KL

DK

Ukioq kingulleq pingasoriaannarlutik igaassarsiniartut

Nivi Heilmann Efraimsen ilaquttanilu nunatta pissarititaanik inuussuteqarput. Ukioq kingulleq pingasoriaannarlutik pisiniarfinni igaassarsiniarput, pisiniarfinnilu igaassarsinianngikkaluarlutik nerisassaqarluarput. Taakkuni nerisassat pinngortitamik nammineq pisarisatik nerisaraat. Nivip oqaluttuaa naapertorlugu taamatut inooriaaseqarneq ilaqutariittut pinngortitamullu qanillisitsisarpoq.

Tôrtia Reimer-Johansen
Journalist
Offentliggjort

Ilaqutariit arlallit pisiniarfinni nerisassarsiniarneq sungiusimavaat.

Nivi Heilmann Efraimsenikkulli allatut nerisassarsiniartarput. Taakkumi pinngortitamukarlutik nammineq igaassaminnik pissarsisarput.

- Ukioq kingulleq pingasoriaannarluta igaassarsiniarluta pisiniarpugut - kukkukuut poortat marluk pølsillu, ilaqutariiulluta grillerissamaarluta pisiniaratta, Nivi Heilmann Efraimsen Sermitsiamut oqarpoq.

Taassuma ilaquttanilu ukiup ilai tamaasa piniarfigisarpaat. Piniarianngikkaangamik aalisariartarput.

- Sæsonit tamaasa atorluarniartarpagut, soorlu tuttunniarluta, umimmanniarluta, aqisserniarluta appanniarluta. Aamma ukallit. Soorunami aamma aalisariartarpugut. Nivi oqaluttuarpoq.

Neqit aalisakkallu kisiisa piniariarneq ajorpaat, pinngortitap tungusunnitsui sungarnitsuilu pissarsiariniartarpaat.

- Aamma naasortartarpugut, paarnartarluta pupittarlutalu.

Nivi Heilmann Efraimsenip uia kilisaammi inuttaavoq, Nivillu oqaluttuaraa uimi angalagaangami ilaannikkut raajanik aalisakkanillu angerlaassisartoq.

Qerititsiviit aaqqissuulluakkat

Ilaqutariit tallimanik qerititsiveqarput, pinngortitamiillu angerlaassatik iliorarluartarpaat.

Ima iliorarluagaatigipput allaat unnukkut igaassanik tiguseriaannaasarlutik.

- Suna tamarmik immikkoorpoq inissaminiillunilu, taava unnukkut igaassagut naneriaannaasarpagut.

- Uima aallannginnermini iliorarluartarpai. Taassuma nerisassat peqqissaartumik poortorluartarpai qaqitseriaannanngorluta.

Nivi Heilmann Efraimsenip erseqqissarpaa igaassat akussaannik soorunami pisiniarfimmut pisiniartarlutik, soorlu akussat, qaqorteqqasut, naatsiiat, naatitat allallu igaassanut akorineqarsinnaasut.

Igaassarsiniutissaraluatik orsussamut atortaraat

Umiatsiamut orsussaq piniariarniaraanni aalisariarniaraannilu pinngitsoorneqarsinnaanngilaq, Nivi Heilmann Efraimsenilu isumaqarpoq aningaasat atorluarlugit.

- Aningaasarpassuarnik sipaaruteqartarpugut igaassarsiniannginnikkut. Aningaasat atugassaraluagut orsussamut atortarpagut, taakkulu pisiniarfinni igaassarsiniarnermut atugassaraluatsinniit annikinneerarsuupput.

Pinngortamut nerisassanik aallernermi aningaasanik sipaaruteqartaraluarlutik, pinngortitaq ilaqutariittut qanillisitsivoq, tassani meeqqat pinngortitamut, uumasunut atorluaanermullu ilinniartarlutik.

- Igaassamik qaqitsinngitsooraluaraangattaluunniit qerisut aamma igasarpagut, Nivi Heilmann Efraimsen naggasiivoq.

kultur kulturi

ATORFIIT Se alle jobs

Powered by Labrador CMS