Immikkut ilisimasallit: Naalakkersuisut eqqissiimisoqarnissaa kissaatigisimassavaat
Upernaakkut ataatsimiittoqassanngilaq qaammatillu tallimat qaangiuppata ukiaanerani ataatsimiittoqassalluni. Naalakkersuisut nunani eqqissiimisoqarnissaa kissaatigaat tusagassiortorpassuillu akuttortikkusullugit, immikkut ilisimasalik naliliivoq. Inatsisartuni ataatsimiititaliat ingerlammata politikikkut sulineq ingerlasoq taassuma aamma tikkuarpaa
Naalakkersuisut eqqissisoqarnissaanik kissaateqarsimanissaat, ilaasortallu tusagassiortorpassuarnit apersorniarneqartarnerat pinaveersaartissimassagaat Ilinniarnertuunngorniarfimmi inuiaqatigiilerinermik ilisimatusartup soraarnerup Birger Poppelip nalilerpaa.
Assi: Leiff Josefsen
2025-mi
qaammatit pingasut siulliit pisoqarfiungaatsiarput. Immaqa ukiuni kingullerni
aatsaat taama pisoqartigaluni – minnerunngitsumik qinikkanut, taakkumi
Inatsisartunut kommuninullu qinersisoqarmat nunanit allanit
malinnaaffigineqangaatsiarput. Taamaattumik innuttaasut amerlanersaasa aamma
politikerit eqqissisimanissaat kissaatigaat.
Qanorli
sivisutigisumik eqqissisimasoqassagami? Isummat assigiinngillat. Inatsisartut
sooq upernaakkut immikkut ittumik ataatsimiigiaqquneqannginnersut ilaasa
tupigusuutigaat, ilaasortanngortulli ukiakkut aatsaat
ataatsimiittussanngorlutik – tassa tallimanngornermi septembarip 19-iani –
qaammatit tallimangajaat qaangiuppata.
Nukinginnartunik suliaqartoqassanngitsoq
Naalakkersuisut
suliassat nukinginnarsinnaasut suliariniarlugit upernaaru immikkut ittumik
ataatsimiinnissamut aggersaanissamik aporfissaqanngitsut Inatsisartut
inatsisilerinermut pisortaat Kent Fridberg oqarpoq.
”Maannakkulli
suliassanik nukinginnartunik, Inatsisartut pilersinneqaqqammernerannit immikkut
ittumik ataatsimiinnermik pisariaqartitsiffiusinnaasunik, peqanngilagut.
Inatsisartut Siulittaasuat Naalakkersuisut Siulittaasuannit tamanna pillugu
qinnuteqaammik tigusisimanngilaq,” Kent Fridberg Sermitsiamut akissuteqarluni
allappoq. Inatsisinik suliaqarnissaq piareersarluarneqartariaqartoq
Naalakkersuisut
Inatsisartunut qinersisoqareerpat inatsisissatut siunnersuutit sorliit
Inatsisartunut saqqummiunneqassanersut qanorlu imaqassanersut
aalajangertussaavaat.
Naalakkersuisullu aalajangiinerat naalakkersuisoqarfiup
qinersinissaq sioqqullugu inatsisissatut siunnersuutaasa suliarisimasaasa
suliarilersimasalluunniit nutarterneqarnissaata kingunerisinnaavaa – soorlu
aamma inatsisissatut siunnersuutinik nutaanik tamanik suliaqartoqartariaqartoq.
Kent Fridberg naapertorlugu tamanna qaammatini arlalinni
suliarineqartariaqarpoq. Suliarineqarnerannullu inatsisissatut siunnersuutit
sapaatit akunnerini sisamani tamanut tusarniaassutigineqartussaaneranut
ilaavoq, taamaattumillu ataatsimiinnerup ukiaru aatsaat pinissaanut
pissutaasinnaalluni.
Inatsisartut
nakkutiginnittut
Naalakkersuisut
amerlanerussuteqarluaramik qanorluunniit aalajangiisinnaallutillu inatsisitigut
tunngavissaqarluarlutik isumaqarunik aningaasanut inatsisip tulliata
akuersissutigineqarnissaa tikillugu taamaaliorsinnaasut Dansk Institut for
Internationale Studierimi (DIIS-imi) ilisimatusartuuneq Ulrik Pram Gad oqarpoq.
–
Inatsisartulli allamik aamma pisussaaffeqarput, tassa Naalakkersuisut
toqqaannarnagit inatsisiliornissaallu kisiisa pinnagit allamik aamma
suliassaqarlutik. Naalakkersuisut suliaminnik eqqortumik suliaqarnersut
nakkutigisariaqarpaat. Ataatsimiinneqanngikkaluarlutik taamaaliorsinnaapput.
Ataatsimiititaliaqarpormi, ataatsimiititaliallu taakkua assersuutigalugu
naalakkersuisut siunersiornissamik qaaqqusinnaavaat. Tamannali tamanut
ammasumik ataatsimiittarfimmi pineq ajorpoq, aamma apeqquteqaat tunngavigalugu
oqallinnissamut siunnersuuteqartoqarsinnaanngilaq, tamannalu Naalakkersuisunut
ilaasortat politikkikkut aalajangiinernut akisussaatinniarlugit periuseq
allaavoq. Kisianni naggataatigut Inatsisartuni amerlanerussuteqartut
aalajangertarpaat ukiakkut ataatsimiinnissamut qanoq sivisutigisumik
utaqqisoqarsinnaanersoq.
Eqqissisimasumik
sulinissaq pisariaqartoq
Birger
Poppel, Ilinniarnertuunngorniarfimmi inuiaqatigiilerinermik ilisimatusartoq
soraarneq, Ulrik Pram Gadimut isumaqataavoq. Tassa Inatsisartut sulinerat
uninnganani ataatsimiititaliat pilersinneqarnikuummata sulineq ingerlasoq,
piffissamili matumani tamanut ammasumik sulisoqarani.
–
Takorloorsinnaavara Naalakkersuisut eqqissinermik pilersitsiniarlutik
kissaateqartoqarsimanera, taamaaliornermikkullu ataatsimiinnermi ilaasortat
tusagassiortunik nunanit tamalaaneersunit saaffigineqaqattaarnissaat
pinngitsoortinniarneqarluni. Tamatuma saniatigut partiit sisamat
Naalakkersuisuniittut naalakkersuisooqatigiinnissamut tunngavissaq
erseqqinnerusumik aalajangersartariaqassavaat, tamannalu maanna
piffissaqarfigalugu, Birger Poppel oqarpoq.
Ukiaanerani ataatsimiinneq tallimanngornermi 2025-mi septembarip 19-iani
aallartissaaq. Oqaluuserisassanngortitsinissamik siunnersuutinik
tunniussinissamik tallimanngornermi augustip 15-iani killeqarpoq.
