Pisortat suliffeqarfiutaanni aqutsisoq nikanarsaalluni tiinganiarsimasutut pisuutinneqartoq
Pisortaq suliffimmiit angerlartinneqarsimasoq atorfilimmut kannguttaatsuliorsimasutut eqqartuussivimmit pisuutinneqarpoq. Eqqartuussut nunatta eqqartuussisuuneqarfianut suliareqqitassanngortinneqarpoq.
Nuummi Eqqartuussisoqarfik Sermersuumi unnerluutigineqartoq pinerluuteqaqqissagaluarpat ulluni 20-ni pineqaatissinneqarsimasunut inissiisarfimmiittussanngortinneqarpoq.
Assi: Morten Okkels
Angut pinerluuteqaqqissangaluaruni Eqqartuussisoqarfik Sermersuumi ulluni 20-ni pineqaatissinneqarsimasunut inissiisarfimmiittussanngortinneqarpoq. Pisortat suliffeqarfiutaanni pisortaagallarami sulisumi ilaat kannguttaatsuliorfigisimaneranut pisuusutut eqqartuussisoqarfimmi aalajangerneqarpoq.
Nuummi allaffiani 2023-mi novembarimi tamanna pivoq. Eqqartuussisoqarnissaa pissutigalugu pisortaq suliffimminiit angerlartitaanikuuvoq.
Suliffimmi pisortaasimasoq eqqartuussivimmi siullersaalluni oqaaseqarpoq, tassanilu atit oqaatigineqaqqusaanngillat. Arnaq pineqartoq allaffimmini ataatsimeeqatigisimallugu uppernarsarpaa. Arnap ullut sulinngiffeqarfissai tassani eqqartorpaat.
Eqqaamavaa ullut ilaanni tunuatigut isikkaminik attulaarsimallugu, tamannali ajornartorsiutitut isiginagu.
Sulisitsisup angerlartinneqartup unioqqutitsisimannginnerarnini attappaa, unnerluussisullu oqaasii ilisarisinnaanagit. Taanna sulisorlu illaqatigiissinnaapput, imminnulli ataqqillutik, pisortaq angerlartitaasimasoq oqarpoq.
Nassuiaatit assigiinngitsut
Ilisimannittoq taava apersorneqalerpoq. Taanna pisortaasimasumut unnerluutigineqartumut sulisuusimavoq. Ullormi tassani pisimasoq pillugu allatut oqaluttuarpoq.
Allaffimmiit aniartorluni isigak nuluminut kivinneqartoq aalatinneqarlugu malugisimallugu oqaluttuarpoq. Qanoq iliussalluni naluaa, annilaangalerpoq kingusinnerusukkullu aatsaat unnerluutigalugu. Allaffimmi pisumit nanertisimaneqarsimalluni aamma oqaatigaa.
Ilisimannittut marluk pisumi najuussimannginnertik pissutigalugu angerlartiinnarneqarput. Taamaalillunilu eqqartuussisut inuit marluk nassuiaataat imminnut assortuuttut kisiisa aalajangiiffigisussaavaat. Taamaattoqartillugu unnerluutigineqartoq pisuunngitsutut nalilerneqakkajuttarpoq. Maannali taamaattoqanngilaq.
Uppernassuseq apeqquserneqartoq
Sulisup nassuiaataa pisortarisimasami nassuiaataanit tutsuiginarnerusoq eqqartuussivimmi aalajangiinermi pingaartinneqarpoq. Aamma unnerluutigineqartup arnap isikkaminik piffissap ilaani attorsimallugu uppernarsarmagu eqqartuussiviup aalajangiinermini tunngavilersuutigaa. Tamannalu arnap ajuallaatigisimasinnaavaa, nammineq taama isumaqanngikkaluartoq.
Pisortaq angerlartinneqarsimasoq kannguttaatsuliorsimasutut pisuutinneqarpoq, pinerluuteqaqqissagaluarunilu ulluni 20-ni pineqaatissinneqarsimasunut inissiisarfimmiittussassanngortinnissaa eqqartuussivimmi pingasunngornermi ullaap tungaani aalajangerneqarpoq.
Suliarli taamanga killeqanngilaq, illersuisut ingerlaannaq Nunatta Eqqartuussisuuneqarfianut pinngitsuutinneqarnissaq anguniarlugu suliareqqitassanngortippaat. Tamatumunnga atatillugu atinik saqqummiusseqqusaannginneq sivitsorneqarpoq. Taamaattumik pineqaatissinneqartup aqqanik paasissutissanillu allanik taassuma kinaaneranik ersersitsisunik saqqummiussisinnaaneq suli inerteqqutaavoq.
