusut.

Koreamiorpassuit Danmarkimik oqaatsimiillu ”hygge”-mik nuannarinninnerartartut saniatigut aappariit Scivolikkut ilisarnaaterpassuit nanortallit takuaat.

- Nunat avannarliit soqutilluannguatsiarpaat, Walter oqarpoq.

Korea Kujalleq soqutiginartoq ikinngutaat isumaqarput, tikiffissaalli nuna Korea Avannarlermut qanimmat nunallu taakku sukkut tamaana aaqqiagiinngissuteqartarmata angajoqqaavi ilaqutaallu ernumapput.

- Nunalli taakku marluk assigiinngeqaat. Korea Kujalleq toqqissisimanarlunilu isumannaatsuusutut misigaarput, Johanna Walterilu, nunarsuarmi angalaqqinnissaminnik qulanngitsut, oqarput.

Tullissaanilu Korea Kujallermukaratarsinnaapput.

Sumiiffiilli allat, Kangianiittut aammali nunagisamut qaninnerusut kajuminnarput:

- Immaqa Filippinerit. Aamma Savalimmiut Italialu tikikkusussinnaallugit eqqartornikuuarput, Walter, nammineq italiamiunik siuaaqarlunilu Toscanap nalaani ilaqutaqartoq, oqarpoq.