Louis Sigurdsen: Angerlarsimaffeqanngitsut politikkikkut oqallinnermi puiorneqarput
Namminiilivinnissaq aamma orsugiassiorfik pillugu oqallinnermi inuuniarnerminni ajornartorsiuteqartut, soorlu angerlarsimaffeqanngitsut, puiugaasut Atassut sinnerlugu qinigassanngortittoq Louis Sigurdsen isumaqarpoq.
Assi: Tôrtia Reimer-Johansen
Angerlarsimaffeqanngitsuuneq ajornartorsiutaavoq erngertumik iliuuseqarfigineqartariaqartoq. Inatsisartunut qinigassanngortittoq Louis Sigurdsen (A) taama isumaqarpoq:
- Nunatsinni ajornartorsiutit ukiorpassuarni aaqqiivigineqarsimanngitsut maanna ukkatarisariaqarpagut.
Inuiaqatigiinni unammilligassat, soorlu ilinniartitaanerup, inuit innarluutillit atugaasa, inissaaleqinerup isumaginninnermullu tunngasut ajornartorsiutit pingaarnerutinneqartariaqartut isumaqarpoq.
Louis Sigurdsen naapertorlugu nunami maani angerlarsimaffeqanngitsuuneq atornerluinermik taamaallaat pissuteqarnani aammali inuiaqatigiinni pissutsinik, soorlu ineqarnerup akisuneranik, attaveqarfigisinnaasanik amigaateqarnermik meeraanermilu misigissutsikkut naalliuutinik pissuteqarpoq.
Eqiasunnerunneq pissutaanngitsoq
- Nalunngiliuk angerlarsimaffeqanngitsut amerlasuut suliffeqartut? Angerlarsimaffeqanngitsuunermut eqiasunneq peqqutaanngilaq - atugarliortuunerliuna, oqarpoq.
Taamaattumik angerlarsimaffeqanngitsut ingerlalluaqqilernissaannut ikiorniarlugit aaqqissuussaanerusumik iliuuseqartoqarnissaa kissaatigaa, ilaatigut angerlarsimaffeqanngitsunut inissiat, atornerluisunut neqeroorutit pitsaanerusut aamma "Housing First"-imik periusissiaq, innuttaasut atugarliortut ingerlalluaqqilernissaannut aalajangersimasumik ineqarnermik aallaaveqartoq. Angerlarsimaffeqanngitsut aamma atornerlunneqartartut, persuttagaasartut kinguaassiutitigullu kannguttaatsuliorfigineqartartut tikkuarpaa, tamakkuninngalu aqqusaagaqarsinnaasarnerisa suli sanngiinnerulersittaraat.
- Inuiaqatigiit atugarissaarpugut imaluunniit? Tamatta nalilimmik inuuneqarpugut? - imaluunniit tarrarsorfigisinnaasagut kisimik?
Politikkikkut oqallinnermi inuiaqatigiinni ajornartorsiutit nukinginnarnerusut sammineqarnerusariaqartut Louis Sigurdsen isumaqarpoq, Danmarkimut attaveqarneq namminiilivinnissarlu kisiisa pinnagit.
