Meeqqat atuarfianni atuartut
quleriapajaarlutik maanna misilitsittarput.
Misilitsissutit amerlavallaartut,
ilinniartitsisut kattuffiat IMAK isumaqarpoq, misilitsinnerit
ikilisarneqarnissaat imaluunniit atorunnaarsinneqarluinnarnissaat
qineqqusaartunut oqariartuutigaat.
Meeqqat atuarfianni atuartut
quleriapajaarlutik maanna misilitsittarput.
Misilitsissutit amerlavallaartut,
ilinniartitsisut kattuffiat IMAK isumaqarpoq, misilitsinnerit
ikilisarneqarnissaat imaluunniit atorunnaarsinneqarluinnarnissaat
qineqqusaartunut oqariartuutigaat.
IMAK-ip tunngavissat
iliuusissallu pillugit
partiinut kaammattuutaani atuarneqarsinnaapput.
Meeqqat inuusuttullu karsinut
inissinneqartarnerat qatsullugu, ’inuusuttut tamarmik assigiimmik
pisinnaatitaaffeqartut’ IMAK-ip siulittaasuata Elna Heilmannip siusinnerusukkut
Sermitsiamut oqaatigaa. Amerlanerit ataatsimooqatigiillutik tunniussaqaqataassappata
Inuiaqatigiinni periuseq, inuusuttuunngitsut, allanngortinneqartariaqartoq
taanna isumaqarpoq.
– Meeqqat atuarfiat
ilinniartitaanerlu soraarummeernermik, misilitsinnermik, pisinnaasanik
uppernasaasersuinermik piumasaqaatinillu aalajangersimasunik tunngaveqarput,
taamaalillutalu inuusuttut immikkoortunut aalajangersimasunut
ilioraannavippagut. Taakkunannga aallaaveqanngitsut piginnaasaat allat
arajutsivagut, Elna
Heilmann oqarpoq.
Atuartut agguataarneri
IMAK naapertorlugu misilitsinnerit
amerlasuut meeqqat mikisuuneranniilli immikkoortiterneqartarput. Nunani
amerlasuuni misilitsinnerit atorunnaarsinniarlugit maanna misileraasoqarpoq.
Assersuutigalugu Norgemi Finlandimilu atuartut atuarnerup ingerlanerani
sisamariaannarlutik misilitsittarput. Kalaallit Nunaanni aamma
taamaaliortoqartariaqartoq IMAK isumaqarpoq.
”Atuartunut ullumikkut misilitseriaaseq naalleraanerugami periarfissiinani.
Meeqqat siunissami suleqataassappata killormoortariaqarpoq”, Inuusuttut
amerlasuut 16-it 29-llu akornanni ukiullit suliffeqanngitsut
ilinniagaqanngitsullu innersuussutigalugit IMAK allappoq.
Atuarfimmi aqutsisut ilinniartitsisullu
ilinniartitsinerup pitsaasuunissaa qulakkeerniarlugu misilitsinnerit atornagit
aaqqissuussaanerusumik nalilersueriaaseqartariaqarput, taamaalillunilu
angajoqqaat meeqqamik atuarfimmi qanoq angusaqartiginerannik piviusunik
paasisaqarsinnaallutik.
Meeqqat 1. klassimi atuartut,
atuartitsissutit qulit sinnerlugit atuartinneqartartut sapaatillu akunneranut
nalunaaquttap akunneri 24-26-ni atuartartut piumasaqarfigivallaarneqartut IMAK
aamma isumaqarpoq.
”Nunatsinni politikkerit Meeqqat Atuarfiini
sulisutik atuartullu attanneqarsinnaasumik illersortariaqalerpaat!”, IMAK allappoq, atuartorpassuillu
ilinniartitsisullu illut aserfallassimaqisut pissutigalugit anerniluutit,
astma, amikkut naajorarnerit, ungillerinerit, isikkut qanikkullu panertoornerit atugarigaat
ilanngullugu tikkuarpaat.”
Taamaattumik nunatsinni politikerit allallu attuumassuteqartutmeeqqat
atuarfiisa piaartumik nutarterneqarnissaat suleqatigiissutigisariaqarpaat.”
Angajoqqaat peqataanerat atuartullu
immikkut pisariaqartitallit
IMAK naapertorlugu angajoqqaat peqataatinneqarnissaannut pitsanngorsarlunilu
nukittorsartariaqarpoq, immaqa nuna tamakkerlugu angajoqqaat
siunnersuisoqatigiivinik pilersitsinikkut.
Meeqqat immikkut pisariaqartitsisut atugaat amma misissorneqartariaqarput.
Sipaarniarneq pissutigalugu atuarfiit amerlavallaat meqqat specialklassinut
inissisimavaat.
”Meeqqat pisariaqartitsisut amerliortorput.
Taamaattumik immikkut pisariaqartitsisunut atuarfimmik pilersitsisoqarsinnaanera soqutigineqarpoq.
Specialskolemik pilersitsisoqarpat tassani atuartussat pisariaqartitaat
annertunerusoq tunniunneqarsinnaalissaaq. Taamaalilluni Specialskolemi atuartut
ineriartornerat pitsaanerulissaaq” IMAK allappoq, neriuutigalugulu suliniutinut meeqqat atuarfianni
ilinniartitaanermik siuarsaasunut tapersersuinissamut politikikkut
piumassuseqartoqarlunilu aningaasaliissutit amerlineqassasut.
”Atuarfinni pisariaqartinneqartoq tassaavoq atuarfiit, ilinniartitsisut,
angajoqqaat atuartullu suliniutaasa ineriartortikkusutaasalu politikkerinit tapersersorneqarnissaat
inissaqartinneqarnissaallu. Tamannalu pimoorunneqartariaqalerpoq.”
