Aqqalu C. Jerimiassenip Illorsuit ammaqqikkusuppaa - nalorninngilaq

Illorsuit Atassummi ilaasortanit ataasinngornermi tikeraarneqarpoq.

Ammaqqinnissaa siunertaavoq:

- Siunnerfigalutigu ukiamut Inatsisartunut siunnersuuteqarnissatsinnut assigiinngitsunik paasisassanik paasissutissanik atorfisaqartitatsinnik siunnersuut qaqinneqariarpat.

Illorsuit, tassaarsuartoqarnera pissutigalugu 2017-imiilli matuneqartpq, ammaqqinniarlugu siunnersuuteqassamaarpoq.

Taanna isumaqarpoq Illorsuit Nuugaatsiamut sanilliunneqarsinnaanngitsoq, taanna aamma tassaarsuartoqarnera peqqutaalluni matunikuuvoq:

- Nuugaatsiami suna tamarmi aseqqukuuvoq, Illorsuarni illu ataaserluunniit amuneqarnikuunngilaq.

Qaqqap nakkaannissaa aarlerinarluinnarmat tassaarsuartoqarnissaanullu aamma aalerinarmat nunaqarfiit ammaqqinneqarnissaanik Naalakkersuisut itigartitsisuarput. Taamaattumik qanoq ililluni ammaqqinnissaa qulakkeerniarsinnaavaa?

Periarfissat marluk

Sillimaniarneq tikkuarpaa:

- Isumannaallisaanikkut allatut iliuuseqartoqarsinnaavoq. Taanna misissugassaqqippoq, uani Nuugaatsiamut sanilliutissagaanni tassaarsuarsinnaaneranut tunngasut statusi allarluinnaavoq tassani. Tassani illuatungaani qanoq naleqqussassanersugut ammaneqassappat pisortanut akuerineqarsinnaasunik sillimmasiisarnikkut allatigullu isigissagaanni aaqqiisoqarsinnaavoq. Tassami nunaqarfiit uku sinneri assersuutigalugit Qaarsuni Ukkusissanilu aamma tassaarsinnaasutut inissisimapput, kisianni suli ammapput.

Nunaqarfik ammaqqissappat inuiaqatigiinnut aningaasaqarnikkut akisusinnaavoq, tamanna aarleqqutiginngilaa?

Naagga:

- Aalisarneq aallartilluarpat tassani tunisassiorfiat piareersimakannersutut ammaqqinneqarsinnaavoq. Nunaqarfiup uummataa ikinneqaqqippat aningaasarsiorneq aallarteqqissaaq. Illorsuit imartaa alisagaqarfissuulluni tamassuma nalaa, qaleraleqarfissuuvoq. Taakku qiviaannarlugit paasisinnaareerparput aningaasarsiornikkut uterteqqissinnaasagut pissarsiassagut annertunerusinnaapput. 

Peqatigiiffik Illorsuit siorna matuvoq. Taakku nunaqarfiup ammaqqinnissaa sulissutigisareeroaat, politikeriniilli tusaaneqanngillat.

Tusaaniarneqarsimanngitsit, taava Aqqalu C. Jerimiassen qanoq tusaaniarneqassava?

- Uanga inatsisartuni ilaasortaavunga, Inatsisartut akornanni qanoq inatsisartoqatikka taavalu Naalakkersuisut qanimut oqaloqatigisinnaassusaat apeqqutaajumaarpoq. Amerlanerussuseqarneqarsinnaanersorlu tamanna aamma tusarniagassaqqittorujussuuvoq. Taamaattumik toqqaannaavissumik neriorsuutaasinnaanngilaq, kisianni pimoorullugu anguniagaraarput, Aqqalu C. Jerimiassen oqarpoq naggasiillunilu:

- Ammarusupparput, ammarniarparput.