Ilulissani arsaattarfiup qulisanngornissaa siunnersuutaalertoq

Ilulissani arsaattarfik pullattakkamik, kiassartumik, ukioq naallugu atorsinnaasumik qulisanngortinneqartariaqarpoq.

Avannaata Kommuniani borgmesteri, Lars Erik Gabrielsen (S), taama isumaqarpoq. Tamannalu kommunalbestyrelsi juunip 26-ni ataatsimiilerpat aalajangiiffigineqassasoq naatsorsuutigaa.

- Timersortarfinnik amigaateqarpugut, Ilulissani avatangiisitigut periarfissaat assorujussuaq pitsaanngillat. Oqarlutalu sunngiffimmi sammisassaqartoqartariaqartoq, taava imminut assortortumiikkatta avatangiisilunnerput peqqutigalugu, taanna oqarpoq.

Taassuma siunnersuutigilersaagaa tassaavoq "Airdome". Kommunimi atorfilittat pingasut Kalaallit Arsaattartut Kattuffiat, KAK, suleqatigalugu arsaattarfik taamatut suliaq Finlandimut februaarimi alakkarpaat. Alakkaanerlu pilersitsinermik kinguneqartariaqartoq borgmesteri isumaqarpoq. Pullattakkap qanoq akeqarnera oqaatigiumanngilaa, "unamminartutulli" taallugu.

- Akinut tunngasunik paasiniaavugut, uani oqaatiginngikkaluarlugu kukkunersiorneqarpallaalertoortarneq pillugu.

- Akinut tunngasut unamminarmata, neqeroorullu pissarsiarisarput aallaavigissagaanni isiginnaartarfeqarluni akia unamminarmat oqartugut kommunalbestyrelsi apererusullugu periarfississinnaaneraatigut misissussagipput. Tassa Avannaa Development aqqutigalugu sanasinnaagipput.

Avannaa Development A/S tassaavoq kommunip ineriartortitsinermini suliffeqarfiutaa.

Ilulissani arsaaffiup qulisanngortinneqarnissaa kommunip ukiumut missingersuutaani ilaanngilaq.

50 millionit tungaanut akeqarsinnaasut

Sermitsiap Airdomesit qanoq akeqarnerat pillugu KAK attaveqarfigaa. Kattuffiup ineriartortitsinermut suliaqarnermullu pisortaata, Nike Berthelsenip, oqaasii naapertorlugit pullattagartaannaa atortuilu 12 millionit koruunit missaanni akeqarput.

Issittumut tulluartumik toqqavilissaguni, aputinut serminullu aamma illersuusissaguni taava 25 millionit koruunit missaannik akeqalissaaq. Isiginnaartarfilissagunilu 50 millionit koruunit missaannik akeqassangatinneqarluni.

- Airdomesit Finlandimi 50-it missaannik amerlatigisut atugaapput, amerliartuinnarpullu. Ukiut 30-it atasinnaasutut naatsorsuussaapput, Nike Berthelsen oqarpoq.

Saqqummersitsivittut aamma atorusukkaa

Borgmesterip naliliinera naapertorlugu suliniut piviusunngortinneqassappat arsaattarfik timersorfiinnartut atorneqassanngilaq. Taamaammallu suliniummik taassuminnga assut pimoorussilluni naammassineqarsinnaasutullu nalilerlugu oqaatigaa.

- Illorsuaq sorpassuarnut atorluarneqarsinnaavoq. Allaat ima pisariitsigisutut paasivara, aasami peertarsinnaavarput ukiumi ikkuteqqillugu.

- Inuussutissarsiornikkut nittarsaassiviit assigiinngitsut ingerlassinnaaneri, aamma ulluinnarni ingerlatsinermut akilersueqataasussatut takorloorpagut, Lars Erik Gabrielsen oqarpoq.

Takorluukkap piviusunngornissaa suli qulanarpoq. Kommunimummimi qinikkat amerlanerussutillit tamatumunnga isumaqataanissaat pisariaqartinneqarpoq.