Partiini siuttut isumaqatigiittut: „Ulloq nuanneq“
Naleqqap tupiani nipilersortoqarpoq, qinersisartullu ulloq naallugu qinersiartorlutik tulleriiaarsimammata Nuup Timersortarfissuata saavani nuannisartoqarpoq
Aki-Matilda Høegh-Dam
Assi: Trine Juncher Jørgensen
– Ulloq demokratiimik nalliuttorsiorfiuvoq. Inuppassuit nuannaarlutillu qiimapput, Demokraatit siulittaasuat Jens-Frederik Nielsen oqarpoq, taannalu ullup annersaani Nuummi Timersortarfissuup saavani eqitaaralunilu assammissisarpoq.
– Siuariartoqassasoq neriuutigalugulu upperilluinnarpara. Silaannakkut malugisinnaavara. Qineqqusaartitsilluarsimavugut, tamannalu qineqqusaartut sinnerlugit tulluusimaarutigeqaara, taamaammat qinersineq uagutsinnut pitsaassasoq upperaara, Jens-Frederik Nielsen oqarpoq.
– Siuariartoqassasoq neriuutigalugulu upperilluinnarpara. Silaannakkut malugisinnaavara, Partiip siulittaasua Jens-Frederik Nielsen Demokraatineersoq oqarpoq.
Assi: Trine Juncher Jørgensen
Taasiartortoqarluartoq
Nuummi qinersisartut 33 procentii maannamut Nuup Timersortarfissuanut qinersiartorsimapput, taamaammallu qinersiviup unnugu nalunaaqutaq 20 matunissaanut qinersiartortorpassuussasut ilimagineqarpoq.
– Ullaaq manna nalunaaqutaq qulingiluanut qinersiartortut aatsaat taama amerlatigisut takuakka. Taamaammat ullumikkut qinersiartortut amerlassusaat isumalluarfigilluinnarpara, Atassutip siulittaasua Aqqalu Jerimiassen oqarpoq nangillunilu:
– Partiit amerlasuujulluta innuttaasut ullormi demokratiimik nalliuttorsiutiginninnermi qinersiartoqqullugit kajumissaarpagut. Tamanna tusarluarneqarpoq, nuannaarutigeqaaralu.
Aqqalu Jerimiassen
Assi: Trine Juncher Jørgensen
USA-mut naaggaartut
Oqallinneq Siumup tupertaani aamma ingerlalluarpoq, qinersisartullu, ilaatigut inuppassuit Amerikamiut præsidentiannut ersarissumik oqariartuuteqarusuttut pissutigalugit, tapersersuilluarumaartut partiip siulittaasuata Erik Jensenip siulittuutigaa.
– Silagissorujussuuvoq nuannisarpugullu. Misigivunga qinersiartortartut amerlaqisut, qularnanngitsumik aamma Amerikamiut præsidentiata oqaaserisai kingulliit pissutaallutik. Inuit isummersorusupput, arlallillu USA-p pisinissamik neqeroorutaa itigartikkaat malugisinnaavara.
- Isumaqarpunga inuppassuit USA-p pisinissamut neqeroorutaa itigartikkumaaraat, Siumup siulittaasua Erik Jensen oqarpoq, taassumalu ullumikkut qinersisoqangaatsiarumaartoq siulittuutigaa.
Assi: Trine Juncher Jørgensen
Nillujuitsumi kaffi — agguaassassalli nungupput
Naleqqap tupersuani aamma nuannisartoqarluarlunilu nipituumik nipilersortoqarpoq.
– Inuit qiimapput. Inuit nuannaarput. Nipilersuut ingerlavoq, agguaassassagullu nungupput. Teqqiallit, seqinersiutit qungasequtillu agguaanneqareersimapput, aamma naqqup iluaniittut nungupput, taamaammat kaffi kisiat neqeroorutigisinnaavarput, Naleqqami qinigassanngortittoq Aki-Matilda Høegh-Dam oqarpoq.
