Kujallermi akileraarutinut akiitsut 75 million koruuninik taarsigassarsinikkut akilerneqartut
Kommune Kujallermi kommunalbestyrelsi kommunimut qinersinissaq sioqqullugu ataatsimiinnermini kingullermi kommunip 75 million koruuninik aningaaserivimmit taarsigassarsisimanerata kingorna akileraartarnermut Namminersorlutillu Oqartussanut akiitsut tamarmik akilerneqarsimasut paasitinneqarpoq.
Assi: Kommune Kujalleq
2023-mi akileraarutit A-t, 2024-mi januaarimi 43 millionit koruuniusutut naatsorsorneqartut, akilerneqarsimanngitsut maajimi paasineqareersorlu Kommune Kujalliup aningaasaqarnera iluarsineqartoq borgmesterip Stine Egedep nuannaarutigaa.
Akileraarutinik A-nik akiliinermut tunngatillugu kukkusumik aningaasanik nuussisoqarsimanera akileraarutinik akiliisimannginnermut nassuiaatigineqarsimavoq.
Ingerlariaqqissinnaanngortut
- 75 mio. kr.-nik aningaaserivimmi taarsigassarsinikkut akileraarutinut Namminersorlutillu Oqartussanut akiitsut qaffakkiartorsimasut akilersimagatsigit nuannaarutigaara. 2023-mut naatsorsuutit ullut qaninnerpaat ingerlaneranni suliarineqareerpata akiitsut qaffakkiartorsimasut aamma naammassisinnaavagut. Kingoraartitta kommunip aningaasaqarneranik pisariaqartumik eqqorluartumillu takunnissinnaalernissaat oqiliallaatigaara, borgmester Stine Egede kommunalbestyrelsip februaarip 28-ani ileqquusumik ataatsimiinnerata kingorna oqarpoq.
Amerlanernit isumaqatigiissutigineqartoq
Stine Egedep kommunalbestyrelsimi ilaasortat allat partiimut ilaasortaanerat apeqqutaatinnagu aningaasaqarnikkut iluarsaaqqinnissamut pilersaarutip akuerineqarneranut qutsavigai.
- Qinigaaffimmi matumani angusaqarluarpugut, suliassarpassuilli suli siunissamiipput. Aningaasaqarnermut immikkoortortaqarfik pilersitseqqinnissamut pilersaarummik suliaqarnerminni ilungersorsimanerat sulisullu tamarmik maannamut angusaqarsimanerat pillugu qutsavigaakka, Stine Egede oqarpoq.
Aningaaserivimmit taarsigassarsiat kommunip aningaasaqarneranut ukiumut qanoq annertutigisut, aamma taarsigassarsiat qaqugu akilerneqareersimanissaat naatsorsuutigineqarnersoq oqaatigineqanngilaq.
