Newark - Nuup silaannakkut aqqutaa USA-mi ammarneqarpoq

Arfininngornermi juunip 14-ianni 2025-mi Amerikamiut timmisartortitseqatigiiffiata United Airlinesip USA-p Kalaallit Nunaatalu akornanni timmisartuussineq siulleq aallartissavaa.

Kalaallit Nunaat sinnerlugu Washington D.C.-mi sinniisoqarfimmi pisortaq Jakob Isbosethsen New Yorkimi Newark-imi timmisartuussisarnerup nutaap nalliuttorsiutiginissaanut qaaqquneqarpoq, tassanilu Nuummut aallannginnermi nalunaaqutaq 10.30 (nunatta nalunaaqutaa malillugu 13.30) qalersamik qiorsisuuvoq.

- Kalaallit Nunaat Amerika Avannarlerlu imminut ilisarisimalluarput. Siulivut Alaskap Canadallu issittuini angalasarnikuupput sikukkullu pinertussusertik, anorimik silamillu ilisimasartik atorlugu kiisalu qunutitassaanngitsumik tarneqarnertik kinguaaminnut ingerlateqqissimavaat tamannalu inuiaqatigiinni ulloq manna tikillugu suli pigaarput, Jakob Isbosethsen oqarpoq nangillunilu:

-  Aqqut oqaluttuarisaanermi siullerpaamik aqqutigineqalertussaq New Yorkimi aallartissaaq akunnerillu tallimat affaanit amerlanerunngitsunik ingerlaarfigineqareerluni Nuummut apissiffigineqartussaalluni, akunnerisa takutippaat piffissami sivikilluinnartumi inuiaqatigiit akornanni tikeraartoqarsinnaanera periarfissanillu ammaassisoqarsinnaanera. Kalaallit Nunaannut soqutiginninneq politikkikkuinnaanngilaq, inuussutissarsiornikkut kulturikkulli aamma soqutiginnittoqarpoq. United Airlinesip ingerlalluarnissaannik kissaapparput takornarissanillu amerikameersunit tikinneqarnissarput nunaqqatittalu Nunarsuup Kitaanut angalasinnaalernissaat qilanaarilluinnarlugu.

Ammaanersiorluni pingaartorsiornermi Jon Gooda, Newark Liberty International Airportip Vice-præsidentia, Patrick Quayle, United Airlines Global Network Planning and Alliancesip Senior Vice-præsidentia, kiisalu Washington D.C.-imi sinniisoqarfimmi pisortaq peqataapput.

Kalaallit Nunaat New York Timesimit 2025-mi angalaffissatut soqutiginarluinnartutut nunat 52-it ilaattut saqqummiunneqarpoq.