ENTREPRENØRKONKURRENCE
Kulturerput siammarterniarlugu 3.000 kilometerisut isorartugisumik angalasut
Arnat inuusuttuaqqat marluk aallarnisaanermut unammiarlutik kulturerpullu nittarsaanniarlugu pinnguaammik sanaaminnik nassarlutik 3.000 kilomterisut isorartugisumut angalapput. Iligiit taakkua "Gammeqarfik"-mik taaguuteqartut ajugaaniunnermut peqataapput. Ajugaanngillat, peqataanissamulli periarfissaqarnernerminni isumassarsiaminnik saqqummiinissaminnut periarfissaqarsimanertik nuannaarutigaat.
Pernille Berg
- Uunga pigaanni, taava kortimik tigusissaaq, tassani inuit pinnguaataat nuissaaq, Sikkerninnguaq L. Petersen Aasianneersoq nassuiaavoq. Tassani nammineq Ivaana M. Brandt peqatigalugu pinnguaammik pilersitsipput. Pinnguaat timermik aalatitsisarpoq, saniatigullu kalaallit kulturiannik aamma ilisimasaqartitsinerulertarluni.
Taakkua iligiit "Gammeqarfik"-mik taajuutillit Danmarkimi 7.-10.klassimi atuartunut aallarnisaasutut unammisitsinermi Next Levelimut anngunnikuupput.
Kalaallit Nunaat Danmarkimi ilisimaneqarlualernissaa
Immeraammik nalussigaanni, qalipaat sorleq eqqorneqarnersoq apeqqutaalluni timersornermut sungiusaataasumik kisitsisinillu pinnguaatinillu naammassisassaminik tunineqartarpoq — assersuutigalugu stick pullimik, tassa qisummik akeqqap assaaniik peersitsinissamik unamminissamut:
- Kalaallit kulturiannik ilisimasanik siammarterisumik sanarusussimavugut. Nammineq siullermik pinnguaammik sanaartorpugut, taavalu aningaasaliisussarsilluta pissarsivugut, taakkulu pinnguaatip ineriartortinneqarnerani piviusunngortinneqarneranilu ikiuupput. Nammineq qisunnik sanavugut, Ivaana M. Brandt oqarpoq.
Ajugaanngillat, tulluusimaarpulli
Sikkerninnguaq L. Petersenip aamma Ivaana M. Brandtip pinnguaasiartik nuna tamakkerlugu pissartanngorniunnermi, aallarnisaanermik unammisitsinermi ukiut tamaasa Fonden for Entreprenørskabimit aaqqissuunneqartumi, saqqummiuppaat.
Ajugaaniutivinneq Koldingimi Koldinghusimi sisamanngornermi apriilip 25-anni pivoq. Iligiit "Gammeqarfik" 3.000 kilometerisut isorartutigisumik angalapput, ajugaaniunnernut peqataaniarlutik. Niviarsissalli taakku marluk ajuganangillat, peqataanertilli nuannaarutigaat:
- Danmarkimiilluni pissanganarpoq, allaaneroqaaq. Pissangasimaqaagut, kisianni isumassarsiatta saqqummiunnissanut periarfissaqarnerput nuannaarutigaarput. Immitsinnut tulluusimaarutigeqaagut, Sikkerninnguaq L. Petersen oqaluttuarpoq.
Pinnguaat angerlarsimaffimmi atorneqarsinnaavoq, aammali atuarfimmi timersornermi aamma atorneqarsinnaalluni.
