KNR-imi nutaarsiassaqartitsivimmi sulisut sulinertik unitsippaat

KNR-imi tusagassiortut nutaarsiassaqartitsivimmi sulisut pisortaminnut ilisimatitsipput sisamanngornermi februaarip 27-ani suliartorniaratik.

AAMMA ATUARUK

KNR’s direktør fritaget for tjeneste

- KNR-imi nutaarsiassaqartitsivimmi sulisut 16-iusugut, februaarip 27-ani suliatsinnik unitsitsilluta suliartussanata aalajangerpugut, sulisut tusagassiuutinut nalunaarummi allapput.

Sulisut ilungersorluinnartut

KNR-imi sulisut ukiuni kingullerni arlalinngulersuni tatisimaneqangaatsiarput. Ukiortaarli aallarnerfigalugu sulisut suli ilungersornerulersimapput, sulisorineqartut suli arlallit soraartarlutik imaluunniit napparsimalluni sulinngiffeqartarlutik, tamatumalu kingunerisaanik sulisut sinnerittut suli annertunerusumik suliaqartinneqartarlutik, tusagassiuutinut nalunaarummi allassimavoq.

- Sulisut sisamat maanna sulisut aqqaneq-marluk suliassarisaannik suliaqartinneqarput, sulisoqatigiit nassuiaapput.

- Tamanna nutaarsiassaqartitsiviup sinneranut sunniuteqarpoq, tassani nittartakkami aaqqissuisoqarfik aamma Qanorooq sulisussaaleqilermata. Tamanna isumaqarpoq suliassagut akisussaassuseqarluta suliarisinnaanngikkigut. Taamaattumillu nutaarsiassaqartitsivimmi suliatta pitsaassusaannut, sulisullu peqqissusaannut annertuumik aamma sunniuteqarpoq. Sulinissamut tatineqangaarpugut, oqaatigineqarpoq.

Aaqqiissutissat ujartorneqartut

KNR-ip nutaarsiassaqartitsiviani tusagassiortut allakkatigut nassuiaapput qaammammi matumani siusinnerusukkut Inatsisartunut qinersisoqalernerani sulisukinnerugaluarluni nutaarsiassiisinnaaneq pillugu aaqqiissutissanik ujartuisimallutik.

Ilaatigut sulisut siunnersuutigaat kalaallisut qallunaatullu radioaviisi marsip aqqarnata tungaanut aallakaatinneqassanngikkallartoq, tusagassiortut sulisorineqartut nittartakkami nutaarsiassanik Qanoruumilu nutaarsiassanik aallakaatitassiornermut piffissami pineqartumi sulisorineqarsinnaaqqullugit.

Nutaarsiassaqartitsivimmi sulisut nassuiaanerat naapertorlugu KNR-imi pisortaqatigiinnit tamanna kissaatigineqarsimanngilaq. Siunnersuutigineqartunulli ilaasimavoq qallunaatut radioaviisi piffissami aalajangersimasumi aallakaatinneqassanngikkallartoq, tamannali qanoq iliorneqassanersoq oqaatigineqarsimanani:

- Aqutsisunit qallunaatut radioaviisi piffissami tamatumani aallakaatinneqanngikkallarnissaanut peqataasinnaanerarput taamaalillutillu kalaallisuinnaq aallakaatitsisoqassalluni. Isumaqarpugut tamanna kukkunerussasoq avissaartuutsitsisoqarsinnaallunilu, kiisalu kalaallinik suleqatitsinnik annertunerusumik suliakkiiginnassasoq – piffissamili sivikitsumi taamaaliortoqarnissaa ammaffigigaluarparput. Tamannali pissappat akisussaaffiit agguataarneqarnerannut tunngatillugu pissutsit atorneqartussat aaqqinneqaqqaartariaqarput aaqqiissutissap tamatuma piviusunngortinnissaanut piareersimajumalluta.

- Pisortalli tamatuminnga oqaloqatigiumanngilaatigut, naak arlaleriarluta oqaloqatiginiartarsimagaluaripput. Aamma qallunaatut radioaviisip qanoq matugallarneqarnissaanut iliuuseqartoqarsimanngilaq, sulisut allapput.

Atugassatigut ilungersunartumiittut

Sermitsiap siusinnerusukkut allaaserisareerpaa KNR-imi sulisut atugarisamikkut ilungersunartumiinnerat. Tusagassiortut arlallit soraartarput, aammalu napparsimallutik sulinngiffeqartariaqartarlutik.

KNR-imi nutaarsiassaqartitsivimmi sulisut oqaatigaat tusagassiortut nalunngikkaat qineqqusaarnermi sulinermik unitsitsinissaq aalajangiinerusoq ilungersunartoq:

- Sulinermik unitsitsisariaqarluinnarpugut. Eqqumaffigilluinnarparput piffissami ajornerpaami suliunnaarnissaq aalajangerneqartoq. Inatsisartunut marsip aqqarngani kommuninullu apriilip aallaqqaataani qinersisoqassaaq – tusagassiuutitullu innuttaasunik kiffartuussisutut tamanna nutaarsiassiiffiginissaanut pisussaaffeqarpugut. Qinersinermit nutaarsiassiinissarput pingaartilluinnarparput. Kisianni illersorneqarsinnaasariaqarpoq. Piffissami matumani taamaanngilaq, nalunaarutigineqarpoq.

Ukiumi kingullermiinnaq nutaarsiassaqartitsivimmi pisortaq angerlartinneqarpoq, sulisoqarnermut pisortaq angerlartinneqarluni kiisalu pisortaq sulinermit unitsinneqarlunilu. Radiomi pisortaq aamma nammineq soraarpoq, kiisalu aaqqissuisut tusagassiortullu arlallit nutaarsiassaqartitsivimmit soraassallutik aamma aalajangertarsimallutik.

KNR-imi pisortaaneq Annga Lynge tallimanngornermi januaarip 31-ani siulersuisunit suliunnaarsinneqarmat Bjørk Lange Olsen pisortaagallartutut atorfinitsinneqarpoq. KNR-imi pisortassamik nutaamik juunip aallaqqaataani atorfinittussamik ujaasineq aallartissimavoq.

KNR-imi aqutsisut oqaaseqartinniarlugit Sermitsiaq saaffiginnissimagaluarpoq.