Pan ArcticVision Issittumi tamarmi isiginnaartunut aallakaatinneqassaaq
Erinarsornikkut unammisitsineq Pan-ArcticVision sapaatip-akunnerata naanerani Nuummit toqqaannartumik tv-kkut Issittumut tamarmut aallakaatinneqartussaavoq, tassanilu eqqumiitsuliortut qulit issittumi inuiaqatigiinnit assigiinngitsuneersut peqataassapput. Nunap immikkoortuani tulluusimaarneq, pissaaneqarneq kulturikkullu assigiinngissuseq ersersinniarlugit eqqumiitsuliortut erinarsussapput.
Assi: Katuaq
Issittumi kinaassuseq nukillu nipilersukkanik tusarnaartitsinikkut malunnartinneqassapput, tassani nunap inoqqaavi nunallu inoqqaaviunngitsut Issittumiittut tamarmik issittormiut tamarmik kinaassusaat nukittorsarniarlugu erinarsoqatigiissapput.
Tamanna erinarsorluni unammisitsinermi Pan-ArcticVisionimi, sapaatip-akunnerata naanerani Nuummi ingerlanneqartussami, anguniarneqarpoq. Unammisitsineq aappassaanik ingerlanneqalerpoq.
Kalaallit nipilersoqatigiit NUIJA 2023-mi issittumi erinarsuutinik unammisitsinermi ajugaaqqaarput, maannalu Kalaallit Nunaat unammisitsinissamik aaqqissuisussanngorpoq.
Suliniummi „Pan-ArcticVision – erinarsorneq, ataatsimoorneq, kiffaanngissuseq!“-mik qulequtalimmi Issittumi namminerisamik aalajangiussisinnaaneq ataatsimoorussamillu tulluusimaarutiginninnissaq pingaartinneqarput. Eqqumiitsuliortut kulturiminnik Issittumullu ataatsimut takorluukkamik ersersitsinissaminnut periarfissaqarput.
Eqqumiitsuliortut qulit, erinarsuutit qulit, inuiaqatigiit qulit
Tusarnaartitsisussat ilagaat Savalimmiuni erinarsortartoq Ester Skála, Sverigemi Jåhkåmåkkeemi nipilersortartoq saamik Mirja Palo aamma Kalaallit Nunaata Naja P.-ia.
Eqqumiitsuliortut qulit taakkua Issittumiittut allat peqatigalugit nipilersukkanik oqaluttuarisaanermillu tusarnaartitsissapput.
Issittumi nukinnik nutaamik ersersitseriaaseq
Nipilersorneq aqqutigalugu issittumi pissaaneqarnerulernissaq Pan-ArcticVisionip ersarissumik anguniagaraa. Pilersaarut nipilersorneq kisiat pillugu pilersaarusiaanngilaq, aammali issittumi pissutsit piviusut inuiaqatigiippassuarnik nunami issittaqisumi kusanartumili najugaqartunik atassuteqalersitsinerinut tunngavoq.
Ataatsimoornissamut kulturikkullu tulluusimaarnermik nalliuttorsiutiginninnissamut kikkulluunniit qaaqqusaapput, Pan-ArcticVisionillu peqataasut kajumissaarpai namminneq oqaaseqaateqaqqullugit aammalu allagartarsuarnik erfalasunillu nassaqqullugit, taamaalillutik issittumi kinaassutsip ataatsimoortup oqariartuutaa erseqqissarniassagamikku.
Nuummit toqqaannartumik aallakaatitsineq
Pan-Arctic Vision Nuummit toqqaannartumik 2024-mi oktobarip aqqaneq-aappaanni Katuami aallakaatinneqarumaarpoq, Issittumilu tamarmi isiginnaarneqarsinnaassalluni.
