Palasitut juulli siulleq

Sara Abelsen kujataani savaateqarfimmi Qassimiummi peroriartorpoq, inersimasuunermilu annerpaartaani ilaquttanilu ukiut 30-t tungaanut Kitsissuarsunni najugaqarlunilu ilinniartitsisutut sulereerluni, Nuummi Ilimmarfimmi palasitut ilinniartunngorpoq, siornalu novemberimi ilinniakkaminik naammasinnilluni. 

Ilinniakkaminik naammassinninnermi kingorna ilaquttani najorniarlugit aalajangerami siorna juullikkunni naalagiartitsinngilaq, ukiorlu manna siullermeerluni juullikkunni aatsaat naalagiartitsissalluni.

Juullip tungaanut piareersaatit annertuut maanna ingerlaleruttortut, taassuma oqaatigaa.

Takorluugaq piviusunngortoq

Sara Abelsenip meeraallunili palassinngornissani takorloortarsimavaa, ilinniartitsisutullu sulinermi nalaani palasinngorniarnissaanut kaammattorneqartarnisimagaluarpoq, taamanikkulli mikisunik meeraqarami piffissaqarfigisutut misigisimasarsimanngilaq.

- Meeqqakkali inersimasunngormata uannullu piffissaqarfigineruma palassinngorniarnissannut piareersimasutut misigisimalersimavunga, Ilimmarfimmilu ilinniartooreerlunga siorna noevmberimi tassa palasinngorpunga, taanna oqarpoq.

Ilinniartitsisut sulinini nuannarikuugaluaqalugu, palasinngorami suliffik imminut tulluartuusoq misigalugu, palasi inersimasunik arfinilinnik meeraqartoq oqarpoq.

Peqqissiminngitsoq

Siullermik Ittoqqortoormiini palasinngorusussimagaluarpoq, tassanili aalajangersimasumik nakorsaqanngimmat tamanna aporfigisimavaa. Periarfissanik allanik misissuereerluni illoqarfiit palaseqanngitsut ilaat, tassalu Qeqertarsuaq, ukioq januarimi nuuffigissallugu aalajangerpoq.

- Siorna palasinngornerma kingorna ilaquttakka najoqqaarusussimavakka, taamaalillunga juullikkunni naalagiartitsineq ukioq manna aatsaat misilissavara, tamannalu assut pissaganarlunilu qilanaarnarpoq.

- Qeqertarsuaq nuuffigissallugu aalajangernera peqqissimissutigisimanngilara, misigisimavungalu maani angerlarsimallunga, innuttaasuniillu tigulluarneqarnera tuppalliutigeqaara, palasi innuttaasuniit nuannarineqarluartoq oqarpoq.

Siusissukkut piareersarneq

Palasitut sulineq Sara Abelsenimut suli nutaajuvoq, juulleriartorneranilu palasimit misilittagartuumit siunnersorneqarnera iluaqutaasimavoq.

- Juullip tungaanut piareeersaatit siusissukkut aallartissagikka siunnersorneqarpunga, maannakkumullu suna tamarmi ajunngitsumik ingerlavoq.

- Sapaassuit pingajuanni nunaqarfimmi Kangerlummi naalagiartitsissaanga, maannakkuugallartumullu pilersaarutit malillugut nunakkut qamuteralassinnarluta nunaqarfimmut umiatsiassaagut.

- Nunaqarfik inukitsunnguugaluartoq innuttaasut naalagiartinneqarnissaat pingaaruteqarpoq, ullorlu taanna iluatsillugu kaffisoqatigiillutalu unnussiuaaqatigiissaagut, taanna oqarpoq.

Taassuma saniatigut Qeqertarsuup oqaluffiani aamma Naalakkatta Pilikkiliavianik (Vorherres Blækhus) taaneqartartumi, juullimut tusarnaartitsinissat piareersarneqarput.

Nutaaliorneq

Sara Abelsen naapertorlugu inuttut ataasiakkaatut tamatta assigiinngitsunik pisariaqartitsisarpugut, pisariaqartitsinerlu aallaavigalugu oqaluffimmi assigiinngitsunik aaqqissuussisarnissaa pingaartippaa.

- Narsami suliffimmik misiliillunga sulininni, aasap tunniussimasaanut oqaluffimmi qujaniaqatigiinneq peqataaffigaara, tamannalu maani ukiarmi aamma misilipparput.

- Taassuma saniatigut oqaluffimmi nipaallisimaaqatigiippugut, imminut toquttarneq pillugu oqaloqatigiilluta, taartalerneranilu ataatsimooqatigiilluta.

- Soorunami tamakku nutaajummata inuit ilaasa nalornissutigilaarpaat, kisianni nutaaliornermik anersaaqarluni oqaluffiup sapinngisamik amerlanerpaanit atorneqarnissaa pingaartippara, palasi oqarpoq.

Aaqqissuussat nutaat Qeqertarsuarmi siornatigut misinneqarsimatsut ilagiit sinniisaasa tigulluaraat ingerlatiinnarnissaallu pilersaarutaasoq, Sara Abelsen oqarpoq.

Qeqertarsuarmi palaseqarfik sisamanik sulisoqarpoq, tassaasut palasi, pattattoq, ajoqi aamma pedeli, taassumalu saniatigut ilagiit sinniisaannut ilaasortat arfiniliupput.