KNR-ip politikikkut naliliisartutut atugaa  naalakkersuisumut sulisuusoq

Politikeriusimasoq Ineqi Kielsen Naalakkersuisunut siunnersortiusimavoq, tamatumalu saniatigut KNR-imi politikkikkut naliliisartutut DR-imilu Kalaallit Nunaat pillugu ilisimasalittut paasissutissiisartutut saqqummertarluni. Qallunaat tusagassiorfiata Frihedsbrevetip allaaseraa.

Taamaattumik tusagassiuutit immikkut ilisimasalittut oqaaseqartartunut piumasaqaatigisartagaat, tassa arlaannaanulluunniit attumassuteqannginnissaq, eqqortinngilaa.

Ineqi Kielsen februaarip tungaanut naalakkersuisumut Vivian Motzfeldtimut (S) siunnersortaasimalluni oqarpoq, qangali aallartissimanngitsoq allassimanngilaq.

KNR-ip DR-illu siunnersortitut sulinera ilisimasimagaat Kielsen aamma oqarpoq. Tusagassiorfiilli taakkua Frihedsbrevetimut tamanna ilumuunnginnerarpaat.

DR-ip allaaserisat naqqikkai

Sermitsiap KNR oqaaseqartinniarlugu saaffigaa, nutaarsiassaqartitsivimmilu pisortamit Irene Jeppsonimit naatsumik akineqarpoq.

- Ukioq manna januaarip aallaqqaataani KNR-imi sulilerpunga, taamaattumik atorfininnissara sioqqullugu qanoq pisoqartarsimanersoq ilisimasaqarfiginngilara. Atortarunnaarnikuuarput, oqarpoq.

Frihedsbrevetimi allaaserisaq naapertorlugu DR-ip quppernermini kukkussutit piviusullu ima allaaserai:

– DR-ip tamanna ilisimasimasuuguniuk erseqqissumik nalunaarutigisimassagaluarparput, imaluunniit Ineqi Kielsenip naliliisartutut atorsimassanngikkaluarparput.

DR-ip nittartakkamini allaaserisat arlallit iluarsivai, taamaalilluni marlunnik inissisimaffeqarsimanera maanna atuarneqarsinnaalerpoq. KNR assingusumik sooq iliuuseqarsimannginnersoq Sermitsiap aamma apeqqutigaa. KNR-imit akissutisinngilagut.