Nunatta eqqartuussisuuneqarfiata toqutseriaraluarnermut pinngitsaaliisimanermullu eqqartuussut atortussanngortikkaa

Katsorsarneqartussanngorlugu pineqaatissiineq, toqutseriarsimanermut suliamut naapertuuttoq Nunatta eqqartuussisuuneqarfiani suliamik ingerlatitseqqiinermi nalilerneqarpoq.

Assi: Morrten Okkels

Morten Okkels Morten Okkels Tusagassiortoq

Saqqummersinneqarpoq 10. Juuni 2026 - 15:05

Angummut inuusuttumut toqutseriarsimasutut pinngitsaaliisimasutullu pineqaatissinneqarsimasumut suliaq, Nunatta Eqqartuussisuuneqarfiani maajip 27-anni naammassineqarpoq. Pinerlunnerit Qaqortumi arnamik pinngitsaalilluni atoqateqarnermi ullormi apriilip 17-ianni 2025-mi pisimapput.

Nunatta eqqartuussisuuneqarfiani pineqaatissiissut kisimi eqqartorneqarpoq, pineqartoq pisuunersoq pineqarnani.

PILLAATISSIINERIT ASSIGIINNGISSUTAAT

Katsorsarneqarnissamik pineqaatissiissut aamma tarnimikkut nappaatillit katsorsaaviannut inissinneqarnissamik pineqaatissiissut assigiitsuusut tusaaneqarsinnaapput.

Pineqaatissiissutit assigiinngitsut taakkua marluk pinerlunnianut tarnimikkut nappaatilinnut, nalinginnaasumik pillarneqarnissaminnut naleqqutinngitsunut, pineqaatississutaasarput.

Assigiinngissutaasuni paasissallugu pingaarutilik tassaavoq tarnikkut nappaatillit katsorsarneqarnissaannik pineqaatissiineq tassaammat, pillarneqartup tarnikkut nappaatillit napparsimmavianniit aninissaat ajornannginnerummat, matumani nakorsat naliliinerisigut pineqartoq angerlartinneqarsinnaavoq.

Pineqartoq tarnikkut napparsimasut napparsimmavianiittussanngorlugu pineqaatissinneqarpat, pineqartup iperagaanissaa eqqartuussivimmiit nalilersuuiffigineqaqqaartariaqarpoq.

Pineqaatissiissutigineqartartut taakku pineqaatissiissutinut allanut, soorlu tigummigallagassanngortitsinermut, assersuunneqarsinnaanngillat. Tarnimikkut napparsimasutut nalilerneqanngitsunut, tigummigallagassanngortitsinermik pineqaatissiissut inunnut ulorianarluinnartunut pineqaatissiissutaasarpoq.

Eqqartuussisoqarfiup Kujalliup, angutip 24-nik ukiullip Danmarkimi tarnimikkut nappaatillit napparsimmavianni katsorsarneqarnissaanik pineqaatissippaa. Unnerluussisussaatitaasup pineqaatissiissut sakkortusiniarlugu pinngitsaaliissummik tarnikkut nappaatillit napparsimmaviani katsorsarneqarnissaanik kissaateqarpoq, taamaattumillu suliaq suliareqqitassanngortillugu.

Ussassaarut

Arnamut savimmik saassussisimasutut eqqartuunneqarsimasoq

Angut inuusuttoq arnamut savilersorsimasutut, qimitsisimasutut kinguaassiuutitigullu pinngitsaaliilluni, atoqateqarsimanertut isigineqarsinnaasumik kannguttaatsuliorsimasutut aamma pinngitsaaliilluni atoqateqarniarsimasutut eqqartuunneqarpoq.

Aalakoorluni silaqarsimannginnini pissutigalugu ullaaq taanna pisimasoq eqqaamasaqarfiginagu, angut eqqartuussivimmi oqaluttuarpoq.

Atuaruk aamma

Maanna Blok 5 pillugu suliaq eqqartuussivimmi aalajangiunneqarpoq

Angut taanna isummakkut nappaatigalugu avissimasutut, sakkortuumillu takorluuisartutut nappaateqartoq nakorsanit nalilerneqarpoq. Ilimagineqarporlu ukiuni arlariinni sianissutsimigut nappaateqarsimanissaa, aamma ukiumi 2025-mi pinerluffiusumi.

Angutip nammineq oqaluttuaraa, anersaanik assigiinngitsunik eqqarsartaatsimigut attaveqartarluni anersaapilunnullu akiuunnissaminik suliassaqarluni, angut oqaluttuarpoq.

Pissutsit sakkukillisaataasut

Nunatta eqqartuussisuuneqarfiani eqqartuunneqarnermini angut inuusuttoq nangilluni oqarpoq Aarhus Universitetshospitalimi katsorsarneqarnini ingerlalluarsimassoq. Nakorsaatinik pitsaasunik ullumikkut pilersorneqarluni, eqqissisimanerulersimalluni anersaanillu attaveqarpallaarunnaarsimalluni, ilanngullugit oqaatigaa.

Nunatta Eqqartuussiviata aalajangernermini angut pineqaatissinneqartinnani pinerlussimasutut eqqartuunneqarsimannginnera aamma sianissutsimigut nappaateqarnera sumiiffimmi pisoqarfiusumi paasineqarsimanngimmat katsorsarneqartinnanilu pinerluttuliorsimanera eqqarsaatigalugu sakkortunerusumik pineqaatissiisoqarnissaa akerleraa.

Angutip inuusuttup qanoq sivisutigisumik katsorsarneqarnissaa aalajangerneqanngilaq, taamaattumillu tarnip pissusaanik ilisimasallit naliliinerat aallaavigalugit qaqugu iperagaasinnaanissaa aalajagerneqassaalluni.