AG-p ikiuukkumatooq avatangiisini
sungiusimasaani naapippaa – Paamiuni atuarfitoqqap eqqaani, 2024-mi
apriilimiilli inuusuttut illorilersimasaanni. Aqutsisup Parnûna Rosingip
anguniagaa uummateqarfialu ersarippoq.
- Inuusuttut inuiaqatigiinni
atorfissaqartinneqarlutik ilisimassavaat. Uagutsinnut pingaaruteqartut uagullu
pingaartikkigut.
AG-p ikiuukkumatooq avatangiisini
sungiusimasaani naapippaa – Paamiuni atuarfitoqqap eqqaani, 2024-mi
apriilimiilli inuusuttut illorilersimasaanni. Aqutsisup Parnûna Rosingip
anguniagaa uummateqarfialu ersarippoq.
- Inuusuttut inuiaqatigiinni
atorfissaqartinneqarlutik ilisimassavaat. Uagutsinnut pingaaruteqartut uagullu
pingaartikkigut.
Aqutsisoq ilinniartitsisutut ilinniagaqartoq
ukiorpassuarni Atuarfik Tuiisami sulisimavoq, pingaartumik atuartut angajulliit
sullittarsimallugit. Nammineq Paamiuni inunngorlunilu peroriartorpoq. Nuummi
ilinniareerluni, aammalu Maniitsumi Aasiannilu sulisareerluni Paamiuni
inuusuttut illuanni pisortatut atorfininnissaminut periarfissaqalerami
Paamiunut angerlarpoq. Paamiut angerlarsimaffigaa. Tassani
najugaqarusunnerullunilu inuusuttunut sunniuteqarluarusuppoq.
- Inuusuttunut tunngatillugu
akuliuttariaqarluta nalunngilarput. Meeqqat inuusuttullu namminneq
kulturiminnik nuannersunik misigisaqartinnissaat pingaaruteqarpoq.
Taamaanngippat inooriaaserput pillugu ilisimasat annaaneqassapput, aqutsisoq
tunniusimasoq oqaluttuarpoq.
Kulturikkut ineriartorneq
Meeqqat kiffaanngissuseqarlutik
ineriartorsinnaassagamik siullertut toqqissisimaffiusunik
angerlarsimaffeqalissasut Parnûna Rosingip kissaatigaa. Taamaalillutimmi
killilersugaanatik ineriartorsinnaalissapput.
- Maani periarfissarpassuaqarpoq.
Nipilersorusukkuit, immiusserusukkuit, filmiliorusukkuit, pinngortitami
assileerusukkuit aaqqissorusukkukkillu. Periarfissaqaqaagut.
Avatangiiserissaarlutalu siunissagissaarpugut, oqarpoq.
Inuusuttut illuani isersimaartarfimmi pinngorartitsineq killilersugaanngitsoq takuneqarsinnaavoq.
Assi: Sheila Sariboga
Kingullertigut nipilersortartut kulturip
illorsuani workshoppertitsisarput, inuusuttut nipilersukkanik immiussineq,
nipilersukkanik aaqqissuussineq nipilersorlunilu videoliorneq ilinnisavaat.
- Inuusuttut suliniutinut
peqataatinneqartuartariaqarput. Peqataasutut misigisariaqarlutillu
akisussaaqataasariaqarput. Maaniikkaangamik ataatsimoortutut misiginissaat
pingaaruteqarpoq.
Parnûna Rosing illumi qalipaatigissaartumi,
kiffaanngissuseqarluni pinngorartitsiffiusumi takoriartitsivoq.
Isersimaartarfimmi arsarnerit qalia tamakkerlugu qalipanneqarsimapput,
paarlermilu qalipaatit sorliit atorneqannginnersut eqqaasinnaanngilara. Kultureqarnermi
pinngorartitsinissamut inissaqarpoq, Parnûna Rosingili immikkut ukkataqarpoq.
Kulturi inuusuttunut utertikkusuppaa. Pingaartumik kalaallit kulturiat
inooriaasiallu.
Kulturikkut inooriaaseq
Parnûna Rosingip, Paamiuni inuusuttut illuanni aqutsisup, inuusuttut toqqissisimatillugillu, kultureqartillugillu pinngorartitsinermi ineriartortikkusuppai.
Assi: Sheila Sariboga
- Paamiut eqqaani illuaraq iluarsaanniarlugu
anguniagaraarput, tassanilu inuusuttut aalisarsinnaallutillu piniarsinnaallutillu
unnuisinnaapput. Piniartassapput kalaallillu inooriaasiat sutigut tamatigut
ilinniassavaat. Inooriaaserput inuiaqatigiinnut pingaaruteqarmat
illuaraateqarusuppugut. Imminut ilisimanissaq – kulturitsinni inooriaasitta
ilisimanissaa pingaaruteqartorujussuuvoq. Kulturerput malillugu inooriaaseq.
Tamanna ilisimasatsinni pingaarnerpaavoq.
Parnûna
Rosingip inuusuttuulluni umiatsiarneq ilikkarusunnikuuaa. Piniaqataarusullunilu
qanoq nerisassanik pissarsisoqarsinnaaneranik ilikkarusuppoq. Taamanikkut
takorloorsimasani tamaasa ullumikkut sapinngilai. Erniminut inuusuttunullu
inuusuttut illuaniittartunut ingerlatitseqqiiniarluni piumassuseqarluarpoq.
Parnûna Rosing naapertorlugu pisinnaasat pingaarutillit
ilinniarneqaqqinnissannut piffissaavoq pingaarutilik.
- Ineriartornermut peqataavugut, maannali
inuusuttut ilarpassui pinngortitamiissinnaanngitsut misigisarparput. Inuunermik
nuannarisaqarneq annaasimallugulu oqarasuaateqarluni ineriartornermi
unittoorsimapput. Ilisimasat pingaarutillit ineriartornermi annaaneqartalerput.
Taamaammat taakkua ilinniartitsissutiginissaat uagutsinnut
pingaaruteqarluinnarpoq, sunngiffimmi ornittagaannaagaluaruttaluunniit.
Aalisarneq, tisaneq, panertitsineq, tarajorterineq pujoorinerlu – ilisimasat
tamakku tamarmik kulturikkut inooriaatsitsinnut pingaaruteqartut. Inuusuttut
kalaallit mamartuliaasa qanoq sananeqartarnerannik ilinniarnissaat uannut
pingaaruteqarpoq. Tamakku tarnimeereerput. Tamakku kinaassusitsinniipput,
inuusuttut illuanni pisortaq oqarpoq, nangillunilu aasamut illuaqqap
iluarsaanneqarnera aallartissammat qilanaarluni oqaatigalugu.
Inuusuttut sulianut tamanut peqataanissaat
taassumunnga pingaaruteqarpoq. Ataatsimoorneq aammali nammineersinnaaneq,
nipilersuusioraluaraanni, illuaqqioraluaraanni piniaraluaraanniluunniit,
ilikkassagaat taassumunnga pingaaruteqarpoq.
- Inuusuttut pinngortitamiikkaangamik qanoq
iliussanerlutik naluneq ajoraat misigisarparput. Qanoq pisinnaasaqartigalutik
nalusarpaat. Pinngortitami misiliigaangamik imminut tatiginerulertarput.
Misilissimanngisaminnik misiliinissaminnut imminnut tatiginerulertarput.
Meeqqat inuusuttullu kulturertik malillugu iluattumik misigisaqartinnissaat
pingaaruteqarpoq. Tamanna tarnimikkut killinneqaatigisarlugulu
ineriartorfigisarpaat. Tulluusimaarnerulerlutillu imminut
naleqartinnerulertarput. Tamanna inuusuttunut illuanni pingaarnerpaasutut
misigisarpara.
