Sequnngerpunga atortullu nipaat tusaasinnaallugit. Saviminerpaluk. Pulatimmassuk annernaqaat. Allaannginnami savimmik kapineqarluni. Suut tamaasa malugisinnaavakka, oqaaseqanngilangali. Manngertitaannarpunga. Aqqaneq-marluinnarnik ukioqarpunga sulilu aaqartalernikuunanga. Qanoq meerartaartoqartarnersoq naluara. Qalasikkoortarsoraara.
Utaqqisarfimmiinnera nakorsamiinneralu eqqaamaqqissaarpakka. Kisimiippunga inersimasumillu ilaqarnanga, aamma naluara sooq tassungarnerlunga. Iseqquneqarpunga truusikkalu peeriarlugit nallaqquneqarlunga.
Sequnngerpunga atortullu nipaat tusaasinnaallugit. Saviminerpaluk. Pulatimmassuk annernaqaat. Allaannginnami savimmik kapineqarluni. Suut tamaasa malugisinnaavakka, oqaaseqanngilangali. Manngertitaannarpunga. Aqqaneq-marluinnarnik ukioqarpunga sulilu aaqartalernikuunanga. Qanoq meerartaartoqartarnersoq naluara. Qalasikkoortarsoraara.
Utaqqisarfimmiinnera nakorsamiinneralu eqqaamaqqissaarpakka. Kisimiippunga inersimasumillu ilaqarnanga, aamma naluara sooq tassungarnerlunga. Iseqquneqarpunga truusikkalu peeriarlugit nallaqquneqarlunga.
Anigama kikkut tamarmik takusinnaagaannga qanorlu pineqarsimanera nalunngikkaat misigisimavunga. Kanngusussuuarpunga.
Upernavimmut nooqqammerpugut. 1978-imi aggustip aallartilaarnerani. Angerlarsimaffimmi asanninneqaqisumi eqqissisimasumilu peroriartorpunga. Qatanngutigiinni arfineq-marluusuni tallimaraannga. Akisussaassuseqartussatut perorsarneqarpugut. Qanoq pisoqarsimanera anaanap ilisimanngilaa. Aatsaat siorna oqaluttuuppara.
Peroriartorninni qallunaat oqartussaasullu naalattaqqullugit oqaanneqartarpunga. Ataqqivagut tatigilluinnarlugillu. Nakorsaq assortornianngilara. Taamaattoqarnermi ajorpoq.
Qanoq meerartaartoqartarnersoq atuarfimmi aatsaat paasivara, aatsaallu ilinniartitsisup naartunaveersaatit eqqartormagit suneqarsimanerlunga aatsaat paasillugu.
Assiliisoq: Oscar Scott Carl
Suli naluara sooq meerartaarsinnaasimannginnera. Isumaqarpunga spirali pissutaasoq. Ukiorpassuarni sukataarsimavunga. 35-nik ukioqalernissama tungaanut sukataarpunga, taava tunniutiinnarpunga. Meerartaarnissarput kissaatiginerpaasimavarput. Ukiorpassuarni ullut tamaasa akiuuttarsimavugut. 29-nik ukioqarlunga meeravissiartaarpugut. Amerlasuut ima oqartarput: Meerartaarnissat kissaatigingaarakku meerartaarsinnaanngilatit, kisianni panissiartaaruit nammineerluni takkutissaaq. Taama pisoqanngilaq. Allat meeqqaminnik naveersisut takugaangakkit kamalertarpunga. Oqaaseqarneq ajorpunga, eqqarsartarlungali: Qitornat qaaguk, illit asasinnaanngikkukku uanga asassavara.
Oqaaseq utoqqatserneq soqutiginngilara. Piaarinani iliuuseqarsimagaanni oqaaseq utoqqatserpunga atorneqartarpoq. Qanorli iliorneq ilisimallugu piliamut utoqqatserneq atorfissaqartinngilara. Allanngortissinnaanngilat.
Taarsiivigineqaraluarumaluunniit qitornartaarsinnaanngilanga. Aningaasat taakku sumut atussagakkit? Aningaasat pilluarnerulissutiginavianngilakka. Nakorsaq spiraliliisoq kisiat kamaappara. Nakorsaagaluaruniluunniit naameersinnaavoq. Meeraasunga takusinnaavaa.
Arnat allat taamatut misigisaqarsimasut eqqarsaatigisarpakka. Taakkua ilarpassuinut naleqqiullunga ajunngeqaanga. Tarnikkut napparsimalersimanngilanga. Ingerlariaqqinnikuuvunga. 35-liigama oqarpunga tassa. Ingerlariaqqinniarpunga. Qiaqqikkusunngilanga.
Neriuppunga oqaluttuara taamanikkut Kalaallit Nunaanni pisut pillugit paasinninnissamut iluaqutaassasoq, aamma sooq ullumikkut qanoq innitsinnut. Kinguaariiuvugut assigiinngitsutigut sakkortuunik misillersimasut. Paasineqarniassagatta oqalutturisassavara.
Arnaq Johansen, 60-inik ukiulik.
