Suliffimmi juulli

Suliffeqarfiit juulli sumiiffinni allanitulli nalliuttorsiutigisarpaat. 

Sulisullumi aamma juulli malugissavaat.

Suliffeqarfippassuit sulisuminnut juullip nalaani nereqatigiissitsillutik, juullimut frukkortarput. Suliffeqarfiit amerlanerpaat – kisianni tamarmiunngitsut – sulisunut juullimi tunissuteqartarput. Tamanna Sermitsiap, sapaassuup tungaanut, tassa juullimut ataatsimuualaarnerit aallartilluarnissaata tungaanut, apersuinerani paasinarsivoq.

Eqqartuussissuserisut juullerpalaartut

Eqqartuussissuserisut suliffeqarfiat Nuummiittoq, Arctic Law Greenland, juulli sutigut tamatigut malugisaraat piginneqataasoq eqqartuussissuserisorlu Britta Keldsen oqaluttuarpoq.

- Arctic Law Greenlandimi juullisiortaqaagut. Allaffitta pinnersarnissaa, qulleeqqat ikinnissaat juullillu ulloriaata igalaaniilernissaa ukiut tamaasa qilanaarisarparput. Ullorissat sungaartut aappaluaartut taarnerani kusanartaqaat ullaakkullu uatsinnut iserluarsaataasarlutik.

- Suleqatigiit tamatta ukiut tamaasa juullip nalaani nereqatigiittarpugut. Tamanna allaffitsinni pinerusarpoq, festernissamut aaqqissuisuullutik akisussaasut paarlakaajaattarlutik.

- Inoqatinut attaveqaatitsigut decembarimi juullimut unammisitsisarpugut, soorluttaaq aamma juullimut inuulluaqqusilaartartugut malinnaasugullu juullisiorluaqqusarlugit.

- Tunissutissat eqqarsaatigalugit ukiut tamaasa juulli sioqqullugu ullormi suliffimmi kingullermi Rotaryp juullimut eqquiniaatitsineranik sammisaqartarpugut, gløggitorluta æbleskivitorlutalu. Taava aamma sulisut tamarmik juullerpaluttunik viinnitalimmik koorinnattarput. Ullormi tassani juullerpalaarnitsinni juullimut allakkat sulisunut tamanut tunngasut nipituumik atuarneqassapput.

- Decembari naggaserlugu ukiortaannginnerani ullormi suliffimmi kingullermi champagnetortarpugut nigaliliaasamillu kaagisorluta, taamaaleriarluta ukiumut nutaamut iserluarnissatsinnik immitsinnut kissaateqatigiittarpugut, Britta Keldsen oqaluttuarpoq.

Umiarsualivimmi juulli

Sikuki Nuuk Harbour A/S, Nuummi Kangerlussuarmilu umiarsualivinnik ingerlatsisoq, aamma juullerpalaarpoq.

- Sulisut ilaqutaallu ualikkut juullerpalaartumik nereqatigaagut – meeqqanut tunissutissannguaqarpoq. Meeqqat anaanamik ataatamilluunniit suleqataat naapillugit nuannaraat, pisortaq John Rasmussen oqarpoq.

Sermitsiap Polar Seafood Greenlandip suleqatiminnut juullimut tunissutaat pillugit aamma aperai.

- Polar Seafood Greenlandip ilumini pisartut, sulisunut tunissutit juullilu pillugu ileqqut kikkunnut tamanut paasissutissiissutiginianngilai, Kalaallit Nunaanni aalisakkanik tunisassiortuni namminersortuni anginerpaaq taama akissuteqarpoq.

Ilulissani juullimut nereqatigiinnerujussuaq

Disko Linemi sulisut aamma tamarmik juullimut pissaqarput.

- Sulisut tamarmik akileraartarnerup annertussusaata killiliussaata iluani juullimut tunissutinnassapput, Disko Line A/S-ip pisortaa Michael Højgaard oqarpoq.

- Ilulissani Qaqortumilu suleqateqarpugut, taamaammat suleqatigiit tamaasa juullimut nereqatigiinnissamut ataatsimoortinnissaat ajornarpoq.

- Ilulissani suleqatigut Hotel Icefjordimeersut juullimut nereqatigiinnermi peqatigaagut. Taava aamma amerlanerpaat nereqatigiinnermut peqataanissaat anguniarlugu angallassinerit aaqqissuuppagut. Angalasoqarnerpaajunngimmat tamanna suliassaq suliarineqarsinnaasimavoq.

- Juullimut nereqatigiinnerup sulisunullu tunissutit saniatigut Ilulissani Lions Clubip juullimut bingortitsinerani pinnatassanik tapersersuivugut, Michael Højgaard nassuiaavoq.

Naalagaaffik juullimut tunissuteqanngitsoq

Suliffeqarfinni amerlasuuni sulisut juullimut tunissutisisut Issittumi Sakkutooqarfimmi sulisut sulisitsisuminnit juullimut tunineqanngillat.

- Issittumi Sakkutooqarfimmi sulininni pingajussaannik juullisiussaanga, juullimut tunissutinnannikuuninnik eqqaamasaqanngilanga. Tamanna Naalagaaffiup malitassaanik peqquteqarpoq, Issittumi Sakkutooqarfimmi tusagassiorfinnut attaveqatigiinnermullu akisussaasoq Camilla Schouw Broholm oqaluttuarpoq.