Qeqqata Kommuniani inuiattut ullorsiorneq puiseqqaanniunnermik aallartissaaq

Inuiattut ullorsiorneq tallimanngornermi juunip 21-anni nuna tamakkerlugu nalliussineqassaaq. Sisimiuni pisarnertut ulloq puiseqqaanniunnermik aallartinneqassaaq.

Nuna tamakkerlugu tallimanngornermi juunip 21-anni inuiattut ullorsiorneq nalliussineqassaaq.

Ulloq 21. juuni, inuiattut ullorsiorneq, nunatsinni illoqarfinni nunaqarfinnilu tamani nalliuttorsiutigineqartarpoq.

Illoqarfiit nunaqarfiillu tamarmik immikkut aaqqissuussaqarput, ilaatigut ullaakkut erinarsoqatigiinnerit, oqalugiarnerit, erfalasumik amusinerit, naalagiarnerit, kaffillernerit aamma aliikkusersuinerit soorlu nipilersortoqartarluni, kalattut qitinnermik takutitsinerit, qaannamik kinngusaarnerit assigisaallu.

Puiseqqaanniunneq

Qeqqata Kommuniani aamma taama pisoqartarpoq, pisarnertut ullaakkut arfineq-pingasunut puiseqqaanniunneq aallartittarpoq. Puisit pisarineqartut pingasut pilariarlugit peqataasunut agguaanneqartarput.

Tamatuma kingorna nalunaaqutaq 9.15 kommunip allaffiata saavanukaasoqartarpoq. Peqataasut amerlasuut kalaallisuuminnik atikkersorsimasut takuneqarsinnaasarlutik. Erfalasorput amuneqassaaq erinarsoqatigiillunilu "Nuna asiilasooq" atorneqassalluni. Borgmester Malik Berthelsen oqalugiassaaq.

Aamma erfalasumaartut siulersortigalugit oqaluffimmut ingerlaaqatigiittoqassaaq.

Naalagiareernerup kingorna umiiartut eqqaassutissaannut kransiliiartoqassaaq. Ullup ilaani aamma iliveqarfimmi kransiliisoqassaaq.

Kaffillerneq

Sisimiut timersortarfiani innuttaasunut aamma kaffillertoqassaaq, tassanilu kalaallit kaagiliullaqqinnerpaamik toqqaasoqassaaq. Nipilersortoqarlunilu qilaatersortoqassaaq.

Sisimiut Katersugaasivia ammassaaq, umiarsualiviullu eqqaani qajartortumik takutitsisoqassalluni.

Kangerlussuaq

Qeqqata Kommuniata paasissutissiinera naapertorlugu Kangerlussuarmi Multihusetimi erfalasorput amuneqassaaq ullaakkorsioqatigiittoqarlunilu. Tamatumalu kingorna oqaluffimmi naalagiartoqassaaq.

Inersimasut meeqqallu aamma arsassapput, tassani avannarliit kujalliillu imminnut unammissallutik. Arsaareernerullu kingorna Multihusetip eqqaani siaasaaqatigiittoqassalluni.

Multihusetimi aamma saammisassaqartitsisoqassaaq.

Kommunip nittartagaani Facebookikkullu quppernerani inuiattut ullorsiornermi kommuninni pilersaarutit malinnaaffigisinnaavatit.

Powered by Labrador CMS