Ilinniarfinnik ukioq manna paasititsiniaaneq: Avannaani aallarteriarluni Kujataani naammassineqassasoq

Nunatsinni aqqutissiuisarfik Aqqut ukiut tamaasa sinerissamut angalalluni ilinniartitaaneq pillugu paasititsiniaanernik aaqqissuussisarpoq, taakkulu Nunatsinni illoqarfinni ilinniartoqarfiusuni annerni angalasarlutik. 

Aqqut najoqqutassianik pingaarnernik ikiuisarpoq, allanullu tunngasut tamarmik Ilinniarnertuunngorniarfimmit GUX-imit Majoriamiillu aaqqissuunneqartarlutik.

Angalaqatigiit ukioq manna sapaatip akunnerani 43-mi Ilulissanit aallartissapput (oktobarip 20-anniit 21-annut), tamatumalu kingorna Aasiannut, Sisimiunut, Nuummut naggataatigullu Qaqortumut ingerlaqqissallutik.

Atuartut angajulliit illoqarfimmiullu

Ilinniartitaaneq pillugu paasititsiniaaneq Sisimiuni Nalunnguarfiup Atuarfiata timersortarfiani ingerlanneqartussaavoq. Nukannguaq J. Enoksen, ilinniarnernut Majoriami Sisimiuni siunnersuisartuusoq taama oqaluttuarpoq.

– Illoqarfinnit allanit ilinniarfinnit assigiinngitsunit pulaartoqassaagut, najukkamilu ilinniarfiit suliffeqarfiillu qaaqquneqarsimallutik, soorlu Grønlandsbanken, Masanti, Tusass, KNI A/S, ilinniarfik KTI, Aatsitassarsiornermik Ilinniarfik, DTU il.il. oktobarip 28-anni ullaap tungaani meeqqat atuarfiini angajullerni atuartunut sammisassaqartitsisoqarumaarpoq, ualikkut nal. 14-17 matu illoqarfiup sinneranut ammarneqassalluni. Tassami ilinniartitaaneq pillugu paasititsiniaaneq inuusuttut ilinniartut illoqarfimmiullu, ilisimatusarnermik tunngaveqartumik qaffasinnerusumik ilinniagaqarnermik annerusumik paasisaqarusuttut soraarummeereernerminnilu suliffissaqarsinnaanerminnik paasisaqarusuttut saaffigineqaramik.

Atuartunit soqutiginninnerit

Aasianni paasititsiniaaneq oktobarip 23-anni 24-annilu ingerlanneqassaaq. Majoriami Kommune Qeqertalimmi Suliffissaaleqisunut, Siunnersuinermut Pikkorissaanermullu immikkoortortaqarfimmit Biiti Søholmimit oqaatigineqarpoq, Gammeqarfimmi Majoriamilu atuartut ilaat ilinniarfinnut suliffeqarfinnullu meeqqat atuarfiata kingorna soqutigisaminnut tunngasunik saqqummiinissaat sulissutigineqartoq. Tamatuma saniatigut oktobarip 23-anni tamanut ammasumik oqalugiaateqartoqarumaarpoq GUX-imilu ilinniartunut oktobarip 24-anni oqalugiartoqarumaarluni.

Suliffeqarfiit ilinniarfiillu

Suliffeqarfiit soorlu Asiaq, Air Greenland, Bankivik, Blue Water Shipping, Brugseni, Grønlandsbanken, Pinngortitaleriffik, Royal Arctic Line, Illersornissaqarfik, KNI, Royal Greenlandilu ilinniarfinnit Namminersorlutillu Oqartussani Naalakkersuisoqarfinnit sinniisut saniatigut, ukiut siuliini peqataasarput.

Ilinniarneq pillugu sammisaq uani atuaruk.