Meeqqat tapersersorneqartut amerlanerulertut: Najortit 2024-imi amerleriangaatsiartut
Meeqqanik illersuisoqartitsisarnerup ‘Najorti’ qularnaartarpaa, meeqqat inuusuttullu inunnik isumaginninnermi suliamut ilaalersillutik illersuisoqartinneqarnissaat. 2024-mi meeqqat inuusuttullu 183-it angerlarsimaffiup avataanut inissiisoqarnissaanik suliamut ilaalersut illersuisoqartinneqarput. 2023-mi 87-iupput.
PEDER TROLLE
Najortit amerleriarnerinut peqqutaasut arlaliupput, ilaatigut inatsip tukatereerneqarnerata kingorna kommunini sulianik suliaqarnikkut erseqqissaanerup kingorna.
- 2023-mi novemberimi meeqqanik tapersiisarneq pillugu inatsisip sukaterneqareernerata kinguneraa, kommunini sulianik suliaqartut qaqugukkut Najortit suliamut ilaatinneqalertarnissaat pillugu erseqqinnerusunik tunaartarisassaqalernerat, Julie Lynge paasissutissiivoq.
Taassuma saniatigut Najorti siorna 2024-imi Inunnik Isumaginninnermik aqutsisoqarfik suleqatiginera nukittorsarpaa, tassani ukiuni pingasuni suleqatigiinnissamik isumaqatigiissuteqartoqarluni. Isumaqatigiissut isumaqarpoq najorteqartitsineq nuna tamakkerlugu pisalissasoq, nakortillu amerlanerit ilinniartinneqassallutik.
Aqutsisoqarfimmiit salliunneqarneq
Isumaginninnermut Aqutsisoqarfimmi immikkut siunnersortip, Ida Rasmussenip isumaqatigiissutip pingaaruteqassusaa oqaluttuaraa:
- Nunami tamarmi meeqqat sulianut imminnut tunngasunut peqataatinnissaat Isumaginninnermi Aqutsisoqarfimmi pingaartillugu salliutipparput. Isumaginninnermut Aqutsisoqarfimmit Kalaallit Meerartaannik suleqatigiinnissamik isumaqatigiissuteqarneq meeqqanik illersuisartussat nutaat ingerlaavartumik ilinniartinneqarnissaannut qitiulluinnartutut isigivarput, taamaalilluni Kalaallit Nunaanni meeqqat inuusuttullu piginnaaneqarluartumik illersuisoqarnissaminnut periarfissaqaqqullugit.
Najortip ersarinnerulernissaa anguniarlugu Najorti nutaamik ilisarnaatitaarpoq. Suliamik suliaqarnermi najortip meeqqanik ataasiakkaanik tapersersuilluni qanoq sulisarnera ersersinniarneqarluni.
- Tamatuma saniatigut meeqqat inuusuttullu tapersersorneqarnissaminnut periarfissaqartinnissaannik suliniuteqarput ingerlaqqippoq. 2024-mi illersuisartussat nutaat arfineq-pingasut Upernavimmi Maniitsumilu ilinniartippagut, ukioq mannalu Tasiilami, Narsami, Qasigiannguani Uummannamilu illersuisartussanik nutaanik ilinniartitsissaagut. Maannakkorpiaq illersuisartut 49-t illoqarfinni nunaqarfinnilu assigiinngitsuni sulipput.
