Naak sanilit ungasikkaluartut sakkutooqarfimmi Mestersvigimi juullimut
pinnersaatit amigaatigineqanngillat – silami illup iluaniluunniit.
Angutimmi
pingasuusut Ittoqqortoormiinit 200 kilometerit missaannik
avannarpasitsigisumiittumi sulisut, juullimut pinnersaanissaminnut piffissaqarluarput,
taamaattumik traktori kumminik assakaasulik, lastbiilit aamma aputaajaatit
maanna decembari aallartilaaginnartoq juullimut pinnersarneqareersimapput.
Naak sanilit ungasikkaluartut sakkutooqarfimmi Mestersvigimi juullimut
pinnersaatit amigaatigineqanngillat – silami illup iluaniluunniit.
Angutimmi
pingasuusut Ittoqqortoormiinit 200 kilometerit missaannik
avannarpasitsigisumiittumi sulisut, juullimut pinnersaanissaminnut piffissaqarluarput,
taamaattumik traktori kumminik assakaasulik, lastbiilit aamma aputaajaatit
maanna decembari aallartilaaginnartoq juullimut pinnersarneqareersimapput.
Taakkua pingasut Mestersvigip mittarfia 1800 meterinik takissusilik ulloq
unnuarlu – ukioq kaajallallugu piareersimatittussaavaat. Aamma sakkutooqarfiup illutai arlallit
paarisussaavaat aserfallatsaalisussaallugillu.
Inuuneq
pisariunngitsoq
- Inuuneq pisariuallaanngilaq. Pisariaqaraangat aputaajaasarpugut. Aserortoqaraangat
iluarsaattarparput - amigaateqaraangattalu timmisartumut tulliuttumut
inniminniisarluta, Mads, sakkutooqarfimmi sulisut nukarlersaat, Tunup avannaani
siullermeerluni ukiinissaminik aallartitseqqammersoq oqaluttuarpoq.
Mestersvigimi aqutsisoq Erik Sterling, Mestervigip tulluusimaarutigisaanut – aputaajaammut Norgemi Øveraasenimit sanaajusumut – juullip uummataannik ikkussuisoq.
Assi: Nammineq pigisaq
Ukeeqatissai allat marluk misileereersimapput: Sakkutooqarfimmi aqutsisoq
Erik Siriusimi siornatigut peqataareersimavoq, Emililu siornatigut ukiuni
marlunni Station Nordimiissimalluni.
- Timmisartoq Hercules Aalborgimeersoq decembarip qiteqqunnerani pajulluni
tikikkaangat, Mestersvigimi juulli aallarnerneqarluartarpoq. Taamaalillutami
taqussavut juullimi nerilluaatissanik ilaneqartarput, ilaquttanit tunissutisisarluta
pingaarnerpaamillu - orpilissamik tunineqartarluta, Emil oqaluttuarpoq.
- Tamannalu pissutigalugu decembarip aallartinnerani juullimut pinnersaareertarpugut.
Maanimi tikeraartoqarpallaartannginnatta, tikeraartoqaraangattalu soorunami
juullimut pinnersaateqassaagut.
Aamma pingasuullutik juulliaqqami unnukkullu qanoq pisoqarnissaanut pilersaarusiuleruttorput.
- Suliassavut soorunami isumagisariaqarpavut, aammali
nerisassarpassuarnut pitsaasunut piffissaqartariaqarpugut – aamma soorunami
juullip inuata pulaarnissaa naatsorsuutigaarput, tassami Kalaallit
Nunaanniippugut, Erik oqaluttuarpoq.
- Juullip inua ilimagisatsitut tuttuutini ilagalugit tikittussaasoq,
sila pissutigalugu tikinngitsuussagaluarpat, allamik pilersaaruteqarpugut,
qimmit pingasut minnerunngitsumillu Mads ilaatinneqassallutik. Taannami suli
mikigami pooq nammallugu igalaakkut isersinnaassaaq, Erik illarluni oqarpoq.
Ukiukkut nalunneq
Mads juulliaqqami aaqqissuussamik nutaamik – ikinngutaasa oqaatigisaat naapertorlugu, Tunup Avannaani siornatigut
takuneqarsimanngisaannartumik – aamma pilersitsiniarpoq.
- Nutaajugami Danmarkimiillu tikeqqammerluni, taamaattumik juulliaqqami
nalunnguarniarluni aalajangersimavoq.
Sakkutooqarfimmik immikkut ilisimasalik Mads Hansen – aaqqatilik – aputaajaatit ilaanut ullorissamik nivinngaavoq. Talerperliuvoq sakkutooqarfimmik aqutsisoq misilittagaqarluartoq Erik Sterling aaqqateqarani sulisoq.
Assi: Nammineq pigisaq
- Uagut misilikkusunngilarput, namminerli misileriarliuk. Juulliaqqami
immamut ikerusulluinnarpat pilattuummik motorilimmik sikumi putuliornissaanut
ikiorusupparput. Angisuumik pilattuuteqarpugut motorilimmik meterimik
ataatsimik silissusilimmik pilattorsinnaasumik, taamaattumik siku issutsereersimagaluartoq
putuliorsinnaavugut – Mads-ilu nalunnguarsinnaalissaaq, Emil oqarpoq, Mads-illu
ikinngutimi isumassuinerat nuannaarutigalugu.
Juullimi
nerisassarpassuit
Juullimut nerisassiornissaq aamma pilersaarusiorneqarpoq. Naak
sakkutooqarfimmi angutit pingasuinnaagaluarlutik aamma namminneerlutik
nerisassiortussaagaluarlutik nerisassarpassuaqassapput.
- Tunup Avannaani sumi tamaani taamaappoq. Juulliaqqami nerisassat
tamaasa sassaalliutigisarpavut. Sumiiffinnit assigiinngitsuneersuugatta
juullimilu ileqqutoqqat assigiinngitsut naapertorlugit inuulluta, taamaattumik
arlaannattaluunniit amigaateqanngilluinnarnissaa qulakkeertariaqarparput.
Taamaattumik qeerlutooq, puulukimineq siataq, nerleq, frikadellet medisterilu
mikisualuillu nerisassiarisarpavut aamma soorunami ris a’lamande kirsebærinik
miseralik sassaalliuteqartarput, Erik nassuiaavoq.
- Nerisassanik sinneqalaarsinnaassaagut. Taakkulu juulliaqqap kingornatigut
mamarsaatigisinnaassavavut.
Sikumi pilattuummik nalunnguarfissaliornerup juullimullu
nerisassiornerup saniatigut, ilaquttat Danmarkimiittut juulliaqqami ilassinissaannut
aamma piffissaqartussaapput.
- Maani Mestersvigimi oqarasuaatikkut attaveqarluartarpugut. Avannarpasinnerusumi
Daneborgimi Station Nordimilu taamaanngilaq. Taamaattumik ualikkut
angerlarsimaffitsinnut sianertussaassaagut, ilaquttatta Danmarkimi nereqatigiinnissaat
sioqqullugu, Mads nassuiaavoq.
