Niviarsiaraq arfinilinnik ukiulik suliaritereerluni toqusoq - Napparsimasut Maalaarutaannik Aalajangiisartut peqqinnissaqarfimmi sulisut isornartorsiorpai
Niviarsiaraq arfinilinnik ukiulik suliaritereernermi kingorna toqusimaneranut tunngatillugu Dronning Ingridip Napparsimavissuani sulisut marluk isornartorsiorneqarput. Peqqissaasoq nakorsarlu immikkoortortaqarfimmi M2-mi sulisut nakorsap nalunaarsugaani allattuisimanerat pillugu Napparsimasut Maalaarutaannik Aalajangiisartunit isornartorsiorneqarput. Peqqissaasoq naammaginanngitsumik passussisimanini pillugu aamma isornartorsiorneqarpoq.
Assi: Emil Helms
Niviarsiaqqap arfinilinnik ukiullip suliaritereernerata kingorna 2023-mi juunip qaammataani toqunera pillugu peqqinnissaqarfimmi sulisut marluk Napparsimasut Maalaarutaannik Aalajangiisartunik isornartorsiorneqarput.
Frederik Olsenip pania, arfinilinnik ukiulik, Manumina, neqaajartilluni suliaritereernermi kingorna anniarpoq, aammik meriarluni silalullunilu. Ataataasup Dronning Ingridip Napparsimavissua, maajip 31-ani 2023-imi oqarasuaatikkut attavigaa.
Ataataasulli panimi qanoq inneranik nassuiaalluni saaffiginnikkaluarnera kinguneqanngilaq.
Ataataasoq nukillalaarpoq kamalerlunilu.
Niviarsiaraq ullualuit qaangiummata toquvoq.
- Anaana, merialerpunga.
Taama Manumina Olsen arfinilinnik ukiulik juunip pingajuanni 2023-mi toqunnginnermini naggataamik oqarpoq.
Meeqqap ersiutai peqqissaasup nalunaarsorsimanngikkai
Napparsimasut Maalaarutaannik Aalajangiisartut aalajangiussaanni atuarneqarsinnaavoq niviarsiaqqap angutaata panimi aattalimmik meriarsimanera pillugu oqarasuaatikkut peqqinnissaqarfimmut saaffiginninneranit, niviarsiaqqap napparsimmavimmi nalunaarsuutaanut peqqissaasoq nalunaarsuisimanngitsoq.
Taamaattumik nakorsaq isumaqarsimavoq meriartoqarsimanngitsoq. Nakorsap ataataasullu oqaloqatigiinneranni aamma tamanna paasineqanngilaq.
Niviarsiaqqap napparsimanerani siarngutigineqarneranut peqqutaasut peqqissaasup nalunaarsuiffimmut allassimanngimmagit isornartorsiorneqaatigaa:
- Peqqissaasup 31. maj 2023-mi napparsimasup nalunaarsuiffissaanut allattuisimannginnera pillugu isornartorsiornissaanut tunngavissaqartoq nalilerparput, Napparsimasut Maalaarutaannik Aalajangiisartut allapput.
Taamaattumik peqqissaasoq "sulinermini nalinginnaasumik akuerineqarsinnaasunik najoqqutassianik unioqqutitsisimasutut" isornartorsiorneqarpoq.
Peqqissaasoq naammaginanngitsumik passusisimanini pillugu aamma isornartorsiorneqarpoq. Manumina Alma Olsenip Dronning Ingridip Napparsimmavissuani misissortinnissaa peqqissaasup isumagisimasinnaagaluaraa, Napparsimasut Maalaarutaannik Aalajangiisartut ilaatigut maluginiarpaat:
- Manumina Alma Olsen suliaritereernermi kingorna aattalimmik meriartarsimavoq, aamma aak qanoq annertutiginersoq nalileruminaattuaannarpoq, aalajangiisartut aalajangiinerminni allapput.
Nakorsaq misigissutsini napparsimasup nalunaarsorfianut allakkai
Nakorsaq napparsimasup nalunaarsuiffianut allattuisimanini pillugu aamma isornartorsiorneqarpoq. Tamatumunnga pissutaavoq nakorsap nammineq misigissusini isummanilu napparsimasup nalunaarsuiffiinut allattussaanngimmagit, taamaaliorsimavorli:
- "Angut taanna suleqatigigunarlugu paasigakku annilaarpunga. Aamma paasivara quleriinni najugaqarfeqatigiittugut, tamannalu toqqissisimajunnaarnerulissutigaara.", nakorsaq Manumina Olsenip napparsimasut nalunaarsuiffianut allassimavoq.
Nakorsarneqarnerup nalaani napparsimmavimmi sulisut ilaqutaasullu akornanni aaqqiagiinngittoqarsimasoq, nalunaarsuiffimmi allassimavoq.
Napparsimasut Maalaarutaannik Aalajangiisartut aalajangiinerminni ilaatigut allapput nakorsap niviarsiaqqap napparsimmavimmi nalunaarsuiffissaanut nammineq misigissutsini allattariaqarsimanngikkai, kiisalu niviarsiaqqap nakorsarneqarnissaanut ilaqutaasullu suleqatiginissaanut paasissutissat allanneqartut aamma pisariaqartussaanngitsut.
Taamaattumik aalajangiisartuniit nakorsaq napparsimasup nalunaarsuiffianut allattuisimanera pillugu isornartorsiornissaanut tunngavissaqartoq nalilerneqarpoq.
- Tamatumunnga pissutaavoq paasissutissat taakku napparsimasup katsorsarneqarneranut imaluunniit peqqinnissaqarfimmi sulisut napparsimasullu ilaqutaasa siunissami suleqatigiinnissaannut attuumassuteqarnatillu pisariaqartinneqannginnerat.
Aalajangiinermi nangilluni ima allassimavoq:
- Taamaattumik nakorsaq Manumina Alma Olsenip juunip aappaani 2023-mi Dronning Ingridip Napparsimmavissuani immikkoortortaqarfik M2-mi nakorsartinneqarnera pillugu nalunaarsuiffimmut allattuinermigut nalinginnaasumik akuerineqarsinnaasumik suliamut tunngatillugu najoqqutassiaq malissimanngilaa.
Niviarsiaqqap angajoqqaavisa aamma pisoq politiinut nalunaarutigisimavaat, politiilli inerniliipput napparsimmavimmi sulisut pinerluuteqartutut unnerluutigineqarnissaannut tunngavissaqanngitsoq.
