QEQQATA KOMMUNIA
Kommuni autismeqartunut atuarfimmik ammaavoq
Meeqqat autismeqartut assigisaannillu unammilligassaqartut Sisimiuni septembarip aallaqqaataaniit nutaamik atuarfittaassapput. Qeqqata Kommunia ulloq naallugu atuartitsinermik atuartunut autismeqartunut immikkut ittumik neqerooruteqarluni ammassaaq, eqqissisimanerusumik naleqqussarneqarnerusumillu atuartitsinermik neqerooruteqarluni.
Autismeqartunut ulloq naallugu atuarfik septembarip aallaqqaataani ammassaaq.
Foto: Tôrtia Reimer-Johansen
Meeqqat atuarfiani atuartut autismemik assigusunilluunniit innarluuteqartunut ulloq naallugu atuarfimmik Qeqqata Kommunia pilersitsivoq. Taamaalillutik autismeqartut atuarfimmut arfiniliinnarnik atuartulimmut - 400-inik atuartulimmut atuariartornatik atuariartorsinnaalissapput.
Atuarfik nutaaq Sisimiuni Paarnaqutit 1-imi pisassaaq, atuartunullu arfinilinnut inissaqassalluni.
Ilinniartitsisut marluk autismeqartunut misilittagaqarluartut ilinniartitsisuussapput, kiisalu perorsaanermik misilittagaqarluartut sulisorineqassallutik.
- Atuartut immikkut pisariaqartitsisut atuarfimmi nalinginnaasumi, 400-inik atuartulimmiissinnaanngillat. Taamaattumik atuarfimmik arfiniliinnarnut inissalimmik ammaavugut, Nalunnguarfiup Atuarfiani pisortaq, Tim Arnoldi Sermitsiamut oqarpoq.
Politikkikkut piumassuseqarluarneq
Tim Arnoldip ilanngullugu oqaatigaa Qeqqata Kommunia qanimut suleqatigalugu atuarfissaq piviusunngortinneqartoq, politikkikkullu tapersersorneqarluarsimasoq. Sulisut sumiiffissarlu kommunimit isumagineqarput.
- Piviusunngortinnissaa ajornarsimanngilaq. Politikkikkut suleqataarusussuseq misigaara. Atuartitsivissaq sulisullu pissarsiaraat.
Nalunnguarfiup Atuarfiani autismeqartunut immikkut atuartitsisarput, atuartulli pisariaqartitaat malillugu inuppassuarniissinnaanngillat.
- Mianersortumik atuartut arfinillit aallartissavagut, takussavarput qanoq ineriartornersoq. Neriuppugut atuarluassasut atuarfimullu takkuttuaannavissasut, Tim Arnoldi oqarpoq.
