Aasarisseruttornerani
qulisimasoq Palle Heilmann Nuummi AG-p nutaarsiassaqartitsivianut iserpoq.
Taanna sulinerminit ajutoorsimanerminit nakorsamit uppernarsaatinik,
aningaasarsiat allagartaannik allarpassuarnillu uppernarsaatinik nassataqarpoq.
Nuup ilaatigut Narsarsuakkoorluni pisuinnaq orniguppoq. Aqqut 600 meterit
missiliorlugit takissusilik. Nakorsap ullormut annerpaamik kilometerimik
pisussinnaaqqusinera qujanartumik angunngilaarlugu.
Aasarisseruttornerani
qulisimasoq Palle Heilmann Nuummi AG-p nutaarsiassaqartitsivianut iserpoq.
Taanna sulinerminit ajutoorsimanerminit nakorsamit uppernarsaatinik,
aningaasarsiat allagartaannik allarpassuarnillu uppernarsaatinik nassataqarpoq.
Nuup ilaatigut Narsarsuakkoorluni pisuinnaq orniguppoq. Aqqut 600 meterit
missiliorlugit takissusilik. Nakorsap ullormut annerpaamik kilometerimik
pisussinnaaqqusinera qujanartumik angunngilaarlugu.
Palle
naammatsissimasoq, oqartussanullu iliuuseqarsinnaanngitsutut misigisimalluni.
Nammineq oqarneratut pimoorunneqanngilaq.
-
Sullissisut tusarnaarneq ajorput, naleqanngitsutullu misigitittarlunga.
Tupinnartorujussuuvoq, Palle Heilmann oqarpoq, nangipporlu:
- Sulinermi
uattullu ajutoorujussuarsimasunut ikiortissaqanngilaq. Nammineq
ikiortissarsiorniarneq nukinnik atuiffiusorujussuuvoq. Ajutoorninniit ukiut
marlunngulerput, taamanerniilli oqarfigineqarsimanngilanga ima: »Uani
ikiorneqarsinnaavutit«, oqarpoq.
800
kiilunit uppiffigineqarnini anigoraa
Pallep sulinermini
siornaak sakkortuumik ajutoornerminit aniguinera tusagassiutitigut siorna
sammineqarpoq. 2023-mi augustip 16-iani ajutoorpoq, tassani sanaartornermi
atugassanik 800 kiilunik oqimaatsigisunit uppiffigineqarluni. Minutsit qulit
missaanni nanertisimasoq, annannissaalu ilimagineqarsimanngikkaluarluni.
Sanaartugassat uppeqqasut peerneqarmata tupaallannartumik nammineerluni
anersaartulerpoq. Napparsimmavimmukaanneqapallappoq, sinitsitaalluni ullullu
pingasut qaangiummata Rigshospitalimukaanneqarluni. Tassani allerua seqummakoq
saviminermik ikkussiffigineqarpoq. Pukusumigut, najungasumigut, singernermini
aamma arlalinnik naffakuuvoq, kiisalu kigutai napisimapput qitia pillilluni
qaratsamigullu sajuppillatsitsilluni.
Qaammatit
marluk sinnerlugit Rigshospitalimi ajoqusernerminik katsorsarneqareerluni
Nuummut angerlaqqippoq. Mittarfimmi napparsimavimmi sulisuniit aaneqanngilaq
nammineerlunilu angerlartariaqarluni. Ullualuit qaangiummata aamma
nammineerluni napparsimavimmukarpoq uternini nalunaarutigiartorlugu.
Kommuneqarfik
Sermersuup innuttaasunik kiffartuussivia tullernguullugu ornittussaavaa.
-
Ajutooreernermi kinguninngua kommunimut saaffiginnissimasussaagaluartunga
paasitinneqarpunga. Sinitsitaagama Danmarkiliaanneqarlungalu
taamaaliorsimasinnaannginnera nassuiarniarsarigaluarpara. Iluaqutaanngilaq.
Ingerlaannaq saaffiginnissimasussaagaluarnera sulisup aalajangiusimavaa, Palle
Heilmann malunnartumik pakatsisimaqisoq oqaluttuarpoq.
Palle Heilmann Brugsenip eqqaani ilaatigut aalisakkanik panertunik tuniniaasarpoq: - Aalisakkanik panertunik ullaakkut qulingiluaniit sapilernissama tungaanut tuniniaasinnaasarpunga, Palle Heilmann oqarpoq.
Assiliisoq: Oscar Scott Carl
Sullissineq arriitsoq
Taamani ajoqusernera
sulisitsisorisimasaata Sulitilluni ajoqusernerit pillugit Sullissivimmut
nalunaarutigaa, suliarlu suli maanna ingerlavoq. Taassuma sapaatit akunnerini
20-t pallillugit akineqarnissani utaqqisinnaagaa AG-mi 2024-mi saqqummertumi
allaaseraarput. Pallep sivisuumik utaqqisinneqarnini pissutigalugu suliap sumut
killinnera arlaleriarluni paasiniartarsimavaa.
- Sulisumit paamitsassimaqqarpasissumit akineqartarpunga, taamannallu
kiinnerfigineqartarnera akornutaasutut misigininnik kinguneqarpoq. Taama
pineqarnera nuannarinnginnakku naveerpara. Taamanili sulisoq alla
saaffigiuminarnerusoq kisiat oqaloqatigisalerlugu, Palle oqarpoq.
Kukkussut
nassuerutigineqartoq
KOMMUNIMIT SULIAQ IMA OQAASEQARFIGINEQARPOQ
Palle
Heilmann pillugu allaaserisaq Kommuneqarfik Sermersuumut nassiunneqarpoq.
Sulianut ataasiakkaanut tunngasunut oqaaseqartoqarsinnaanngitsoq Kommuneqarfik Sermersuumi
Suliffeqarnermut Isumaginninnermullu Ingerlatsivimmi pisortaq Lise Buchardt
mailikkut allappoq.
-
Suleriuserli ataatsimut isigalugu oqaaseqarsinnaavugut, tassalu inatsisit
atuuttut malillugit innuttaasut tamarmik Kommuneqarfik Sermersuumi eqqortumik
ataqqinnippaluttumillu pineqarnissaat sulissutigisaralutigu.
Siusinaartumik
soraarnerussutisiaqalernissamut suliat ajornakusoorlutillu pimoorullugit
suliaasartut Lise Buchardt nangilluni nassuiaavoq. Peqqissaartumik inatsisillu
naapertorlugit nalilersuisoqartartoq. Kommuni aalajangiitinnani
paasissutissarpassuarnik katersuisarpoq – ilaatigut nakorsanit uppernarsaatit,
isumaginninnermut tunngasut sulisinnaanermullu piginnaasanik nalilersuinerit
katersorneqartarlutik.
- Nakorsanit
uppernarsaatit innuttaasup peqqissusaanik taamaallaat naliliinerusarnerat
erseqqissassallugu pingaaruteqarpoq, inatsillu naapertorlugu nakorsap
innuttaasup sulisinnaanera nalilersinnaanngilaa. Inatsit naapertorlugu
innuttaasup sulisinnaaneranik tamakkiisumik nalilersuinissaq kommunip
akisussaaffigaa – sulisinnaaneranillu misiliut innuttaasup siusinaartumik
soraarnerussutisiaqalersinnaaneranut aalajangiisuuvoq, taamaappat qanoq
annertutigisumik – annikinnerpaamik, akunnattunik qaffasinnerpaamilluunniit –
soraarnerussutisiaqalersinnaanera, Lise Buchardt oqarpoq, nangillunilu:
-
Suleriutsip paasiuminaassinnaanera nassuerutigaarput, ingammik perulunnartumik
nappaateqaleraanni ajutooraanniluunniit. Taamaattumik innuttaasut
toqqissisimanerulerniassammata ikiorneqarluarniassammatalu sullissinerput
attaveqaqatigiinnerpullu pitsanngorsarniartuaannarpavut.
Palle
Heilmann sulisinnaanngitsutut nalilerneqarami
suliffittaaqqissinnaajunnaarnikuuvoq. Taamaattumik 2024-mi apriilip aappaani
siusinaartumik soraarnerussutisiaqalernissaminik qinnuteqarpoq. Kommunimiit
aggersarneqarani sianerfigineqarpoq.
- Kommunimi
sulisup soraarnerussutisiaqalersinnaajumallunga misiligummik suleqqaaqqullunga
oqarfigaanga. Nassuiaappara nakorsap sulisinnaanngitsutut naliliinera
uppernarsaatitut pigalugu, ullormullu kilometeri ataatsip missaa taamaallaat
pisuffigisinnaallugu. Iluaqutaanngilaq.
Palle
Heilmann naggataatigut borgmesterimut naammagittaalliuummik allagaqarpoq,
taassumalu siusinaartumik soraarnerussutisianut qinnuteqaatinik
suliaqartartumut ingerlateqqippaa. Palle taassuma ataatsimeeqatiginissaanut
aggersarneqarami nuannaarpoq, ataatsimiigiarnerminilu isumalluarluni.
- Isigaanga
ingerlaannarlu sulisinnaanerarlunga nalilerlunga. Suli inuusukkama sulilu
ilinniagaqarsinnaagama misiligummik suleqquneqarpunga. Nakorsamit
uppernarsaatit eqqaagakkit taakku atorneqarneq ajortut oqarfigineqarpunga,
namminnerooq sulisoqarsinnaanersoq nalilertarpaat. Tunniutiinnarpunga.
-
Sullissisunnit siorna novembarip naanerani kingullermik sianerfigineqarpunga.
Tassani suliffinni sakkortuumik ajutoornikuusunga oqaluttuuppaanga.
Allaannginnami uanga nammineerlunga ajutoornikuunera nalugakku nassuiaakkaanga.
Isumaqarpunga paasissutissat nakorsamit pissarsiarisimagaat. Sullissisunnit
paasitinneqarpunga sullinneqarninni kukkusoqarsimasoq, tamannalu
naammagittaalliutigisinnaagiga. Aamma siusinaartumik
soraarnerussutisiaqalersinnaasunga paasitippaanga.
Sukataarneq
kiserliornartoq
Palle
Heilmannimut tamanna maannamut iluatsittutuaavoq. 2025-mi januaarip
aallaqqaataani kiisami siusinaartumik soraarnerussutisiaqalerpoq. Sulitilluni
ajoqusernerit pillugit Sullissivimmit aalajangiisoqarnissaa maanna utaqqivaa.
- Immikkut
ilisimasalimmut nakorsamukarpunga, taassuma timikkut ajoqusersimanera
misissorpaa. Niaqquma illuatungaata ilaa malugisaataarussimasoq paasivaa.
Maanna takussavarput qanoq aalajangiisoqassanersoq. Eqqartuussissuserisoq
ikiortiseralugu attaviginikuuara. Sulinermik ajutoornerup kingorna ukiut marluk
utaqqeqqaassasunga siunnersorpaanga, taava akeqanngitsumik eqqartuussivimmut
suliassanngortitsisinnaanerlunga qinnutigisinnaanngussavara.
Akiuunneq
suli naammassinngilaq. Sullinniarneqarnermini aqqusaakkani Palle Heilmannip
pakatsissutigai. Allat taama aqqusaagaqarnissaat pinaveersaartikkumallugu
aqqusaakkani pillugit saqqummerusunnerminut pissutigaa.
- Maannakkut
pissutsit taamaatsillugit suliffimmi ajutoortoqarpat ima oqaannassaanga:
»Iluatsitsilluarina!« Pisortani inuppalaartumik sullinneqarnavianngilatit.
Pisortanut saaffiginninnermi kisimiittoqartussaanngikkaluarpoq,
ikiuisoqartussaagaluarpoq, Palle Heilmann oqarpoq.
