Maanna akitsuutinik sorsuttoqalersoq — Kina akisoq
Amerikamiut Canadamit Mexicomillu nioqqutissanik eqqussukkaminnik 25 procentimik akitsuusersuinerat marlunngornermi ullaakkut atuutilerpoq. USA-ttaaq Kinamiit nioqqutissat eqqussukkami akitsuutai 10 procentimiit 20 procentimut qaffappai. Kinap Amerikamiiit nioqqutissat akitsuuserlugit akivoq.
USA-p præsidentiata Donald Trumpip nunat arlallit akitsuutinik qaffaaffigilerpai.
Assi: Mary Altaffer/AP/Ritzau Scanpix
USA-p præsidentiata Donald Trumpip akitsuutit atuutilersinneqarumaartut ataasinngornermi unnukkut tusagassiortunik katersortitsinermini uppernarsarpaa.
Trump Mexicomit, Canadamit Kinamillu nioqqutissanut akitsuusiinissamik peqqussummik februaarip aallartinnerani atsiorpoq.
Canadamiit Mexicomiillu eqqussukkanut akitsuut februaarimili atuutilertussaagaluarpoq, taamanerniilli kinguartinneqarpoq.
Præsidentip akitsuusersuinermut tunngavilersuutaa tassaavoq Mexicomit Canadamillu ikiaroornartunik „akuerineqarsinnaanngitsumik annertutigisumik“ USA-mut eqqussuisoqartarnera.
Trumpip nunat taakku marluk USA-mut fentanylinik eqqussuisunik nunarsiartortunillu ikilisaaniarlutik iliuuseqarpiarsimannginnerarpai.
Peqqussut nutaaq
USA-p præsidentiata Kinamiit eqqussukkanut akitsuutit qaffanneqarnissaannut peqqussut aamma ataasinngornermi atsiorpaa.
Trumpip siusinnerusukkut mianersoqqussutigisimasaatut peqqussut naapertorlugu akitsuutit 10 procentiniit 20 procentinut qaffanneqarput.
Kinap aningaasaqarnermut ministeria Reuters naapertorlugu Amerikamiut nioqqutissaannut arlalinnut 10-15 procentit akornanni akitsuusiinissamik pilersaaruteqarluni marlunngornermi ullaakkut nalunaarpoq.
Canadami ministeriuneq Justin Trudeau Trumpip akitsuutinik siorasaarinini pimooruppagu marlunngorpat Amerikami nioqqutissat eqqussukkat 25 procentinik akitsuuserneqassasut marlunngormat unnukkut nalunaarpoq.
- Canadap aalajangiineq tunngavissaqanngitsoq tamanna akinngitsoorumanngilaa, Trudeau tusagassiuutinut nalunaarummi allappoq.
Canadap USA-mit nioqqutissat eqqussukkani akitsuusersorniarlugit aalajangernera marlunngornermi ullaakkut suli atuutilersimanngitsoq nalunaarutigineqarpoq.
Mexicomi præsidentip Claudia Sheinbaumip Trumpip aalajangiinissaa utaqqillugu, akitsuusiinissaali piviusunngorpat allatut pilersaaruteqarluni ataasinngornermi ualikkut oqarpoq.
Kinamiut akissutaat
USA-p Kinamiut nioqqutissaannut akitsuutinik nutaanik atuutilersitsineranut akerliusumik Kinap Amerikamiut nioqqutissaannut assigiinngitsunut 10-15 procentit akornanni akitsuuteqartitsilerpoq.
Akitsuutit nutaat marsip qulingani atuutilissapput, Kinami aningaasaqarnermut ministereqarfimmit marlunngornermi ullaakkut tusagassiuutinut nalunaarummi allassimavoq, nutaarsiassaqartitsivik Reuters allappoq.
USA-miit kukkukuut, qajuusiassat, majssit annoraassiassallu 15 procentimik akitsuuserneqassapput.
Tamatuma saniatigut USA-mi naasorissaasut tunisassiaannut allanut 10 procentimik akitsuusiisoqarpoq.
Ilaatigut puulukip neqaa, nersussuup neqaa, paarnat naatitallu akitsuuserneqarput.
