Aningaasat naleerukkiartornerat tupaallannartoq — ilimagisamit qaffasinnerusoq
Kalaallit Nunaanni inuuniarneq 2024-mi akisunerujussuanngorpoq. Aningaasat naleerukkiartornerat 3,6 procentimik qaffariarpoq, tassa Aningaasaqarnermut Siunnersuisoqatigiit septembarimi missingersuutaannit 1,4 procentimik qaffasinnerulluni.
Nerisassanik pisineq 2024-mi akisunerujussuuvoq, tamanna Naatsorsueqqissaartarfiup naatsorsuinerata takutippaa.
Toqqorsivimmiit assi: Leiff Josefsen
Aningaasartuutit ataqatigiissaarnissaat 2024-mi ajornakusoortissimagukku nassuiaatissaqarpoq, Naatsorsueqqissaartarfiup naatsorsuinerata nutaap tamanna takutippaa.
Ingammik nerisassat ineqarnermullu aningaasartuutit qaffakkiartormata atuisunut akit naatsorsorneqarnerat qaffarujussuarpoq.
- Inuussutissat akii 3,6 procentimik qaffassimasut ineqarnermut aningaasartuutit 6,3 procentimik qaffariangaatsiarsimapput, Naatsorsueqqissaartarfik paasissutissiivoq itisiliillunilu:
Takussutissiaq: Naatsorsueqqissaartarfik
- Kiassarnermut aningaasartuutit qaffakkiartornerat kiisalu ineqarnermut akiliutit qaffanneqarnerat ineqarnermut akit qaffakkiartornerannut pissutaanerpaapput, taakkua ilaat 2024-mi februaarimi atuutilersut ilaat 2025-mi januaarip aallaqqaataani qaffanneqarput. Qaffaanerit marluk taakku taamaalillutik qaammatit aqqaneq-marluk ingerlanerini pipput, tamannalu akit ineriartornerannut tamakkiisumut annertusaataavoq.
Aatuisunut akit naatsorsorneqarneranni atuisup agguaqatigiissillugu aningaasartuutigisartagai tunngavigineqartartut Naatsorsueqqissaartarfiup erseqqissarpaa.
- Taamaasilluni nioqqutissaqarfinni ataasiakkaani akit tamakkerlutik allannguutaat akinut naleqqersuummut tamakkiisumut annertunerusumik sunniuteqarsinnaanngillat, soorlu atuisut ataasiakkaat aamma akit allanngornerat allatut misigisinnaangaat, atuisut namminneq qanoq atuisarneri apeqqutaalluni, Naatsorsueqqissaartarfik naatsorsuinermut atatillugu allappoq.
Illumi atortut akii appariartut
Immikkoortoq ataaseq - ineqarnermut atortut aamma angerlarsimaffinnut kiffartuussissutit - kisiartaallutik aningaasat naleerukkiartornerannut 3,1 procentimik appariartitsipput, soorlu pequtinik, atortunik illumilu atortunik pisinermut tunngatillugu.
Takussutissiaq: Naatsorsueqqissaartarfik
Aningaasat naleerukkiartornerat 2024-mi 3,6 procentiusoq aningaasaqarnermut ilisimatuunit ilimagineqartumit qaffasinnerujussuuvoq.
Aningaasaqarnermut Siunnersuisoqatigiit septembarimi 2024-mi ukiup affaanut nalunaarusiaminni aningaasat naleerukkiartornerat 2,2 procentiussasoq ilimagigamikku uniorpaat, tamannalu „akunnattumik“ qaffaanertut taaneqarpoq.
Orsussap akia appasitsiarneqartoq
Aningaasat naleerukkiartornerat 2024-mi piviusunngorpoq, naak Namminersorlutik Oqartussat ingerlatseqatigiiffiutaata KNI A/S-ip ukiut siuliini sinneqartoorutit akit appartinneqarnerisigut atuisartunut iluaqutaanissaat aalajangiunneqarmat ikummatissat akii tamakkiisumik qaffanneqanngikkaluartut. Tamanna KNI-p nukissiuutinut immikkoortortaqarfianut ajortumik sunniuteqarlunilu atuisartunut iluaqutaavoq.
