KL

DK

Piviusulersaarut nersualaarneqartoq Nunat Avannarliit Siunnersuisoqatigiivisa Filminut Nersornaasiuttagaannut innersuunneqartoq

Piviusulersaarut “Twice Colonized”, kalaallimik Aaju Peter-imit pingaarnertut inuttaaffigineqarsimasoq, Nunat Avannarliit Siunnersuisoqatigiivisa Filminut Nersornaasiuttagaannut 2024-mut innersuunneqarpoq. Ajugaasup kinaanera oktobarip 22-ani 2024-mi nalunaarutigineqassaaq.

Nunani avannarlerni filmiliarineqartut ilaat „Twice Colonized“ ukioq manna Nunat Avannarliit Siunnersuisoqatigiivisa Filminut Nersornaasiuttagaannut innersuunneqarpoq.
KASSAALUK KRISTENSEN
Digitalimik aaqqissuisoq
Saqqummersinneqarpoq

Piviusulersaarut "Twice colonized", Aaju Piitap pingaarnertut inuttaaffigisaa, filminut nersornaammut innersuunneqaqqippoq. Tamatumuuna Nunat Avannarliit Siunnersuisoqatigiivisa Filminut Nersornaasiuttagaannut.

Piviusulersaarut saqqummersinneqarnerminiilli arlaleriarluni nersornaaserneqarnissamut innersuunneqarpoq, katillugit aqqaneq-marlunnik nersornaaserneqarluni. Ilaatigut Canadami Oscaritut ittumik juunimi 2024-mi. Piviusulersaarut siorna saqqummerpoq.

Nunat Avannarliit Siunnersuisoqatigiivisa 2024-mi filmilimut nersornaasiuttagaanut innersuunneqartup nersorneqarluarsimasup “Twice colonized”-ip, inuit eqqartuussissuserisuat suliniuteqartuallu Aaju Peter, nunat inoqqaavisa pisinnaatitaaffiinik sorsuuteqarnermik aallussisimasoq, oqaluttuaraa. Qaniginerpaasami ilaat alianartumik nalaataqarmat nammineq misigisimasani eqqarsaatigilerpai nunallu inoqqaavisa demokratiskiusumik pisinnaatitaaffii namminersortuunerallu qulakkeerniarlugit inuttut ingerlaarfeqalerpoq.

Nipi pingaaruteqartoq

- Kalaallit Nunaanni siornatigut assingusumik piviusulersaarummik filmiliortoqarnikuunanilu sanaqataaffiginnittoqarnikuunngilaq, sammisaq sammineqartoq nunanilu tamalaani nersorneqarluarsimanera eqqarsaatigalugit, “Twice colonized”-ip innersuunneqarneranut tunngavilersuutini nuna tamakkerlugu naliliisartut ilaatigut allapput.

- Filmiliortup Lin Allunap Aaju Peter-ip inuunera assiliivimmit tigummiakkamit immiuppai, nipilersuutillu tupinnartut nipinik immikkut ittunik pilersitsipput. Issittumi ilaqutariinni anaanaasup asannittup ulluinnarni inuunera eqqissisimanartoq filmimi immiunneqarsimavoq, tamannalu arnap nukittuup, takorluuisinnaasup nukissaqarluartullu inuit pisinnaatitaaffiinik sorsuuteqartup inuuneranik oqimaaqatigiissitsivoq, Nunat Avannarliit Siunnersuisoqatigiivi filmip piviusulersaarutip innersuunneqarnerani ilaatigut allapput.

Ukioq manna Nunat Avannarliit Siunnersuisoqatigiivisa Filminut Nersornaasiuttagaannut innersuunneqartut ukuupput:

  • Danmark: “MIN ARV BOR I DIG” 
  • Finland: “FALLEN LEAVES”
  • Grønland: “TWICE COLONIZED” 
  • Island: “TOUCH“ 
  • Norge: “SEX“
  • Sverige: “CROSSING” 

Ajugaasup kinaanera marlunngornermi oktobarip 22-ani 2024-mi nalunaarutigineqassaaq.

kulturi twice colonized nordisk råds filmpris dokumentarfilm kultur

ATORFIIT Se alle jobs

Powered by Labrador CMS