Kinap soqutigisani Trumpip akitsuutinik qaffaanissaanut suna tamaat atorlugu illersorniarai

USA-p Kinamiut nioqqutissaannut akitsuutinik eqqussuinini pimooruppagu, „nunat taakku marluk akornanni ikiaroornartunik nakkutilliineq pillugu oqaloqatigiinneq“ sunnerneqarujussuarsinnaavoq.

Kinap nunanut allanut ministeriata oqaaseqartartua Lin Jian tallimanngormat ulluinnarni tusagassiortunik katersortitsinermi taama oqarpoq.

Kinap soqutigisani illersorniarlugit „pisariaqartut tamaasa iliuuseqarfigiumaarai“ Kinamiut nunanut allanut ministereqarfiat oqartoq, Reuters allappoq.

USA-p præsidentiata Donald Trumpip akitsuutit pillugit peqqussut februaarip aallartinnerani atsiorpaa.

Taamaaliornikkiut Mexicomiit Canadamiillu nioqqutissat tamarmik 25 procentimik akitsuuserneqarput, Kinamiillu nioqqutissat 10 procentimik akitsuusersorneqartalerlutik.

Tamanna kingorna kinguartinneqarpoq.

Trumpilli Mexicomut Canadamullu akitsuutit marsip sisamaaniit atuutilissasut kingullermik sisamanngormat nalunaarutigaa. Taamatuttaaq Kinamiut nioqqutissaannut 10 procentimik akitsuut atuutilissaaq.

Trump naapertorlugu Mexicop Canadallu killeqarfinnik nakkutilliinerulersimannginnamik aamma Kinap ikiaroornartumik ulorianartumik Fentanylimik USA-mut avammut tuniniaanini unitsisimanngimmagu taama pisoqarsimavoq.

USA-p "fentanyl pillugu suliaq atorlugu akiitsuusersuiniartoq pinngitsaaliillunilu akiliisitsiniartoq" Kinamiit Lin Jian tallimanngormat tusagassiuutinut oqarpoq.

- Tamanna ikiaroornartunik nakkutilliinermut tunngatillugu illuatungeriit taakku marluk oqaloqatigiinnerannut suleqatigiinnerannullu sunniuteqangaarpoq, tatisivoq navianartorsiortitsillunilu, oqaaseqartartoq oqarpoq.

/ritzau/