Pinnguarneq, illarneq misigisassarsiornerlu

Nuummi isseqisumi taaqisumilu Walt Disneyp misigisassarsiorfissatut takorluugaasa ilaaniittutut misigivunga.

„Ninnup Pinnguartarfiani“ angisuumi nutaami, siorna decembarip arfineq-aappaanni ammartumiippunga.

Uigalu ernivut marluk peqatigalugit pinnguartarfissuarmut iseratta sulisunit qungujulasunit ilassineqarpugut popcornisunnilu tipigissoq naamasinnaavarput.

Ernima ini marlunnut avissimasoq takugamikku nuannaangaaramik isaat ingerlaannarlutik uisasorujussuanngorput. Anginerusoq pinnguartarfissuuvoq aappaalu anersaartorfissaqarnerulluni meeqqanut mikinerusunut pinnguartarfittalik. Pinnguartarfik silataanit isigineranit ilua anginerusutut misinnarpoq.

Gepardip sukkasuumik pangalittarneranit sukkanerusumik qaatiguuvut peerpavut iserlutalu.

- Meeqqat inersimasullu maani nuannisaarnerat takullugu uannut tunissutaavoq nuannersoq, pinnguartarfimmik ammaanitsinni ulapilluareernitsinni tamanna nukissaqalersitsisarpoq, Heidi Tróndheim, piginnittut ilaat, oqarpoq.

Taassuma qitornaasalu pingasut qatanngutaatalu angutip “Ninnup Pinnguartarfia” pigisaraat, katillugit tallimanik sulisoqartoq.

Inimut anginermut ingerlavugut. Pinnguartarfik nunanut kiattunut allanullu eqqaanartunik pequsersugaavoq. Qalipaatit qorsuit inuummarissinartutut naleqquttumillu ataqatigiinnermik misigissutsinik pilersitsivoq. Iikkani Issittumi uumasut titartakkat nivinngarneqarsimapput, isigilluarlugillu qimerloorutsigik takusinnaavarput uumasut seqinersiuteqartut aasarsiutinillu teqqialinnik nasaqartut. Nannut aarrillu nunani kiattuni soorlu Maldiverne-mi Bali-milu feriartut. Nuannit.

Meeqqakka trampolineqarfissuarmut arpallutik ingerlaannarput, anaanakkut ataatakkullu eqqaaqqinnagilluunniit. Tupaallallunga qungujulallungalu isigaakka, tassami sumiiffinnut nutaanut iseraangatta nukarleq uannut qanittuararsuusarmat.

- Meeqqat maaniileraangamik piffissap sivikitsup ingerlanerani angajoqqaaminnit immineerusunnerulersarnerat erseqqittaqaaq, Heidi Tróndheim, perorsaasutut ilinniarsimasoq, oqarpoq.

Ilaqutariit Trondheimikkut pinnguartarfik taamaattoq ukiuni arlalinni oqaloqatigiissutigisarsimavaat.

- Nuummi suut amigaataanersut ukiut ingerlaneranni oqaloqatigiissutigisaratsigu. Isumassarsiarput arlaleriarluta saqqummiuttarlugulu tunuartittarnikuuarput, maannali maaniippugut isumaqarpungalu nunarsuarmi suliffiit pitsaanerpaartaat pissarsiarisimallugu, qungujulluni oqarpoq.

Meeqqanut inersimasunullu

Ernerput Inuk nunani kiattuniittutut qalloriarluni ammut sisooqattaartillugu, angajulleq Qillaq sumo-rtartut atallaavinik nassaarsimavoq. Ateriarlugit nukappiaraq alla ilisarisimanngisarput peqatigalugu paasuusaalerput. Illartarlunilu nuannaarpoq, inersimasunngornissaminullu ikaarsaariarnermini pissusilersortarnera puigorpara, ilaannikkummi naammagittarsinnaanera misilinneqarluartarmat, allaat paasivara angajoqqaap naammagittarsinnaassusia kigutit qaqorsaataattut issinnaasartoq, tassami sinneqalaartuartarami.

Uiga takusinnaanngilara. Avatangiisitsinnik qimerluuilerlunga eqqarsarpunga perusuersartarfimmukarsimasoq. Naamik, trampolininik pisiniarfimmut iserpoq, plastikkimillu qummuattamiitilluni pissigaqattaarluni.

- „Ninnup Pinnguartarfia“ meeqqanut inersimasunullu tulluarpoq. „Tassani ataqatigiinneq ataqatigiinnerlu pilersinneqarsinnaapput eqaarsaarneq qanimut attaveqatigiinnerlu iluaqutigalugit,“ Heidi Tróndheim oqaluttuarpoq.

Uiga takusinnaanngilara. Avatangiisitsinnut qineraluarpara eqqarsarlungalu perusuersartarfimmukarsimassasoq. Naamik, trampolinertarfimmukarsimavoq plastikersuarmullu akimut ersiinnartumut ikeriarluni pisseqattaarluni. Aluu uiga meeqqatut pissusilik.

- „Ninnup Pinnguartarfia“ meeqqanut inersimasunullu tulluartuuvoq. Tassani ataatsimoorneq ataqatigiinnerlu pilersinneqarsinnaapput, timimik aalatitsinikkut qanilaarnermik pilersitsinikkut, Heidi Tróndheim oqaluttuarpoq.

Taassumunnga pinnguarneq inuunermi pingaaruteqarnerpaanut ilaavoq.

- Ilaqutariittut uagutsinnut pingaaruteqarluinnarpoq, ataatsimoorfiummat, nuannersumik unammiuaartoqarsinnaalluni, ataatsimoorluni misigisaqartoqarsinnaammat, tamannalu nuannaarutigineqarluartarpoq, aamma ilisarisimaqatigiinnerulernissamut periarfissaalluarluni, Heidi Tróndheim nassuiaavoq.

Uiga trampolinertarfimmut ingerlaannarlunga ilannguffigiartorpara pinnguarneranilu peqataalerlunga. Naluara qanga kingullermik taama illartigisimanerlunga, allaammi naakkut annialerlunga.

Ingerlaqqilluta arsaannermut nerrivimmi pinnguartarfimmiilerpugut ataatsimoornerpullu unammiuaarluta ingerlateqqillugu. Inuk isertitsigami qungujulallunilu nuannaangaarmat, ippassaq unnukkut nerinissarput sioqqullugu sikutorusulluni qianera nuanniilliuutaaqisoq puigorluinnarpara.

- Manna uagutsinnut iluaqutaasorujussuuvoq, qujamasullunga eqqarsarpunga.

Unamminerup kingorna Heidip ornippaanga aperalungalu marluulluta rutsjebane misilissinnaaneripput. Taassuma tungaanut ingerlanitsinni “kiattup orpippassuatigoorpugut” ingerlanitsinnilu pinnguaat qanoq innersoq oqaluttuaraa.

- Meeqqat aalariaatsiminnik sungiussiniarnerannut iluaqutaassaqaaq, eqqarsarpunga 90 gradillu peqissimallunga orpippassuartigut pisunniarsaralunga. Aap, tamanna timimik sungiusaaneruvoq.

Heidi isigaara ataqqilluinnalerlugulu, nalunngilarami aamma taanna maani eqqiaajumaartoq. Nuannaralugu isigaara.

- Ammarnitsinniilli kiilunik arlalinnik oqinnerulereerpunga, Heidi illarluni oqarpoq.

Naakka ungilarujuttuinnanngorlugit

Ingippugut rutsjebanemilu kiattup orpippassuini ammut sisoornissatsinnut piareerluta. Ammut sisoornitsinni naakka ungilarujuttuinnanngorput. Silaannaap kiinnannut torarnerata qungujulalersippaanga illariarpungalu. Heidi qungujuffigaara, misigisimalerpungalu sisoreernitsinni oqinnerusumik ammanerusumillu attaveqarfigisinnaalerlugu. Nuan!

Angerlarnissamut piffissanngorpoq, Inullu misileqattaakkavut naggaserlugit inimut iserpugut, tamaani arsaaqqanik qorsunnik sungaartunillu ulikkaavippoq, ilavullu nerrivimmi arsaararlutik naggataarlutik.

Arsaaqqanut pissikkatta soorlulusooq naluttarfimmut pissilluta. Inuk taakkununnga morsuppoq kiinaalu mikisoq ammalortoq kisimi takuneqarsinnaalluni. Meeqqat silarsuarmik paasinninnissaminnut pinnguarneq nuannaraat. Eqqarsaatigisarpara ilaannikkut pinnguarnerup nuannisaarnissallu qanoq pingaaruteqartiginerat, nalunaaquttap akunnerini marlussunni pinnguareerluni nuannaarneq isumagissaarnermut iluaqutaasarmat.

Qujanaq, Heidi.