Bankivik Kalaallit Nunaanni isertitaqarnerulersoq
Bankivip Kalaallit Nunaanni immikkoortortaqarfia ukiup siulianut sanilliullugu 2024-mi millionilinnik amerlanerusunik aningaasanik tunissuteqarpoq.
Savalimmiuni aningaaserivik, siornatigut Banknordik-imik taaneqartartoq, Bankivimmik taaguuteqalerpoq. Aningaaserivik Kalaallit Nunaanni immikkoortortami allamik taaguuteqalernissaanut siunnersuutinik 3000-nik tigusaqarsimavoq, ilisimatitsissutigineqarpoq.
Foto: Bankivik
Bankivimmi Kalaallit Nunaanni immikkoortortaqarfimmi ukiumut angusat 2023-mi akileraarutit suli ilanngaatiginagit 38 millionit koruuniniit 2024-mi akileraarutit suli ilanngaatiginagit 67 millionit koruuninut qaffariarsimapput, Savalimmiuni aningaaserivik, akileraarutit suli ilanngaatiginagit katillugit 382 millionit koruuninik angusaqarsimasoq, nalunaarpoq.
- Suliffeqarfiup 2024-mi pitsaasumik ineriartornera sullitat amerlanerunerannik, inissianut taarsigassarsianik taarsigassarsisitsisarnerup annertusineranik, aningaasanik toqqorsisarnerup annertusineranik kiisalu aningaasaliisarnerup annertusineranik tunngaveqarpoq, Bankivik tusagassiuutinut nalunaarummi allappoq.
Turið F. Argep, Bankivimmi pisortaanerup, erniat qaffakkiartornerat, kalaallit aningaasaqarnerannik oqilisaatitsisoq, nuannaarutigaa:
- Erniat appariartornerat ilaqutariinnut ukiuni kingullerni ernianik qaffaaffigineqartartunut aningaasatigut oqilisaataavoq. Nuannaarutigaarput takusinnaallugu sullitatta ataatsimut isigalugit aningaasaqarnerat patajaatsoq, tamannalu aningaaseriviup 2024-mi aningaasatigut annaasaqarpiannginnerani erserpoq. Erniat appariaraluartut sullitatta aningaaserivimmi isertitaminnut ernianik qaffasissunik suli pissarsinissamut periarfissaqarluarput. Kalaallit Nunaanni sumiluunniit najugaqaraluaraanni nittartagarput aqqutigalugu ernianik pitsaasunik ileqqaagassaqartitsisoqarsinnaavoq. Tamanna sullitaqareersunut sullitanullu nutaanut atuuppoq, tamannalu digitalikkut ingerlavoq, taamaalilluni sukkallunilu ajornanngitsuuvoq.
IT-kkut atortut nutaat
Atuisut aningaasaqarnerminnik malinnaalluarsinnaanerat aningaasanullu tunngasunik assigiinngitsorpassuarnik namminneq aaqqiisinnaaniassammata Netbankimi aaqqiissut pitsaanerpaamik sulissutigineqartoq aningaaserivik ilisimatitsivoq.
Ukiumi matumani angusassat ukioq manna angusattulli annertutiginissaat naatsorsuutigineqanngilaq. 2025-mi akileraarutit ilanngaatigereerlugit sinneqartoorutit 210-240 millionit koruunit akornanniissasut aqutsisut naatsorsuutigaat.
Savalimmiuni aningaaseriviit kisitsisit pingaarnerit allat ukuupput:
Akileraarutit suli ilanngaatiginagit sinneqartoorutit: 382 millionit koruunit
Nalikillinnginnermi ingerlatsinermi iluanaarutit: 245 millionit koruunit
Taarsigassarsiat nalikilliartornerat: 1 million koruunit
Aningaasat taarsigassarsiarititaasut: 9,1 milliardit koruunit
Aningaasanik taarsigassarsiat: 2,7 milliarder koruunit
Aningaasat toqqortat: 10 milliardit koruunit
