KNQK-p ataatsimeersuarnera: Aajuku siulersuisuunerit nutaat
Mikkel Jeremiassen siulittaasutut qinigaaqqippoq. Aatsaavissuaq arnanik taama amerlatigisunik siulersuisuunerni ilaasortaqalerpoq, arnammi pingasut ilaasortanngorput.
Saamerlermiit: Hans Jørgen Lukassen, Amos Pjetturson, Mati Jensen, Mikkel Jeremiassen, Paninguak´Kruse Rafaelsen, Susanne Berthelsen kiisalu Hansigne Broberg.
Assi: Tôrtia Reimer-Johansen
Ullut pingasut pikkunakullaat ataatsimeersuarfioreersut, ileqquusumik ataatsimeersuarneq naammassivoq.
Ataatsimeersuarneq ataasinngornermi marsip ulluisa 24-anni nal. 13.00 aallartippoq, tassani amerlanerussuteqartut ataatsimeersuarneq matoqqassasoq taasissutigaat. Siulersuisuunerit ataatsimeersuarneq matoqqasussasoq innersuussutigisimavaat, nunarsuarmit ukkatarineqarnerup nalaani eqqissillutik ataatsimeersuarusukkamik.
Ataatsimeersuarnermi matoqqasumi USA initusimavoq. Ataatsimeersuarnerlu marlunngornerup ualigaa tamanut ammarneqarpoq, akunnernilu 18-ini uniffeqanngiusattumik ingerlalluni. Pingasunngornerup unnuaani nal. 03.00 naammassigallarput, peqataasut qasulluinnalermata. Ataatsimeersuarneq sisamanngornermi marsip 27-ani ullaakkut qulingiluanut nangeqqinneqarpoq.
Mikkel Jeremiassen siulittaasutut qinigaaqqittoq
Ataatsimeersuarnerup naammassinngilaattaa pissanganaqisumik siulittaasumik siulersuisuunernillu qinersisoqarpoq. Ilaasortat pingasuusut Mikkel Jeremiassen sassaqqinnissaanik innersuuppaat. 15-inik taaguunneqarami siulittaasutut qinigaavoq. Siulittaasussatut sassartoq Paninguak´Kruse Rafaelsen 13-inik taaguunneqarpoq, Susanne Berthelsenilu pingasunik.
Siulersuisuunerit imannak inerneqarput:
• Mikkel Jeremiassen (siulittaasoq)
• Paninguak’ Kruse Rafaelsen (siulittaasup tullia)
• Hansigne Broberg (ilaasortaq)
• Mati Jensen (ilaasortaq)
• Amos Pjetturson (ilaasortaq)
• Hans Jørgen Lukassen (allattaaneq)
• Susanne Berthelsen (aningaaserisoq)
Mikkel Jeremiassenip oqaasii naapertorlugit aatsaat taama arnat siulersuisuni ilaasortat amerlatigipput.
Siulittaasoq: - Tatigineqarnertut isigaara
Siulittaasunngoqqittoq Mikkel Jeremiassen killitsissimaarpoq:
- Tatigineqarnertut isigaara. Ilaasortat naatsorsuutigisinnaavaat maniguullunga tunniusimallungalu sulissasunga, taanna qinigaaqqammerluni oqarpoq.
