Air Greenland: Inissaqartillugu – Københavnimi majuartarfiit bussertarnerillu atorneqassaassapput

Aaqqiissutip tamatuma kingunerisaanik siunissami taamatut pisoqartillugu Nuummiit angalasut ilaat, Københanvimut mikkaangamik tummeqatigut niusarunnaarlutillu bussinik ingerlanneqartarunnaassapput.

Københavnip mittarfissuata "Air Greenlandip matua“ Kalaallit Nunaanniit ilaasunut immikkut ittumik ammaappaa.

- Tamatuma kingunerisaanik taamatut pisoqartillugu angalasut tummeqatigut niusassanatillu busserlutik ingerlanneqartassanngillat, taarsiullugu toqqaannartumik utaqqisarfimmut Air Greenlandip matuatigut immikkut isersinnaalissapput, Air Greenland allappoq.

Air Greenland naapertorlugu taamatut aaqqiineq Nuup Mittarfiata ataasiaannarluni isumannaallisaavikkoornermik peqalernissaata tungaanut atuutissaaq, aamma siunissami  maannamut naleqqiullugu ungasissumi unittarnerit ikinnerulernissaat  tamatuma kingunerissavaa, timmisartortitseqatigiiffik taama allappoq. Tamannalu Kalaallit Nunaanniit Danmarkimut angalasut pitsaanerusumik misigisaqartalernissaannut pingaarutilimmik alloriarnerusoq ilanngullugu allaatigineqarpoq.

Nassatanik assartuineq sukkanerusumik ingerlanneqarsinnaalissanersoq Air Greenlandimi attaveqatigiinnermut pisortap Inga Dóra G. Markussenip neriorsuutigisinnaanngilaa, allalli tamaasa eqqarsaatigalugit periarfissaq nutaaq taanna atorneqarsinnaalerpat Københavnimut tikinnissaq ajornannginnerulissaaq

Pimoorussilluni sulissuteqarnikkut aaqqiissuteqarneq

Isaariaq nutaaq nunanit tamalaaneersut stationsmanageriat Johnny Rasmussenip, timmisartortartoq Michael Madsen qanimut suleqatigalugu ilungersorlutik sulissutigisimagaat Sermitsiamut oqaluttuarpoq.

Air Greenlandimi mittarfimmi pisortaq Johnny Rasmussen oqaluttuarpoq majuartarfiit bussillu angallassinerat pissutigalugu ilaasut ingerlaqqinnissaminnut aqqutissatik angumerinngitsoortaraat:

– Biilinik unittarfik ungasissumiittoq atuisartunut kinguaattoortitsingaatsiartarpoq, ilumoorlunga oqassaguma; atuisut nuanniinngitsumik misigisaqartarput.

Passimik misissuineq avaqqunneqarpoq

Københavnip mittarfissuani ukiuni makkunani timmisartunut nunanit Schengenip avataaniittuneersunut, passinik misissuiffigineqartartunut, terminali allineqarsimasoq, Air Greenland ilisimatitsivoq.

Kalaallit Nunaat Danmarkimut ilaagami passinik misissuisoqaqqaartariaqanngilaq, mittarfilli immikkut ittumik aaqqiissuteqarsimavoq.

Københavnip mittarfissuani tusagassiutilerinermik siunnersorti Rasmus Baad ima oqarpoq:

– Uppernarsaatinik tigusisarfimmi isaariami C28-mi immikkoortumik matumik atuutilersitsivugut, tassani Kalaallit Nunaannit tikittut passimik misissuineq avaqqussinnaavaat toqqaannartumik nassataasivimmut ingerlaqqissinnaallutik. Taamaalillutik ilaasut bussernermut sanilliullugu minutsit 15-20-t sipaarsinnaavaat.