Borgmesterit ingerlaqqissanersut nalorninarput

Inatsisartunut marsip aqqarngani qinersineq partiinut amerlanerussuteqartunut Siumumut Inuit Ataqatigiinnullu kinguariarfiungaatsiarpoq. 

Partiit Demokraatit Nalerarlu siuariarput, Demokraatillu Jens-Frederik Nielsenimik siuttuuffigineqartut qinersinermi ajugaapput maannalu Naalakkersuisut nutaat isumaqatiginninniutiginissaat siuttuuffigissallugu.

Qanittukkulli qinerseqqissaagut. Apriilip aallaqqaataani kommunimut qinersisoqassaaq – pissanganassaaq nuna tamakkerlugu politikkikkut ingerlaneq kommuninut aamma sunniuteqassanersoq. Taama pisoqassappat nunami borgmesteriusut allamik suliffissarsiortariaqassapput.

Eqqarsaatiginneqqissaarluta Inatsisartunut qinersinermi qinersisartut amerlassusaat kommuninut nuullugit, kommunini ataasiakkaani ilaasortat qanoq agguataarneqassanersut naatsorsorpavut – qinersisartut Inatsisartunullu qinersinerat kommunimut qinersinissamut partiimut tassunga qinersisutut agguataarlugit.

Takussutissaq partiimut qinerneqartumut kisitsisit allanngornagit, partiillu annersaasa borgmesteriuffiit pissarsiaralugit. Taamaalilluni nunami kommunini Naleraq pingasunik borgmestereqalissaaq Demokraatillu marlunnik borgmesteriutitaqalissallutik.

Allatut pisoqarsinnaasoq

Taama pisoqarnissaa ilimanaateqanngilaq, kommuninimi politikki allatut pisarpoq — allanneqarsimasut allanneqarsimanngitsullu.

Siullertut qinersisartut kommunimut qinersinermi Inatsisartunut qinersinermit allaanerusumik taasikulasarput. Najukkami pissutsit minnerunngitsumillu najukkami qinigassanngortittut qinersinermi pingaaruteqarput, qinersisartullu qinigassanngortittut ilisarisimasatik taarusunnerusarpaat. Immaqa sanilitik imaluunniit ilaquttatik tatigisatik. Tamanna maanna kommunimi politikerinut minnerunngitsumillu borgmesteriusunut iluaqutaasinnaavoq – soorunami Kommune Qeqertalik kisimi pinnani, tassanimi maanna borgmesteriusoq Ane Hansen IA-meersoq kommunimut qinigassanngorteqqinnianngilaq.

Aammattaaq partiimit qinigaanerpaasumeersoq pinngitsoorani borgmesterinngorneq ajorpoq. Suleqatigiiliornermi amerlanerussuteqartunik taperserneqartoq borgmesterinngorsinnaavoq, taamaalilluni partiimit amerlanerussuteqartuniit ikinnerussuteqartut suleqatigiilersinnaallutik.

Kalaallit politikkianni tamatumunnga assersuutissarpassuaqarpoq – ilaatigut Avannaata Kommuniani borgmesteri Palle Jerimiassen, kommunimut qinersinermi kingullermi Siumumit qinigassanngortittoq, kommunimili suleqatigiinnissamik isumaqatiginninniarnermi attaviitsutut inissittoq assersuutissaqqippoq. Jerimiassen Inatsisartunut qinersinissaq sioqqutitsiarlugu Demokraatinut ilaasortanngortoq kommunimit amerlanerussuteqartut tulliattut inissisimavoq.

Tamanna eqqarsaatigalugu kommunimut qinersinerup qanoq ingerlanissaa suli pissanganartuuvoq – kommunimilu suleqatigiinnissamik isumaqatigiinniarnerit suli pissanganarnerupput. Apriilip aappaani qinersinerup inernera paasissavarput, borgmesterinngortitsinissamik isumaqatigiinniarnerit sivisusinnaapput. Qinersinermi kingullermi qaammat ataaseq sinnerlugu qaangiummat Palle Jerimiassen Ilulissani borgmesterissatut inissippoq.

Taamaattumik takussutissaq uaniittoq nunatsinni kommuninut borgmesterinngortitsinissamut siulittuutitut takussutissaatut taaneqarsinnaavallaanngilaq, partiilli maannakkut qanoq inissisimanersut takussutissatut isigineqarsinnaavoq. Pissanganartoq suli atuuppoq – soorunamilu kommuninut qinersineq tamatumalu kingorna isumaqatigiinniarnerit Sermitsiami qanimut malinnaaffigissavavut.

Tabeli

Marsip aqqarngani Inatsisartunut qinersinermi partiit kommuninilu qinersinerit isikkuat. 

Kisitsisit ungaluusat iluanniittut kommunimut qinersinermi assigiimmik agguataarneqarpata kommunimi ilaasortaatitaqassasut ilimanaateqarnerat takutippaat. Kisitsisit pigineqartut aallaavigalugit kommunimut ilaasortanngorsinnaasut naatsorsorneqarput, kisitseriaatsimit d’Hondtskemik qinerneqartut agguataarnerannut atorneqartartuniit eqqortiginngilaq.