Miss Greenland pinnerneqqusaannermi nunat tamalaat peqataaffigisaanni peqataasoq
Naja Mathilde Rosing, 26-nik ukiulik Danmarkimilu kigutigissaasutut ilinniartoq, Camvodiami Thailandimilu ingerlanneqartumi pinnerneqqusaannermi qaammammi matumani peqataavoq. Kalaallit Nunaat allaanerusumik nittarsaanneqarpoq, oqartoqarpoq.
Naja Mathilde Rosing, Kalaallit Nunaata erfalasua takutillugu Cambodiameereerluni. Miss Grand Greenlanditut nunarsuarmi suleqatigiiffimmi peqataassaaq.
Assilisaq pigineqartoq
Naja Mathilde Rosing, 26-nik ukiulik Danmarkimi kigutigissaasutut ilinniartoq, qaammammi matumani Cambodiami Thailandimilu nunanit tamalaanit peqataaffigineqartussanut pinnernerpaatut unammisitsinissamut peqataavoq.
Assigiinngitsunik aaqqissuussisoqarlunilu unammisitsisoqassaaq, ajugaaniutivinnerlu oktobarip 25-ani pissalluni.
- Allanut iluaqutaasussanik suliniuteqarnerit, oqallorissuseq, qulanngilluinnartuuneq, piginnaasat, piumassuseqarluartuuneq, pissuserissaartuuneq allallu assigiinngitsut aallaavigalugit naliliisoqarpoq, taanna oqarpoq.
Kalaallit Nunaat allatut nittarsaanneqarpoq
- Nunannut pitsaanerpaamik ataqqinaataasumik sinniisuunissamut periarfissaqalerpunga. Allaanerussuteqarusullunga pingaarutilimmillu naammassisaqarusunnera takutikkusuppara. Allanut iluaqutaasussamik suliniutikka aamma angusaqarfiginerujumallugit unammisitsinermi ajugaaniarlunga peqataavunga, Naja Mathilde Rosing oqarpoq.
Naja Mathilde Rosing, Nuummi Danmarkimilu peroriartorsimasoq, Miss Denmark 2023-mi peqataavoq aamma Miss Intercontinental Denmark 2023-mi peqataalluni.
Pinnerneqqusaannermi isikkorissuuneq kisiat pinnagu aammali kajumissutsimik suliaqarnerit pillugit naliliisoqartarpoq:
- Suliniarfigerusutakka tassaapput inuit kinguaassiuutitigut atornerlunneqarsimasut, pinngitsaalineqarsimasut, ilaqutaasunit pinngitsaalineqarsimasut allatigullu inuunermi neriuutaarutsitsisumik kannguttaatsuliorfigineqarsimasut pitsaasumik ikiorserneqartarnissaat. Pingaartumik meeqqat inuusuttullu kingunerlutsitsisimasut, Naja Mathilde Rosing nassuiaavoq.
Nuuk Couture kalaallit peqataasuannut aningaasaleeqataasussamut aningaasaliisuuvoq. Unammisitsinerit 20 milliuunit missaannit isiginnaarneqarumaartut naatsorsuutigineqarpoq.
