Inu:IT-mik toqqaviliisoq illuliortartorlu Martin Gjødvad ukiut 25-it Kalaallit Nunaanneereerluni Jyllandip avannaani illoqarfimmut Aabybromut 2016-imi nuuppoq.
Tassani nuliani qitornatillu marluk atuarfitoqqami maanna najugaqarput. Gjødvad ukiut marlussuit matuma siorna illut silataanni eqqumiitsuliortartumik suleqateqalerlunilu illup iigaasa ilai Kalaallit Nunaanni kangerlunnik ilulialinnik, umimmalinnik, qilanngalinnik, RAL-ip umiarsuaataasa ilaannik qulimiguulimmillu S-61-italimmik qalipatsinnikuummagit atuarfitoqaq Kalaallit Nunaannut atassuteqarnermik ersersitsilluarpoq.
Inu:IT-mik toqqaviliisoq illuliortartorlu Martin Gjødvad ukiut 25-it Kalaallit Nunaanneereerluni Jyllandip avannaani illoqarfimmut Aabybromut 2016-imi nuuppoq.
Tassani nuliani qitornatillu marluk atuarfitoqqami maanna najugaqarput. Gjødvad ukiut marlussuit matuma siorna illut silataanni eqqumiitsuliortartumik suleqateqalerlunilu illup iigaasa ilai Kalaallit Nunaanni kangerlunnik ilulialinnik, umimmalinnik, qilanngalinnik, RAL-ip umiarsuaataasa ilaannik qulimiguulimmillu S-61-italimmik qalipatsinnikuummagit atuarfitoqaq Kalaallit Nunaannut atassuteqarnermik ersersitsilluarpoq.
Danmarkimi atuarfitoqqap isuani
qalipagaq iluliaqarlunilu, arfeqarlunilu,
umimmaqarlunilu qulimiguulimmik S-61-
eqarpoq.
Assi: Jesper Hansen
Iikkami qalipagarsuaq illup isuani, naatsiivimmi isaarissami iikkallu oqqiffiit ilaanni qalipagaavoq – taamaalillunilu danskit nunaqarfiisa atuarfitoqaannut assingunngilluaasarpoq.
- 20-nik ukioqarlunga Kalaallit Nunaannut nuuppunga – taamaalillungalu ilaquttat pillugit Danmarkimut Aabybromilu atuarfitoqqamut nuunnginninni ukiuni 25-ni Kalaallit Nunaanniippunga. Tassani illorsuup isuani Kalaallit Nunaannut eqqaassutissamik qalipaanissaq nuannerunartillugu isumassarsiaraarput.
Isumassarsiat imaaginnavittut
Iikkami qalipagarsuaq eqqumiitsuliortup Kiss Rohde Jønssonip qalipappaa. Taanna suliassanut taakkununngarpiaq immikkut piginnaasaqarami Danmarki tamakkerlugu sullitaqartarpoq.
Martin Gjødvadip ilaqutaasa ineqarfiannut nuannersumut isaariaq kusassarlugu qilannganik
qalipaaffigineqarsimavoq.
Assi: Jesper Hansen
- Nammineerlunga Kalaallit Nunaanniissimanngilanga, Martinilli asserpassuarnik pajuppaanga – taamaalillunga iikkami qalipagassatut siunnersuusiorpunga. Suliarli alligaluttuinnarpoq, taannami suut qalipakkami ilaassanersut isumassarsiarpassuaqarpoq. Qalipagaq taamaalilluni naatsiiviup isaariaanut iikkallu oqqiffiusut ilaannut siammarpoq, Kiss Rohde Jønsson oqaluttuarpoq.
- Aallarteriaratta isumassarsiat imaaginnavilerput, Martin Gjødvad oqaluttuarpoq.
- Kiss illup isuani naammassilersrolu Air Greenlandip qulimiguuliutaa S-61 aamma ilaassasoq eqqaavara. Taava assialunnik nassaarpunga – Kissillu ilanngullugu qalipappaa.
- Qalipagaq nammineerlunga kusagisupilussuuara, najugarpullu immikkuullarissunngortippaa – qitornamalu aamma kusageqaat, Martin Gjødvad oqaluttuarpoq. Taassuma Freja Ivalo 18-inik ukiulik aamma Magnus Malik 16-inik ukiulik, tamarmik Kalaallit Nunaanni inunngornikut, qitornarai.
- Meeraanerminnut suminngaanneernerminnullu eqqaassutigisarpaat. Inuunerminni ukiut siulliit Kalaallit Nunaanni inuupput, puigunngisaannarpaallu.
Illuliortartoq
Martin Gjødvad qarasaasialerinermut suliffeqarfiutimi Inu:IT saniatigut Nuummi illunik tuniniaanermik suliaqartarsimavoq, tassani ingerlatseqatigiiffini Inu:IT Bolig aqqutigalugu Kissarneqqoortunnguami inissiarsuit nutaat sanatippai.
Illuliornermik soqutigisaqarnerattaaq Aabybromi ingerlaannarpoq.
Ukiuni 25-ni Kalaallit Nunaanniinneq annertuumik sunniuteqarpoq, Martin Gjødvad oqarpoq.
Assi: Jesper Hansen
- Illoqarfiup atuarfitoqaa aqqusinermi eqqissisimasumi pisoqaanerusunik illulimmi inissisimasoq nuannaringaalerpara. Atuarfilli ilaqutariinnut ataatsinut angivallaarmat ineqarfinnut marlunnut avipparput, sanianilu marlussunnik ineqarfiliorlutalu illumik ataatsimoortarfimmik sanagatta maanna illorsuarmi ilaqutariit arfiniliulluta najugaqarpugut.
- Ataatsikkut immikkut ineqarlutalu ineqatigiippugut. Ataatsimoortaqaagut, ilaqutariillu tamattaalluta sapaatip-akunneranut ataasiarluta nereqatigiittarpugut. Toqqaviup aserfallatsaalinissaa aamma ataatsimoorupparput, taamaammat qaammat allortarlugu sapaatip-akunnerata naanerani suliaqartarpugut.
- Ineqatigiinneq immikkuullarissuuvoq, taamatulli ineqatigiinnerit amerlanerusut siunissami takusalerumaarigut ilimagaara, Martin Gjødvad oqarpoq.