Amerikamiut aallartitaqarfianiit taperneqarsimanerup aalassatsitsinera kingunerilu KNQK-p ajuusaarutigai

Nuna tamakkerlugu nunallu allat  Avannaata Qimussersua ukkataraat

Maanna siulersuisuunerit ajuusaaruteqarlutik nalunaarput.

- Angalanermut tapiutaasut, toqqaannaq timmisartuutileqatigiiffimmut nakkartinneqarnikuuneranik ilisimatissutigaarput, kattuffik toqqaannaq aningaasanik tigusaqarnikuunatik. Takorluunngisaannarsimavarput suliaq taamatut inerneqassasoq, politikki aamma eqqarsaatigalugu.Suliap taamatut inerneqarnissaa nalusimanngikkaluarutsigu, tapiiffigineqarsimanerput akuersaarsimassanngikkaluarparput, siulersuisuunerit Facebookikkut allapput.

-  Nuummi amerikamiut aallartitaqarfianiit KNQK-p taperneqarnerata aalassatsitsinera kingunerilu ajuusaarutigaagut.

KNQK Facebookikkut ilanngullugu allapput Avannaata Qimussersuanik aaqqissuussiniarnermi ukiuni arlaqalersuni aningaasatigut ilungersorsimallutik. 

-  Inuppassuarnik ilisimaneqareerpoq ukiorpassuarni Avannaata qimussersuup aaqqissuunneqartarneranut atatillugu aningaasat tungaatigut ajornartorsiuteqartarsimasugut, ukiorlu manna aamma taamatut nalaataqarpugut. Ukiut siuliit assigalugit Namminersorlutik Oqartussanut qinnuteqarsimavugut, akineqarnissarpullu pissangatigisimallutigu, piffissarmi imaalereermat.

Taamaattumik amerikamit taperneqarnissaq annaffissaasimavoq:

- Piffissap ingerlanerani siulittaasorput amerikamiut konsulatianiit saaffigineqarpoq, taassumallu paasissutissiissutigivaa amerikamiut Nuummi aallartitaqarfiata, ukioq manna Sisimiuni qimussersuup ingerlanneqarnissaanut tunngatillugu tapiinissamut soqutiginnissinnaasut.

- Pisup ingerlanerani aamma paasitinneqarpugut periarfissaasoq Pete Hegsteh qaaqquneqarsinnaasoq, qaaqquneqassappallu CH47-helikopterit periarfissaalissasut, qimminik, qamutinik ilaasunillu assartuinissamut.Aaqqiissutissaq tamanna nunatsinni piffinni assigiinngitsuni oqilisaataasussaasoq ilisimavarput, tamannami ukiuni kingullerni peqataasartunut ajornartorsiortitsisarsimammat.

KNQK-mit erseqqissaatigineqarpoq ajunngitsumik siunertaqarlutik iliuuseqarsimagaluarlutik, taperneqarnerlu Avannaata Qimussersuata ingerlanneqarnissaanik qulakkeerinninnissaannaasutut isigisimallugu.