Amerikamiut konsulateqarfiata kalaallit partiivi qineqqusaarup nalaani saaffigigai
Amerikamiut konsulateqarfiata kalaallit partiivisa qinigaaffimmi tullermi suut pingaarnersiorneqassanersut tusarusuppaat, Politiken allappoq.
USA-p præsidentiata Donald Trumpip Kalaallit Nunaat Amerikamiut oqartussaaffigilissagaat decembarimiilli arlaleriarluni oqaatigaa.
Foto: Leah Millis/Reuters/Ritzau Scanpix
USA-p Nuummi konsulateqarfiata Kalaallit Nunaanni partiit qinersinissaq sapaatip-akunnialui sioqqullugu ataatsimeeqatiginissaannut qaaqqullugit tamaasa saaffigai.
Politiken allappoq, taakku konsuleqarfimmit qaaqqusissutit takusimavaat.
Aviisi naapertorlugu allakkani allassimavoq Amerikamiut konsulateqarfiata kalaallit partiivisa ”qinersivimmi tulliuttumi suut pingaarnerpaatinniaraat, USA-mut attaveqarneq ilanngullugu” paaserusuppai.
- Konsulateqarfimmut qaaqqorusuppatsigit imaluunniit allaffissinnut pulaarusuppatsigit. Washingtonimi aalajangiisartut Kalaallit Nunaanni politikkikkut pissutsinik sukumiinerusumik paasisaqartinniarlugit partiit politikkikkut ingerlataqartut tamaasa saaffigaavut, Politiken naapertorlugu konsulaqarfimmit qaaqqusissummi allassimavoq.
Qaaqqusissut februaarip 21-ani nassiunneqarpoq kalaallisuunngortinneqarsimalluni, qallunaatuunngortinneqarsimalluni tuluttuunngortinneqarsimallunilu.
Demokraatit siulittaasuata Jens-Frederik Nielsenip Atassutillu siulittaasuata Aqqalu C. Jerimiassenip saaffiginnissut tamanna USA-p qinersinissamut sunniiniarnertut isigaat, Politiken allappoq.
Inatsisartunut marlunngornermi marsip aqqarngani qinersisoqassaaq.
USA-p præsidentiata Donald Trumpip Kalaallit Nunaat Amerikamiut oqartussaaffigilerusukkaat decembarimiilli arlaleriarluni oqaatigaa.
Trumpip siullermeerluni Kongressimi oqalugiarnermini sapaatip-akunnerani kingullermi oqaatigeqqippaa. USA-p nunami nunanilu allani isumannaallisaanissaq eqqarsaatigalugu qeqertaq pisariaqartikkaa præsidenti oqarpoq.
- Isumaqarpunga pissarsiariumaaripput. (Kalaallit Nunaat, aaqq.) Arlaatigut pissarsiariumaarparput, Trump oqalugiarnermini oqarpoq.
Trump ataasinngornerup unnuaani inuit attaveqaqatigiittarfianni Truth Socialimi allappoq, USA-p Kalaallit Nunaat dollarinik milliardilinnik aningaasaliiffiginiarlugu kalaallillu pisuunngortinniarlugit piareersimasoq.
USA-p præsidentiata kalaallit ataqqinagit pissuseqartoq Naalakkersuisut siulittaasuat Múte B. Egede DR-imit apersorneqarluni ulloq taanna oqarpoq.
- Nunarsuarmi pisartut maannakkorpiaq ernummatigingaatsiarpakka. Nunarsuarmi aaqqissuussaaneq assigiinngitsorpassuartigut nalorninartoq, immaqalu USA-mi præsidenti inuit toqqissisimajunnaassutigisaattut pissusilersortoq, DR-imut oqarpoq.
Múte B. Egedep aamma erseqqissaqqippaa Kalaallit Nunaat kalaallinit pigineqartoq.
/ritzau/
