Erik Jensen qinersinerup sakkortuup kingorna siulittaasutut tunuarpoq
Erik Jensen Siumut siulittaasuatut tunuassalluni aalajangerpoq.
Erik Jensen Siumumi siulittaasuujunnaarpoq.
Assi: Oscar Scott Carl
Inatsisartunut ippassaq qinersisoqareersorlu Siumup siulittaasua, Erik Jensen, tunuassalluni aalajangerpoq. Siulersuisuunerit aalajangerneq tusaatissatut tiguaat, Vivian Motzfeldtilu siulittaasussatut toqqarlugu.
Siumut tusagassiorfinnut nalunaaruteqarluni taama allappoq.
Siumut marlunngornermi qinersisoqarmat kinguariarujussuarpoq, Inatsisartuni qulinik ilaasortaatitaqarsimagaluarluni sisamanik ilaasortaatitaqalerami.
Tusagassiorfinnut nalunaarut naapertorlugu Erik Jensen oqarpoq ukiuni ingerlasimasuni
partiip tatiginnissimaneranut annertuumik qujassutissaqarluni, aamma Siumumut
siulittaasuusimaneq, ataatsimoornermillu pilersitsisimaneq pillugu ataqqinaatissatut isigigini. Maannalu isumaqarpoq siulittaasuuffiup allamut tunniunnissaa piffissanngortoq.
- Siulittaasutut
toqqarneqartoq, Vivian Motzfeldt, suliffigiligassamini akisussaaffimmik
annertuumik tunineqarsimasutut misigisimavoq. Suliassaq maniguulluni
tigusimavaa, aamma Siumup nukitunerulernissaa suliassatut isigalugu,
ataatsimoornissaq ilanngullugu, Siumut allappoq.
Partiip erseqqissarpaa Vivian
Motzfeldtip suliassanut qitiusunut ilaatikkaa aningaasarsiornerup patajaatsumik ingerlanissaa, nangittumik ilinniartitaanikkut nukittorsaanissaq,
naligiinnginnerup nangittumik aaqqissuuseqqinnikkut akiorneqarnissaa,
suliffissat pilersinneqarnissaat kiisalu akisussaaffilimmik naalakkersuinikkut
ingerlatsisoqarnissaa.
- Partiip Erik
Jensenip qasusuilluni sulisimaneranut qujassuteqarfigaa, partii allappoq.
