Nuummeersoq
Nivi Rosing 21-nik ukiulik Inatsisartunut qinigassanngorterngaarpoq.
Aatsaat
nuimalinngilaq – ingammik inuusuttut akornanni, taannami inuit
attaveqaqatigiittarfiatigut amerlasuut malinnaaffigivaat.
Nuummeersoq
Nivi Rosing 21-nik ukiulik Inatsisartunut qinigassanngorterngaarpoq.
Aatsaat
nuimalinngilaq – ingammik inuusuttut akornanni, taannami inuit
attaveqaqatigiittarfiatigut amerlasuut malinnaaffigivaat.
Nivi Rosingimi ukiup
ataatsip ingerlanerinnaani Tik Tokimi
13.000-init ikinnerunngitsunit aammalu Instagramimi 3.000-ingajanniit
malinnaavigineqalerpoq.
– Kulturerput samminerusariaqarparput Issittumilu suleqatigiinnerulerluta, Nivi
Rosing, ukiuni arlalinni Canadami inuit kulturiannik oqaatsinillu pillugit
ilinniarsimasoq, oqarpoq.
Vancouverimi Ottawamilu
Inuit pillugit misissuineq
Nivi Rosing, politikerip Nuummilu borgmesteriusimasup Nikolaj Rosingip
ernutaqqiutaa, British Columbiami ilisimatusarfinni assigiinngitsuni marlunni
ilinniarnini naammassiniarlugu aalajangersimavaa. Ilinniarnermini nunap
inoqqaavisa oqaluttuarisaanerat, inuiaqatigiilerineq kulturilu pillugit fagini
ilinniarfigai. Ukiut marluk Vancouver Islandimi najugaqareernermi kingorna
Ottawami Nunavut Sivuniksavut Collegemi Inuit pillugit ilinniarnermut
qinnuteqarpoq, tassanilu immikkoortoq siulleq naammassivaa. Ukioq manna
septembarimi immikkoortup aappaa aallartissavaa, Inatsisartunullu
qinigassanngortinniarluni ilinnianngiffeqarallarniarluni qinnuteqarpoq.
– Inuit Ataqatigiit politikkia pingaartitaallu uanga pingaartitannut
naapertuummata taakkua sinnerlugit qinigassanngortippunga. Meeqqat atuarfiini
kulturi samminerusariaqaripput, Issittumilu Inuit suleqatiginerusariaqarivut,
aamma inuusuttut politikimut akuunerulernissaat pisariaqartinneqartoq
isumaqarama. Maanna aalajangerneqartut tamarmik inuunitsinnut kinguaariinnullu
tulliuttunut sunniuteqarmata, Nivi Rosing oqarpoq, taassuma Canadami
ilinniakkani pissutigalugu Issittumi qanoq imminnut ataqatigiilluinnartiginitsinnik
paasinninnerusimavoq.
– Naggueqatigiit inuiusugut assigiinnik nukittuffeqarlutalu inuuniarnitsinni
assigiimmik unammilligassaqarpugut. Aamma angalaniarnikkut illoqarfiit
nunaqarfiillu inissisimaneri assigiipput, oqaatsivullu assigiingajapput.
Suleqatigiinnerullutalu immitsinnut ilinniarfigigutta annertuumik tamatsinnut
iluaqutaassaaq. Aammattaaq pinngortitaq pisariaqartilluinnarparput,
taamaattumik pinngortitap paarilluarnerunissaa uannut aamma politikikkut
anguniagaavoq, qitornakka aamma aalisartuusinnaaniassammata piniartuusinnaaniassammatalu,
Nivi Rosing oqarpoq.
Oqaatsit inuusuttullu kulturiat pillugit saqqummiisoq
Nivi Rosingip naggueqatigiit inuit inuusuttut kulturiat oqaluttuarisaanerat
pillugit atisat, isikkorissarneq oqaatsillu aqqutigalugit TikTokimi
Instagramimilu saqqummiuttagai nuannarineqarluarput. Assersuutigalugu
inuusuttut Nunavummeersup Kalaallillu Nunaanneersup inuktitut kalaallisullu
assigiinngissutaat pillugit oqaluttuartut 100.000-riarluni takuneqarsimavoq,
videoliarlu Nivi Rosingip annoraamik nittarsaassinera 35.000-eriarluni
takuneqarsimalluni.
Nivi Rosing
nuna tamakkerlugu politikimi nutaajugaluarluni, ukiunilu arlariinni
nunaqavissunut issittumilu sammisaqarfinni peqataasarsimavoq. Unicef Danmarkimi
aamma Naalakkersuisut suleqatigisaanni Nakuusami, Arctic Youth Networkimi
ilaasortaasimavoq kiisalu Torontomi peqatigiiffimmi Indigenous Centre for
Comulative Effectsimi, Canadami nunap inoqqaavisa najugaqarfinni mikinerusuni
avatangiisinut suliniutinik tapersersuisumi, teknikikkut
siunnersortaasimalluni. Inuusuttut allat Alaskameersut, Canadameersut
Kalaallillu Nunaannit peqataaffigisaannik Arctic Communities Youth
Fellowshipimik siorna aamma aaqqissuussivoq.
– Naggueqatigiit inuit tapersersorlugit nuannaraakka, taamaattumik kulturerput
inuunitsinni atukkatsinnik pitsaanerulersitsinissamut atortarparput. Tamanna
sulissutigiuarniarpara.
Nivi
Rosing GUX Nuummi marsip sisamaani qineqqusaarnermi aamma KNR-ip inuusuttunut marsip tallimaani
qineqqusaartitsinerani peqataassaaq.
