Tallimanngorneq
19.09.2025
Inatsisartuni
ilaasortat utoqqaanersaattut — ukiut 15-ingajaat ilaasortaasimanngereerlunga qinigaaqqereerlunga uteqqinninni — ulloq
taanna uannut pingaaruteqarluinnarpoq.
Tallimanngorneq
19.09.2025
Inatsisartuni
ilaasortat utoqqaanersaattut — ukiut 15-ingajaat ilaasortaasimanngereerlunga qinigaaqqereerlunga uteqqinninni — ulloq
taanna uannut pingaaruteqarluinnarpoq.
Nalunaaqutaq 07.30 makippunga, uffariarlungalu
assuutissannik atisalersoreerama nuliama biilerluni Nuutoqqami Hans Egedep
illuanukaappaanga.
Per B. Berthelsen tallimanngormat Inatsisartut ataatsimiittarfiannut ingerlaaqataasoq.
Assi: Nammineq pigisaq
Tassani
ileqquusoq malillugu oqaluffimmut ingerlaaqatigiinnginnitsinni kaffisoqatigiippugut
– oqaluffimmiillu Inatsisartut ataatsimiittarfiannut ingerlaaqatigiilluta ingerlaqqilluta,
tassani Naalakkersuisut siulittaasuat ammaanersiorluni oqalugiartussaammat. Ileqqutoqaq
20-riarlunga misilereersimasara aamma sivisuumik – piumassutsinnik
piumassuserinngisannillu qimassimareerlugu misigeqqiligara.
Eqqarsaatit
ingerlarsorput: Sammisassat suut immikkut sammineqassappat? Maannali ulloq persuarsiornartoq
nuannaarutigiinnarniarpara. Sapaatip akunnerata naanerani takkutilersumi Naalakkersuisut
siulittaasuata oqalugiaataa sammissavarput misissoqqissaarlugulu, taavalu
Demokraatinit ammaanersiorluni oqallinnermut oqaaseqartussatta oqaaseqaatissaa
tunniunneqassalluni.
Ulloq
nalliuttorsiorpalaarpoq, minnerunngitsumillu Hans Enoksenip toqukkut qimagunnera
eqqaaniarlugu erseqqissumik oqaaseqartoqartarluni — naalagiaqatigiittoqarnerani
kingusinnerusukkullu ataatsimiittarfimmi.
Ataasinngorneq 22.09.2025
Demokraatit politikimi Inatsisartunilu nutaamik inissisimaffeqalerput. Nunami partiit annersaattut.
Assi: Oscar Scott Carl
Sapaatip akunnerata
naanerani piareersarluta ataatsimiinnerup kingorna ilutsinnilu oqallisereerluta
maanna – ilaasortaatitatta siulittaasuanit – ammaanersiorluni oqalugiaammut
oqaaseqaativut saqqummiunneqassapput. Tamatumuuna nutaamik sungiusimanngisatsinnillu
inissisimaffeqarluta: nunami partiit annersaattut Naalakkersuisunilu
naalakkersuisoqatigiinni siuttuusutut.
Ataaserli
naatsorsuutigisinnaalereerparput: Parti aalajangersimasoq pisunut tamanut
illuatungiliuttutut inissisimassaaq. Taamaattumik partiinit naalakkersuisoqatigilikkatsinnit
qisuariaatit soqutiginarnerussapput, siornatigummi arlalinnut allaanerusunik assigiinngitsunik
oqaaseqartarnikuummata.
Qularnanngitsumik
qanoq iliornerat pillugu ulluni aggersuni tusagassiuutitigut
paasisaqarnerujumaarpugut.
Marlunngorneq 23. 09.2025
Demokraatit Inatsisartuni ilaasortaatitaasa ullaakkut ataatsimiinnerannik
ulloq aallarnerneqarpoq. Tamatuma kingorna Inatsisartut suleriaasiannik
sammisaqassaanga – pingaartumik ataatsimiinnernik aqutsinermut tunngasunik,
tamannami ilaanneeriarlunga siulittaasoqarfimmut ilaasortatut suliassaqarfinnut
ilaammat.
Per Berthelsenip Inatsisartut suleriaasiat misissoqqissaarniarpaa.
Assi: Nammineq pigisaq
Oqaluuserisassat
aamma misissuataarpakka, pingaartumik oqaluuserisassat uku pingasut
sammillugit:
1. Namminersorlutik
Oqartussat atuarfimmut namminersortumut ukiumoortumik tapiissutigisartagaasa unitsinneqarnissaannik
siunnersuut – Kommuneqarfik Sermersuumut nanertuutaaginnartunngortussaq
atuartunullu 200-nit amerlanerusunut inissaqartinneqanngitsunut ilinniartitsisussaqanngitsunullu
ajornartorsiutaalersussaq.
2. Namminersorlutik Oqartussat ingerlatseqatigiiffiisa
Sulisitsisunut ilaasortaajunnaarnissaannik siunnersuut – siulersuisut
sulinerannut piffissaanngitsukkut akuliunnertut aamma inatsimmut tunngaviusumut
naapertuutinngitsutut isumaqarfigisara.
3. Aningaasatigut ajutoorluni sulianik unitsitsinermut nuunnermullu akileraarusiinissaq
– eqqarsaatigilluagaanngitsoq aningaasaleerusuttunut unitsitsisinnaasoq tamannalu
nunamut ajorluinnartumik kinguneqarsinnaavoq.
Pingasunngorneq 24.09.2025
Naalakkersuisut
ualimut ataatsimiinnerup unitsikkallarneqarnissaanik qinnuteqarsimasut, Inatsisartut
siulittaasoqarfianni ilaasortatut ilisimavara. Tamannalu pissalluni ualeru nalunaaqutaq
marlunut Katuami peqataasinnaaniassagatta, Danmarkimi ministeriuneq Mette
Frederiksen oqaluttuarisaanermi taarnerpaat ilaanut ”Spiralilersuisimaneq
pillugu suliamut”, pisortatigoortumik utoqqatserpat.
Ajoraluartumik
tamanna nuanninngitsumik qujanarniarpaluttumillu atornerlunneqareerpoq. Taamaattumik
erseqqissarpara, pineqartoq naapertuilluartumik ataqqinnippaluttumillu —
saammaasseqatigiinnermik kinguneqarsinnaasumik — naggaserneqarnissaa pingaaruteqartoq.
Siulittaasoqarfik
aalajangerpoq ulloq taanna ataatsimiinnissaq tamaat taamaatiinnarniarlugu,
Katuami aaqqissuussineq qanoq sivisutigissanersoq nalunarmat.
Sisamanngorneq 25.09.2025
Siulittaasoqarfiup
ippassaq ataatsimiinnissaq taamaatiinnarniarlugu aalajangiuppaa –
taamaalillunilu aamma apeqqarissaarnissaq taamaatiinnarneqarluni. Aqagu
tallimanngornermi ataatsimiinneq ingerlanneqassaaq, apeqqarissaarnissarli ingerlanneqassanani,
aatsaallu pingasunngorpat tamanna pissalluni.
Demokraatit
Inatsisartuni ilaasortaatitaat ullumikkut ataatsimiipput. Ullumikkut
oqaloqatigiinnerinnaasussatut piffissamullu ulapaarfiusussamut
piareersarnerussasoq naatsorsuutigaara.
Utoqqaanertatut
misilittakkanik periaatsinillu Inatsisartuni ilaasortaatitarpassuarilikkatsinnut ikiorsiisinnaasarnissara qilanaaraara.
Ataatsimiinnerni aqutsisuuinnarnanga aammali oqaluttarfimmit oqallinnerit
sakkortusinerisa nalaani tapersersuisutut inissisimasarsinnaassallunga
naatsorsuutigaara.
