Pride Month: Arfininngorpat nuannannersuaqassaaq – sulili sorsutassanik ulikkaarpoq

- Angutaatitaarama! 

Erni Kristiansen angutinoortuunerminik anaanaminut oqaluttuaqqaarami taama toqqaannartigisumik oqarpoq. 

Pilersaarutaasimanngilaq, asannileqqanermili nalaani eqqarsaatigeqqaarpiarnangu inuttaata oqarnera malillugu oqaannapajunnikuuvoq.

Taassuma inuusunnerugallarami angutinoortunini sianigisimanngilaa.

- Meeraavunga nalullugu anguteqatiminoortoqartoq. Peroriartorninni aatsaat soorlu inuusuttunngorninni misileraanerup nalaani arnaateqakujuttarlunga, sammisaqakujuttarlunga. Angummik ilaqaqqaarnissama tungaanut. Taava taassuma kingorna eqqarsarlunga, immaqa tamanoortuuvunga.

Piffissalli ingerlanerani allatut pisoqarpoq. 

- Ukiut ingerlaneranni malugiartuaarlugu “Okay tamanoortuugunanngilanga, angutinoortuusimassuunga.”

Erni Kristiansen podcastimut immiunniarlugu pisuttuaqatigaarput. Sipineq+-imi suliniutitik, inuit immikkoortitsisarnerat pillugu misigisartakkani, anguteqatiminoortuuninilu pillugu ajattuisartut qanoq ingalassimaniartarnerini oqaloqatiginerani ilaatigut tikippaa. Podcasti tamakkiisoq uani tusarnaaruk.

Erni meeqqat atuarfianni ilinniartitsisutut ilinniarnikuuvoq, Ilinniarfissuarmilu 2010-p nalaani ilinniarnermini aalajangiussaqariasaarpoq.

- Ilinniarfissuarnitta nalaani aalajangerpunga arnereqqinnianngilannga.

Arnereqqinngilatillu?

- Suu!

Peqqissiminngilatit?

- Ilaana, illarluni oqarpoq.

Anguteqatiminoortuunini aallaqqaammut sianigisimanngikkaluarlugu imminerminut nutaajuallaarsimanngitsoq inuttaata oqaluttuaraa. Tasiusami Upernaviup eqqaaniittumi peroriartorpoq, meeqqallu atuarfianni atuarallarami anguteqatiminoortumik ilinniartitsisoqarpoq, angaava anguteqatiminoortuulluni ataataatalu illortaava arnaqatiminoortuulluni.

- Annerusumik uannut ilungersunartuunngilaq. Nalinginnaasuuinnarpoq aappaqarnera, Erni oqaluttuarpoq.

Opskrifteqanngilaq

Inuilli ilaqarput Ernitulli oqitsigisumik qallunaatut oqartarnerattuut “sikaavimmiit anisimanngitsunik”, imaluunniit qanigisaminnut nassuerniarnerminnik ajornartorsiuteqartartunik.

- Anguteqatinoortut allat nalunngisakka ilaquttaminnut oqaraangamik ilai pissangallutik qiallutik pisarsimagamik, uanga pikkunaattuaqqamik atorpara, Erni oqarpoq.

Tapersersorneqarneq, paasineqarneq akuerineqarnerlu qanoq ittuunerluni nassuernermi pingaarutilerujussuusarput. Ilaqarpulli akuersaanngitsunik avatangiisilinnik. - Ilaqarput ilaquttaminninngaanniit akuerineqanngitsut, immaqa aanaakkuminninngaanniit aataakkuminninngaanniit. Taava isertorlutik. Immaqa angajoqqaavisa paasereeraluarlugu aanaa aataakkunnut suli oqarnaveersaartut.

Pineqartunullu taama pisoqartillugu sakkortusarpoq. 

- Ilaasa ernumagisaramikku kammalaatimininngaanniit alarneqassagunik imaluunniit ilaquttaminninngaanniit asasaminninngaanniit qatanngutiminninngaanniit arlaanninngaanniit attavigineqarunnaarnissartik sapiivillugu sapertaramikku. Taava ajorinnginnerusarlugu tamanoortuunertik imaluunniit anguteqatinoortuunertik isertorunikku.

Qanoq ittuunermik avatangiisinut nassuerniaraanni aalajangersimasumik malitassaqanngitsoq Ernip oqaluttuaraa.

- Imatut opskrifteqanngilagut “imatut skaavimmiit anissuutit”. Soqanngilagut. Inummiit inummut, sumiiffimmiit sumiiffimmut ilaquttamiit ilaquttamut assigiinnginnamik.

- Taamaammat nammineq misileragassaavoq. “Inuttununa qanoq inissisimasunga? Ilaquttakka qanoq ippat? Nalunngisakka qanoq ippat? Qanoq ilioruma ajunnginnerua?” Taanna inummiittorujussuuvoq nammineq.

Isatsinneq sorsuutigisallu

Erni maanna peqatigiiffimmut LGBTQIA+-it pisinnaatitaaffiisa pitsanngorsarneqarnissaanik suliaqartumut, Sipineq+-imut ilaasortaavoq. Pisinnaatitaaffinnut taakkununnga sorsuuteqartumut nammineq kajumissutsiminik suleqataanissani pissutissaqarluartoq oqaluttuaraa.

- Kammalaatikka toqqagarivakka, ilaquttama ajorinngilaat, ulluinnara toqqissisimasorujussuuvoq. Nuannarivara. Kisianni soorlu uku nukissaqanngitsutut misigisimasut, imaluunniit ulluinnarni ajunnginnerusumik inuuneqalerusukkaluarlutik taakkua illersorusullugit Sipineq +-imi peqataavunga, Erni oqarpoq.

Anguteqatiminoortuuninili peqqutigalugu ajattorneqarneq misigisareernikuuaa. Ukiualuit matuma siorna Sisimiuniilluni imerniartarfimmiippoq. Tassaniitillutik baarimi nikorfalluni angutip eqqaaniittup aperaa.

- "Homoit?" Angerama isappaanga. Isatsiinnapajullunga. Toqqissisimanarunnaajusalluni. Taava uanga Sisimiuni aneqqinnianngilanga , Erni oqarpoq.

LGBTQIA+-it atugaat immikkoortitaasarnerallu pillugit suli sorsuutissaqarpoq. Aamma inatsisitigut. Sipineq+ Inuit Pisinnaatitaaffii pillugit Siunnersuisoqatigiit Inuillu Pisinnaatitaaffiinut Institutti peqatigalugu nalunaarusiamik saqqummersitseqataanikuuvoq. 

LGBTQIA+-ittaaq kalaallisut taaguutaannik peqalernissaa anguniarlugu suliniuteqarnikuupput angunikuullugulumi. Sulinerli tamaanga killiinnassanngilaq.

Tulliullugu anguniagassatut pilersaarutaat ilaatigut makkuupput: Inunnguuserinngisaminik suiaassusillit nunatsinni hormoninik suliaritissinnaalernissaat anguniarusuppaat. Anguteqatigiillu aappariit meerartaarnerminni ataataaqataasinnaalernissaat anguniarlugu sulissuteqalereerlutik.

Meerartaarusuppoq

Anguteqatigiilli meerartaarnerminni allanut sanilliullugu naligiimmik atugassaqalernissaannik sorsuuteqarniarneq Ernimut aamma attuumassuteqarpoq.

- Siornatigut takorluugarersuaarnikuuara meerartaarnissaq, Erni oqarpoq.

Inatsisilli qiviaraanni piviusut allarluinnaapput. Anguteqatigiit meerartaarunik aappaasoq ataataaqataasinnaanngilaq. Aapparisaa angajoqqaaviussappat Erni inatsisitigut pisinnaatitaaffeqarsinnaanngilaq, meerartaarnermilu sulinngiffeqaqataasinnaanani. Tamanna aatsaat pisinnaavoq Ernip meerartaartik meeravissiartaarisinnaaguniuk. Arnanut aappariinnut periarfissat ajunnginnerupput. Angutimmi arnallu aappariit pisinnaatitaaffiisut arnaqatigiit meerartaarnerminni pisinnaatitaaffeqalereernikuupput.

- Taama nalunartoqartigisoq arlaannik ajutoortoqariataassappat, ataataaqataaneq minnerpaamik inatsisaasariaqaraluarami. Tujorminarunartigisoq ataataaqataagaluarlunga, inatsisitigut ataataaqataanngikkuma susinnaananga. Tujorminaq, Erni nikallungarpasilluni taama oqarpoq.

Anguteqatigiit meerartaarnerminni pisinnaatitaaffiisa naligiinnerunissaat anguniarlugu folketingimi nunarput pillugu ataatsimiititaliaq Sipineq+-imit ataatsimeeqatigisareerpaat. Suliarlu suliarineqarluni aallartissarneqalereerpoq. Qaquguli pisinnaatitaaffiit naligiilissanersut nalunarpoq. Inatsisit taamaanneri Ernip meerartaarnissamik takorluuinera allanngorterujussuarnikuuaat.

- Maannamuugallartoq taanna takorluugaq toqunikuuvoq. Kisianni neriuppunga arlaatigut iluatsitseriasaassappat taanna takorluugaq uummaqqissinnaassasoq.

Qalipaatigissaaqisumik nuannannissarsuaq

Qujanartumilli nuannersorpassuarnik allanik pisoqartarpoq. Angajoqqaat 18-iliisimanngitsunik LGBTQIA+-inik meerallit Sipineq+-imut ilaasortanngortartut Ernip oqaluttuaraa. Nuannersoq alla Nuummi arfininngorpat pissaaq. Tamaanimi Pride Paradeqassagami.

- Assut qilanaarsuaarpugut!

Sipineq+-imi siulersuisut piffissaq kingulleq ulappussimaqaat. Nunattalu iluani avataanilu aningaasaleerusuttunik arlalinnik iluatsitsinikuullutik.

Finlandimi saameq drag king takutitsissaaq, Tasiilamit drag queen takutitsissalluni. Allaat aamma naggueqaterput akilinermi Iqalunneersoq unnuk taanna DJ-ussaaq. Nuannannersuaq ualikkut aallartikkuni unnussuarmut ingerlassaaq.

- Neriuppugut sila suleqataassasoq. Air Greenlandillu maskinai suleqataalluarumaartut, Erni illarlunilu oqaluttuarpoq.

Immikkullu taarusutaminik qilanaarisaqarpoq.

– Immaqa Tasiilaminngaanneersup saamillu, taanna finlandermiup takutitsinissaat dragshowiliornissaat qilanaarersuaarpara!