NIFF qajartorluni misigisassarsiornermik ammarneqarpoq

Kalaaliminertoraangama misigisartagara. Aalisakkanik panertutoraangama puisimilluunniit suaasalittoraangama pilluaammerneq timera tamakkerlugu malugisinnaasara. Mattaminermik iffialimmik aromatilerluakkamillu oqummersisimatillunga qitilaartarnera. Misigissuseq ilisaraajuk?

Misigssuseq taanna Katuami Hans Lyngep inerasuaani takoqqammerpara.

Kulturikkut illorsuup paarlersua inunnik ulikkaavippoq, tassanilu inuppassuit filminik nuannarisallit filmernissaminnut qilanaarput. Nuuk International festival qulingiluassaa ammaqqammerpoq.

Hans Lyngep inersuani ingilluartitaariarlunga piviusulersaarusiap ”Qajaq Man” takuteqqaarneqarnissaa qilanaarlunga utaqqivara.

Filmimi Mike Keen, tuluk igasoq, misigisassarsiortoq qajartortartorlu, Nunatta kitaata sineriaatigut Qaqortumiit Qaanaamut 3.000 kilometerit paassalluni aalajangersimasoq, oqaluttuarineqarpoq.

Nerisassanik allannguineq

Filmi, siorna NIFF-imi filmini naatsukullaliani pitsaanerpaatut nersornaaserseqartoq Arina Kleistimit Nicolaj Coster-Waldauimnit aaqqissorneqartoq aallartippoq.

Mike Keen taamani qajaminut Qaqortumi ikigami Qaanaamut paaginnarani aammali nerisaasiminik allannguiniarluni aalajangersimavoq. Nerisassat nereriaannanngorlugit tunisassiarineqarsimasut qatsullugit qajartornermini kalaaliminertuinnaavinniarluni aalajangerpoq.

Mikep silami issittumi paarnera, inunnik kaffillerlutik tikilluaqqusisunik, oqaloqatiginninnermik kialaartumillu ataatsimooqatiginninnermik tikilluaqqusisunik naapitsinera malinnaavigaarput.

Tamatumanittaaq ilisimatusartup Aviaja Lyberth Hauptmannip Ilisimatusarfimmeersup anaanik misissuinikkut peqqissusaa qanimut malinnaavigaa, paasisallu siuariaatinik ersarissunik takutitsipput. Tassa imaappoq, uanga isiginnaartutut Mikep tuluttut kalaallisullu erlavii malinnaavigissallugit periarfissaqarpunga.

Filmi naammat apeqqarissaarnermi Aviaja Lyberth Hauptmannip oqarneratuut pinngortitami ataqatigiinneq allarujussuuvoq, allannguutillu tupinnarluinnarput.

Inunnik naapitsineq

Mike Keenilli timini nerisanilu kisiisa nukissamik aallerfiginngilai. Sineriak tamakkerlugu inuit kaffillernernut, aammali oqaloqatigiinnernut kialaartumillu ataatsimoornernut qaaqqusisut naapittarpai. Angalanera timersornerinnaanani aammali inunnik naapitsineruvoq – pinngortitap pissaanera, peqqissuseq Nunatsinnilu tikilluaqqusillaqqinneq pillugu oqaluttuaq.

Mike aamma assiliissummik nassarami filmip ilarujussuanut nammineerluni immiussivoq, tassani pinngortitamiinnini oqaluttarisarpai. Isiginnaartutut angalanermini misigisai eqqarsaatailu qanimut paasisaqarfigalugit misigivunga.

Ilitsersuisup immiussanik arriillisitanik atuineratigut Mikep nunatsinni issittumi kilometerini tusintilikkaani paarnerata qanoq ilungersunartigalunilu, takitigalunilu sakkortutigisimaneranik paasinnissinnaaneruvunga. Filmi sapiissusermut, qasusuissusermut pinngortitamillu nuannarinninnermut tunngavoq.

Filmip naanera isiginnaartut peqatigalugit immiunneqarpoq, tassani Mikep oqaluttuani inuit piviusunngortitsisut – inuiaqatigiit kalaallit – peqatigalugit naggaserpaa. Isiginnaariat perngaammik filmimik isiginnaariaannarnatik aammali peqataapput.

Mike Keen isiginnaariat akornanniippoq, filmilu isiginnaariartut allat assigalugit aatsaat isiginnaarpaa. Isiginnaartut peqatigaluta qungujulallunilu, killitsillunilu illarpoq, filmimilu illarnartut inersuarmilu qanilaassuseq tamatsinnit malugineqarsinnaavoq.

Filmi naammat kalaaliminillertoqarpoq, taamaalilluta oqaluttuaq isiginnaaginnarnagu timikkut - qanikkullu - misigaarput. Mmmh, uiluiit, raajat saattuallu. Mamaq!

Filmereerama nerisassaatigut tulluusimaarutigalugit misigalunga angerlarpunga, “Qajaq Man” oqaluttuaavoq nuannaarneq, tulluusimaarneq illarnerlu aqqutigalugit isumassarsiorfiusinnaasoq.

Nunarsuarmi immiartorfimmut imermik najorsinermiluunniit nalorninartoqarfiusinnaasumi nerisassat kulturilu pillugit misigisaq pisariaqartilluinnarsimasaq misigineqarpoq.