Meeqqat tunuarsimaaraangata

Meeraq Dronning Ingridip Napparsimmavissuani init ilaannut matup alloriusaaniippoq.

Killaat qaqortut, sprittisunni atortorissaaruterpalaarlu taqimanalaarai. Meeraq arni tulaavigeriarlugu nipangersimavoq suleqataajumananilu.

- Tassa taamatorpiaq nalaataqakkajuppugut, nakorsaaneq Hanne Lynge Rex oqarpoq nangillunilu:

- Meeraq toqqissisimanngikkaangami tunuarsimaalersarpoq. Suleqatigiinnissamullu akunnerpaaluit – ilaannikkut ulloq unnuarlu - aatsaat qaangiutereeraangata piareertarput.

Taanna meeqqanullu peqqissaasoq Patdlek Stork Dronning Ingridip Napparsimmavissuata meeqqanut immikkoortortaani sulisut ilagaat. Marluullutillu tassa Nuummi ulluinnarni sulinerminni misilittakkatik ”Peqqinnissaqarfimmi meeqqat nipaat” NunaMedimi sammineqarmat saqqummiipput, meeqqat pillugit oqaaseqartartoq UNICEF-illu Kalaallit Nunaanni allaffianeersoq peqatigalugit.

Angisuunik tigussaanngitsunillu takorluugaqarnissaq pinagu meeqqat angajoqqaallu napparsimmavimmiittut tikilluaqqulluarlugillu oqaloqatigilluarnissaat pingaartippaat. Tamannarpiarlu tunngavigigitsik, ataatsimeersuartitsinissaq sioqqullugu AG-mit oqaloqatigigatsinni aamma oqaatigaat.

- Meeraq napparsimmavimmut iseraangami silarsuarmut allamut pisutullusooq misigisimasarpoq. Inuppassuit atisallu aatsaat takusatik nipillu aatsaat tusaasatik siumortarpaat. Meeqqap angajoqqaavilu toqqissimanissaannik qulakkeerinninnissaq uagut suliassaraarput, Patdlek Stork oqarpoq.

Timimikkut pissusaat ersersitsisartoq

Toqqissisimanissaat pingaartilluinnarpaat – taamalu misigisimaqqullugit oqaloqatiginisssaat iliuuseqarnissarlu angutsertarpaat, meeqqaammi pisunut misikkarittaqimmata.

- Nakorsaq nalornigaangat meeqqamit malugilertorneqartarpoq, angajoqqaaniillu taamaalilluni aamma malugilertorneqartarluni. Nakorsiarnerminnilu toqqissisimanissaraluat taamaalilluni qatangiinnartarpoq. Taamaammat toqqissisimanartumik oqaluunnissaat pissuseqarfiginissaallu eqqumaffigisorujussuusarparput, soorlu tuikkut pattalaarnerisigut, eqqissisimasumik oqaluunnerisigut unillatsialaartarnikkullu, Hanne Lynge Rex nassuiaavoq.

Iliuutsit taamaattut tamarmik toqqissisimanissaannut pingaaruteqarluinnarput.

Toqqissisimannginnermi aporaannermik siornatigut kinguneqartarsimavoq. Napparsimmavimmimi sulisut meeraq aaversinnaajumallugu najummiisarnerat ukiut quliinnaat matuma siorna nalinginnaasuulluinnarpoq. Pissutsilli maanna allanngornikuupput, tassa taamaaliussaarnikuupput.

- Angjoqqaat akuersinissaannut pisariaqavitsinnagu utaqqeqqaartalernikuuvugut, Patdlek Stork oqarpoq.

- Sapinngisamillu iluaallioqqunagit malugisaataarutsitsisartumik kapineqarfissaasigut taneqqaartarpavut. Nalunngilarpummi nuanniitsumik misigisaqarneq ukiorpassuarni kingunerluutaasinnaasartoq.

Sulisut ikippallaarujussuartut – meeqqat isumagisassaat amerlaqisut

Dronning Ingridip Napparsimmavissuata meeqqanut immikkoortortaqarfia sulisussaaleqisorujussuuvoq.

Tassa immikkoortortaqarfimmi tassani sulisut sisamaannaapput: nakorsaq, peqqissaasut marluk ikiortilu. Tamatuma saniatigut meeqqanut nakorsat marluk pingasulluunniit kingoraartaallutik tassani aamma sulisarput. Savalimmiut sanilliukkaanni pingasunik meeqqanut nakorsaqarpoq 36-nillu peqqissaasoqarluni. Tassa quleriaatingajammik amerlanerusunik sulisoqarpoq.

- Tassa qularisassaanngitsumik ikippallaarujussuarpugut. Suliassaqarfik taanna politikkikkut salliunneqalerumaartoq neriuutigilluinnarparput. Pisariaqartinneqaqisormi ersarippoq, Hanne Lynge Rex Patdlek Stork oqarput.

Sulisukippallaarujussuarnera matussuserniarlugu Peqqinnissaqarfimmi suleqatitik immikkoortortaqarfinni allani assigiinngitsuneersut aamma ilitsersuuttarpaat – soorlu nittartakkakkut attaveqaat Teams aqqutigalugu sineriammiluunniit napparsimmavinnut angalanikkut.

- Ataatsikkut sumi tamaniissinnaanngilagut. Suleqativulli meeqqat qanoq pissuseqarsinnaasarnerannik meeqqanullu pitsaanerusumik qanoq atugassaqartitsisinnaanermik ilinniartissinnaavagut. Tamanna Peqqinnissaqarfiup aaqqissuussaaneranik sutigut tamatigut allannguinissamut pingaaruteqarpoq, Patdlek Stork oqarpoq.

Politikerit tinnersarsimagitsik neriuutigigaat

Taamaammat “Peqqinnissaqarfimmi meeqqat nipaat”-nik eqqartuineq ulluinnarni sungiusimasanut siunissamullu ungasinnerusumut iseqarluni tulleriiaarinissamut tunngassuteqarpoq. Politikerillu tassa Katuami ataatsimeersuartitsinermi tassa NunaMedimi saqqummiinerminni tusarnaartunut aamma ilaasut tinnersarsimagitsik marluullutik neriuutigaat.

- Meeqqamik qitiutitsilluinnarnissap qanoq pingaaruteqartigineranik annikikkaluartumilluunniit tinnersarsimagutsigit – taava angusaqareersimasutut taasinnaavarput,” Hanne Lynge Rex oqarpoq.

Ataatsimeersuartitsineq Nuummi aaqqissuussineruinnarani Peqqinnissaqarfimmili meeqqat pisinnaatitaaffii pillugit ilisimatusarnerunissamut oqallinnerunissamullu aallartinissaataassasoq neriuutigaat.

- Ullut tamaasa allorialaartarpugut – iliuuseqartoqarnerunissaali aamma pisariaqartipparput, Dronning Ingrip Napparsimmavissuani nakorsaaneq taassumalu meeqqanut immikkoortortaqarfiani aamma pisortaasoq oqarpoq.

Meeraq napparsimmavimmut alloriusamiittoq suli sikingavoq. Arnaata assani meeqqami tuiatigut pattalaarlugu tuppallersarpaa. Nakorsaq ingippoq, sallaatsumik anersaartorpoq meerarluni inissaqartillugu. Meeraq malunnaarsaarluni toqqissiartuaarpoq.

Attavigiinneq siulleq taamaalilluni pilersarpoq.