Naligiisitaanermut Siunnersuisoqatigiit sulinissaminnut piareertut

Kalaallit Nunaanni allakkerivik frimærkep nalinganut ilassutilimmik ukiut tamaasa saqqummersitsisarpoq, taakkunanngalu isertitat suliniummut tapersersoruminartumut tunniunneqartarlutik.

Kalaallit Nunaanni Naligiisitaanermut Siunnersuisoqatigiinnut 2025-mi frimærkimit isertitanit 1 koruuni tunniunneqartassaaq.

Angutit arnallu akornanni naligiissitaanerup oqimaaqatigiissarnissaa ajornakusoortarpoq, marriortup Kristine Spore Kreutzmannip suliaani ersersinneqartoq oqimaaqatigiippoq.

Frimærkip nalinganut ilassutilik kingullermik saqqummersinneqartoq 75.000 koruuninik sinneqartooruteqartitsivoq.

- Kalaallit nunaanni Naligiisitaanermut Siunnersuisoqatigiit aningaasat sumut atorniarpaat?

- Sinneqartoorutit Naligiisitaanermut Siunnersuisooqatigiit Kalaallit Nunaanni arnat angutillu naligiissitaanerannik suliaannut pingaartunut siuarsaanissamut atorneqassapput Siunnersuisoqatigiinni siulittaasunngorlaaq Qillaq Olsen Sermitsiamut oqarpoq.

- Naligiisitaaneq pillugu ilisimasavut, pisortat ingerlatsiviinut aamma institutioninut, namminersortunut suliffeqarfinnut aamma inuiaqatigiinni inuit ataasiakkaat ingerlatiteqqittarpavut. Naligiisitaanissamut sulineq Kalaallit Nunaanni pitsaasumik ineriartorfiuvoq, nunallu tamalaat akornanni suli unammilligassaqarluni.

Amerikami inissianik tuniniaasartoq Donald Trump naapertorlugu suiaassutsit marluinnaapput tassa angut arnarlu, præsidentillu peqqussutaatigut amerikami inuiaqatigiinni assigiinngisitsinermik siuarsaanissamut suliniutit tamarmik aallaqqaataaneerneqartussanngorput.

Sulisartoqarnermi equngassut

Naalakkersuisut Naligiissitaanermut Siunnersuisoqatigiinnut siulersuisunik nutaanik ukiuni sisamani atuuttussanik januaarip aallaqqaataani toqqaapput.

Siulittaasoq tassaavoq Qillaq Olsen, Sipinermiit innersuunneqartoq ilaasortallu allat tassaapput Britta Keldsen, Sulisitsisuniit innersuunneqartoq, Birte Olsen, Sipinermiit innersuunneqartoq, Emma Lennert, ICC-miit innersuunneqartoq – Inuit Issittormiut Siunnersuisoqatigiiffiat, Jokum Zeeb sulisartut kattuffiannit SIK-miit innersuunneqartoq, kiisalu Bonnie Jensen aamma Kasper Berthelsen, inuit pisinnaatitaaffii pillugit Kalaallit Nunaanni Siunnersuisoqatigiinnit innersuunneqartut.

- Siulersuisut nutaat sunik suliniuteqassappat?

- Ilaasortat nutaat ilaasortatullu ingerlaqqittut ukiuni sisamani tulliuttuni pingaarnertut suliniutissaminnik ujartuillutik aallartereerput. Taamatut nalunaaruteqarnissaq qilanaaraara, sulinissarli kalaallit inuiaqatigiivini arnat angutillu naligiissitaanissamut attuumassuteqarpoq, Qillaq Olsen oqarpoq.

Arnat angutillu akornanni naligiinnginneq arlalitsigut pisarpoq, suliffeqarfinnili ersarissumik ersersinneqarpoq.

Naatsorsueqqissaartarfiup kisitsisaataasa kingulliit arnat angutillu akissarsiatigut 23 procentimik assigiinngissuteqartut takutippaat, nunanilu avannarlernut sanilliutissagaanni assigiinngissut Kalaallit Nunaanni annertunerulluni.

- Naligiimmik akissarsiaqartitsineq inuiaqatigiinni eqqortumik pineqarnissamik tunngaviusumik piumasaqaataavoq, naligiissitaanermut naalakkersuisoq Naaja H. Nathanielsen naqissusiivoq.